المدير الفني للمريخ يعتذر للجمهور ويرفض تحميل الحضري مسؤولية الخروج من الكونفيدرالية

والله يا اخوي كان اعتذرت والا ما اعتذرت انت السبب الرئيس في عدم توفيق المريخ لا في الكونفدرالية ولا الدور الممتاز .. وهذه سياستك الفاشلة .. انت السبب الرئيسي في خروج المريخ .. فريق يضيع لاعبوه اهدافاً بالجملة بل ومضمونة مثل كرة امس الذي لو تركها السعودي لدخلت بدون اي تدخل منه .. والله كان هذه الكرة في مرمى المريخ السعودي كان دخلها الشباك .. سبحان الله ..
في نهاية الامر بنقول قدر الله وما شاء الله فعل ..

ولهؤلاء الشمات ..نتمنى ان يطير ابو الهل مثلما طار المريخ يا رب يا كريم .

الوصيفاب يستاهلوا شجعناهم وخذلونا, الحضري لو منو فايده ماكان رموهو ليكم, ورقصني يا جدع

أنا مريخابي وكان كل أملي أن يفوز المريخ بالكأس، ولكن الواقع أن المريخ بوضعه الحالي لا يستحق الفوز بالبطولة وخروجه هو نتاج طبيعي في ظل وجود لاعبين غير موهوبين وليس لديهم الغيرة التي اشتهر بها لاعبي المريخ على مدار تاريخ المريخ وقد ظل المريخاب يعيشون على تاريخ الكأسات المحمولة جواً دون عمل على المحافظة على ما تحقق بتحقيق المزيد، وأخيراً أتمنى أن يفوز الهلال بالكأس حتى نسمع كلام أخر غير الكلام الذي ظللنا نسمعه دائماً ويعيش عليه جمهور المريخ من أن المريخ هو الوحيد الذي يأتي بالكأسات المحمولة جواً وأن تنتهي مقولة (الصفراب)التي ظل المريخاب يعيشون عليها حتى نرى منافسة قوية بين الناديين يكسبها من يلعب أحسن ويرفع اسم السودان

قروش الشعب السوداني ما كان اولى بيها شعب دار فور بدل الحضري وريكاردو …………

هههههههههههههه اها كرموا الحضري تاني انتو ليع ما عايزين تعترفوا انو الحضري ما غلطان

المسؤولية تتحملها بمفردك يا مدرب الفشل والسجم
ما عندك خط وسط نهائي ومدرب جبان في مباراة الذهاب لعبت دفاع 90 دقيقة مع فريق مفروض تلطشوا ذهاب واياب و كان مفروض تكلم اللاعبين ما يضيعوا الوقت لكنك جبان

الفريق الكونجولى افضل تكتيكيا وخططيا من المريخ ولهذا استحق الوصول للنهائى!!انحنا فاشلين فى كل شىء حتى فى التخطيط السياسى مش الكورة بس!!!!

الوحيد الذي يتحمل خروج المريخ هذا المخرمج ريكاردو الذي لم يستطيع توظيف إمكانيات لاعبيه
عندما طالب الجميع بخروج الشغيل في المبارة السابقة …أكمل به المباراة …وعندما إنصلح حاله بعض الشئ في هذه المبارة ….أخرجه !!!!
كان الأصلح بقاؤه مع دخول العجب بديلا للعجب وخروج الباشا الذي لم يقدم شئ وكان ضيف شرف ودخول مصعب …ودخول فيصل موسي…أو أديكو … بديلاً لكلتشي أوسكواها وإن كان كلاهما غير مقنعين أهو تغير ربما أتي بجديد …
أما سعيد السعودي فهذا المتلاعب يثبت لي في كل مبارة بإنه ليس بقامة فريق كبير مثل المريخ …والغريب هنالك من كتب عنه مقال قبل أيام في صحيفة قون أشاد به …وقال أنه يجيد ناصية الحديث..وأنه متعلم …( صحفيون متربحون …أو يريدون للمريخ الإحتفاظ به لتجديد عقده لأنه ثغرة كبيرة ولا يجيد التهديف ولا صناعة اللعب …)
تذكرت العم شاخور عليه الرحمة عندما أتاه أحدهم فرحان يخبره بأن كيجاب شال كاس السباحة بإسم المريخ …فرد عليه العم شاخور لو كيجاب شرب البحر ده كلو مابفش غبينتي …أنا عايز واحد يغلب لي الهلال ده وبس …
إشبطبوا أشباه اللاعبين ..بله جابر ..الزومة ..سعيدالسعودي …الشغيل …سكواها …كلتشي …أديكو…إعارة أوشطب الباشا …علي الجهاز الاداري حث اللاعب الخلوق العجب علي إفساح المجال وتقديم الإعتزال مع التكريم السريع جداً …
وتسجيل البديل الناجح ومعظمهم موجود داخل السودان ..

