سمر الطالبات في احدى مدارس البنات

والله الصورة والصور التي مثلها تجعل الواحد يتمنى لو كان عاش في ذلك الزمن الجميل وانقرض قبل ما يجي الزمن الحاضر ، يكون عاش سعيد ومات اسعد ، واكيد راح يكون مصيره الجنة لانو زمن كان نظيف وناسو نظاف ، بالله في اجمل من ان تقضى الفترة لصباحية من يومك في مثل تلك الاجواء والبراءة وبعدها ترجع البيت تلقى الوالده عاملة ليك قراصة بى ويكه او عصيده بى ملاح روب او كسرة بى ملاح ام رقيقه ، تضرب الحاجات دي وتديها كوز مويه بارده من الزير القاعد تحت الشجرة ومن هناك طوالي للشارع لقضاء بقية اليوم في اللعب البرىء والشيطنة ، واثناء لعبك لو عطشت او جعت او داير تقضى حاجتك تقوم توووش تخش اقرب بيت ليك تشرب او تاكل او تنوم عندهم او حتى تستحمى عندهم وكل ذلك بدون حرج او استاذان من اصحاب البيت ، ياريت الزمن داك يرجع والناس تكون زى ناس زمان ناس قلوبا نظيفه ، والله الواحد احيانا لمن يتذكر الحاجات دي بقوم يسخن ويحلف انو راجع تاني للوطن وانو مش راح يعيش في العاصمة وانو لازم يمشي الاقاليم البعيدة ويشيل اولاده العايشين طول عمرهم في الغربة وما بعرفو شى عن السودان غير اسمه ولكن بعد شوية يقوم الشيطان يوسوس ليه ويطلع ليه حاجات تخليه (يفصل) ولنسى الفكرة من اساسها .
اتمنى من كل السودانيين القادرين على الرجوع للوطن ان يفكرو بجدية في ذلك لانه بصرحة ما في اجمل من الوطن مهما كانت المشاكل الفيه انا بصراحة ما قادر افعلها ما عارف ليه الظاهر الشيطان تمكن منى خالص . الله يلعن شيطان الغربة وين ما كان . ودمتم