ريز ويذرسبون تساعد أربعة لاجئين سودانيين

البحصل شنو لو الناس دي رفضت تمشي الشغل يعني عصيان مدني عديل, يبدا بالقطاع الخاص اي بتاع بزنس، سمسار، بقاله، ورشه، طبليه، خدرجي، بوتيك، مغلق، تحويل رصيد… كلهم يبطلو يمشو الشغل لمدة اسبوع و اذا امكن يحضِّرو للاسبوع ده بمخزون علي قدر استطاعتهم, بعد كده القطاع الحكومي حيتلحلح شويه لانو وضعو معقد و ممكن الموظف يدخل في حيص بيص و امن و تحقيق لو عمل عصيان شان كده بخاف, لذلك الحل انو العصيان يبدا من القطاع الخاص و اكيد حيتبعو الحكومي, اساسا الناس لا ماكله لا شاربه شنو يعني لو وقفت الحياه الاساسا واقفه لمدة اسبوع بس, اسبوع واحد مافي زول يمشي الشغل الناس تتكل و تقلل حركتها عشان ما يكون في اجهاد و جوع, اقعدو في البيوت و احضرو المسلسلات المدبلجه الما عندها نهايه دي و ممكن تحولو للقنوات (عدا الجزيره) لانو موضوع العصيان حيكون انتشر و بكده الشغله حتكون رسميه و الاعلام حيساهم فيها بقدر كبير حتي لو بدت من مدينه واحده مجرد ما الناس اليائسه تسمع باقي المدن حتبطل و بعد كده النظام ما عندو خيار الا يتكل علي الله.
شعب جيعان حيجيهو شنو لو جاع زياده؟؟ كلو جوع في جوع لكن التاني بينتهي من النظام في غمضة عين. لا تولعو شموع لا تدقو الصفيح لا حلل التمبلباي, حل بسيط لمو ليكم (اصطوك) اكل من النواشف و لمو عيالكم و ما تمرقو نهاااااائي.
بالنسبه للاصطوك من الطعام و المواد الغذائيه, المسأله دي حتكون ابسط لو تمت علي اساس تعاوني يعني زي الضرا بتاع رمضان و اي حي سوداني بكون فيهو الغنيان و الفقير رغم انو المعفنين ديل ما خلو للغني فرقه في البلد دي, فممكن الناس الممهوله و الميسوره تعمل بلنص للشغله و تتشايل الحكايه لأنو اكيد بكون في ناس ما لاقيه حق الفطور ناهيك عن الغدا بل ناهيك عن اصطوك لمدة اسبوع, بالتالي الكلام و النقاش و التنسيق ضروري في المسأله دي, و انسب وكت علي ما اعتقد هو المسا في الميادين الناس تقعد زيها و زي اي ونسه عامه تتفاهم و ما تخافو من الغواصات و الكيزان و بتاعين اللجان الشعبيه المعرصين, ما بيقدرو يعملو حاجه و ما ضروري زاتو الناس تسميهو عصيان سموهو اي حاجه (اجازه, تكله, كسرة عمود, ياخي ماشين رحلة في حلتنا)!! المهم الناس تبدا بالاقربين زملاء الوجع و رفقاء التذمر و الاحتجاج علي سياسات الدوله بعد داك صدقوني البلد ما حيفضل فيها كوز و حتلقوهم كلهم بقدرة قادر بقو تبع العصيان ليه لأنهم جبانين و حاجه زي دي ما بتوقعوها و كان اكتشفوها زاتو ما عندهم ليها حل …. العصيان المدني هو اسلم الحلول لشعب جائع منهك تعبان و فتران و عندو سوء تغذيه ,,, يللا ورونا الراي شنو؟؟
و الناس ما تاخد الاقتراح ده كمناسبه للايكات و عدم الموضوع دايرين نقاش يولد افكار و كل الاحداث المهمه في تاريخ البشريه بداياتها كانت باهته و ضعيفه لكن اتحققت بالنقاش و مشاركة الافكار ,, وصيه اخيره ما تهتمو و لا تردو علي الجداد.