انتو ما بتسمعو الكلام ياخ المريخ دا لو ما فارقو جمال الوالي ما حيمشي لي قدام ياخ المريخ ماشي بي قروش حراااام ديل قروش الناس الجيعانين في جبال النوبة العراة في معسكرات دارفور والفقراء في الشرق وقروش مرضى السرطان والفشل الكلوي الما لاقين علاج … الحضري دا جيبتو بيكم عارفين جيبتو ليه عشان المغصة دي لانه جيبته بقرووش الوالي الحرامي ويذهب الحرام من حيث اتى … المريخ دا لما جاب الكاس كان بصرفو عليه راسمالية وطنيين بتعبم وبي حقهم لا ظلمو زول ولا سرقو زول يعني المريخ السنة دي لا شال الدوري و الكونفدرالية شوفو القروش الدفعها كم والناس لو بتتعظ الامثلة كتيرة وين وارقو وجابو بيكم وعمل شنو ….. وين شرق ووسط افريقيا اللي صرف عليها الوالي الملايين من قروش الشعب واستضاف كل انديتها المشاركة عشان اشيلها ويقول عمل انجاز للمريخ الفريق الغلب المريخ في النهائي كان المريخ غالبه في الافتتاح ستة صفر شوطين الكورة في خط 18 ابت تدخل ليه ؟؟ عشان قروش الحرام ليس الا … وشوف يوم امس الكورة ماشة القون الم فيها واحد زي القدر انطحها اطلعها برا لييه الكلام دا ؟؟؟ عشان قروش الحراام
والمريخ استاهل لانه بعد قلة الادب بتاعة الحلبي دي كلها والاساءات القدمة للمريخ والكورة السودانية تاني جو يهتفو ليه ( عقدة نقص متأصلة ) في النهاية الحضري هو السبب في طيران المريخ ( شوف الحكمة دي )
المريخ لو عاوز امشي لي قدام لازم اول حاجة اطرد الحرامي دا ويتم الدعم بي عرق اولادو الهمهم الانجاز للمريخ مش تلميع الذات والكلام الفاضي

خلاص يا ريكاردو مسئولية الخروج دي بتحملا انا كدا ارتحتا الله لاريحك قول امين
سبب الخروج وااااضح لكنكم لا تملكون الشجاعة للجهر به و هو الحضري الماسووورة ذو ال40 بوصة.. اقصد عاما

انا ما عارف الحلبي دا ماسك شنو على المريخ عشان بعد يغلط يقعدوا يفتشوا في الاعذار
و يستقبلوا في المطار بينما اذا اخطأ موسى الزومة مثلا يشردوا من البلد

السبب الثاني قروش الحرام الغارق فيها المريخ حتى اذنيه من رئيسه اللص جمال الوالي

السبب الثالث اعلام البنشر بقيادة كبير النفاخين مزمل ابوالفاشل اللذين يجعلون من لاعبين
مثل بلة جابر و نجم الدين و الشغيل نجوما افضل من ميسي و تياغو سيلفا و كريستيانو رونالدو

انا يا طير انا يا طير بشوفك

حمام الوالي يا راحل يا راحل مع النسمة الليوباردية

يا ابو الريك حدي بعد خش الجامعة يرجع للثانوي من الهلاااال للمريخ ما حرام عليك الوقعة دي

المسئولية بتحملا الوالي لانو ما ادى الحكام اللاب توب و الجلاكسي المعتاد قالوا الوالي جاب

موبايلات صينية للحكام و قال ليهم يا اخوانا الكورة دي ساهلة ما محتاجة لاب توبات انتو

قايليننا لاعبين مع الهلال .. المهم الحكام رقضوا وقالوا اللاب توبات دي نحنا قافلين عليها

من ما اتأهلتوا .. الدقيقة 90 الوالي قعد يأشر للحكام ويكورك خلاااااص بديكم مصنع توشيبا كلو

لاكين الحكم رفض و قال تاني عشان تعملوا فيها بتغلبوا براكم

. جاء يلا بلا لمه معاكم قال ضفر قال جمهور في قمة الهبالة استقبل الحضري هاك الحضري ده وجع وجع وجع يلا اعملو ليكم كاس بتاع سمايه وشيلوه ……

السلام عليكم
اولا انا مريخايبي جد عن اب، وكنته اتمنى فوز المريخ وايضا والله فوز الهلال اليوم ان شاء الله، وتكون المبارة النهائية سودانية خالصة، حتى على الاقل نفرح هذا الشعب ولو بفوز في كرة قدم، لكن قدر الله وما شاء فعل، تمنياتنا اليوم بفوز الهلال، ارجو من جميع ابناء السودان بأن يخلصو الدعاء لفوز الهلال اليوم ومن ثم الفوز بالبطولة ان شاء الله.
يجب على ادارة المريخ الاستغناء عن المدرب ريكاردو، فهو مدرب فاشل لا يجيد قراءة المعلب ولا يجيد توظيف اللاعبين بالرغم من تدني مستواهم وضعف لياقتهم البدنية والذهنية
يجب على ادارة المريخ الاستغناء عن جميع المحترفين فهم لم يقدمو شي يذكر
على ادارة النادي التخلي عن طريقة الاجاويد في التعامل مع اللعيبة والاداريين من يطور مستواه يبقى ومن يتدنى مستواه يعطى فرصة اخيرة او التسريح .
على المطبلاتية من اصحاب الصحف الكف عن تخدير الجماهير الكروية، لعمري هى احدى اخفاقات الكرة في السودان بلا استثناء.
هناك وكيل لاعبين واحد في السودان معترف به ويحمل رخصة من الفيفا وله خبرة تزيد على الثلاثين سنة خارج وداخل السودان مشهود له بالنزاهة، على ادارة النادي الاستفادة منه في جلب مدربين ولاعبين لتدعيم الفريق . في الختام نسال الله التوفيق لكل الفرق السودانية والقائمين على الرياضة فهي متنفس الشعوب.اخيرا وليس اخرا نتمنى الفوز للهلال حتى نرفع اسم السودان عالياً والله الموفق

نحن السابقون وانتم اللاحقون … اليوم ظهرت الشماته علي وجوهكم وغداً ستشربون من نفس الكاس … المريخ قدم الكاسات المحمولة جواً فماذا قدمتم انتم ؟؟!! صفر دولي كبير … وان غداً لناظره لقريب

صدقوني الهلال برضو حيطير اليوم

ياالوالى اشطب بالصف وفر دولاراتك للناشئين-ياربى -فريق البارح فية كم محترف

السبب الرئيسى المدرب والسبب الاساسى هو الحيوان الحضرى والادجارة الفاشلة والتى تعمل على احضار الاسكراب والغريب فى الامر انها تدفع فيهم الملايينواتحدى اى ادارى لو عنده مبرر يدافع بيهو عن خروج المريخ العظيم بهذه المهزلة .

ساكواها يجب انهاء عقده فورا
ادكو يجب انهاء عقده فورا
كليتشي يجب انهاء عقده فورا
الحضري يجب انهاء عقده فورا
وارغو يجب انهاء عقده فورا
المدرب يجب انهاء خدماته فورا
الطاقم المساعد يجب انهاء خدماتهم فورا

الابقاء على
فاروق جبره المدير الفني
خالد احمد المصطفي مساعد المدير الفني
ابراهومه وابو جريشه دائرة الكره
ليما و باسكال يمكن الاستفادة منهم

هذا هو الصاح وفر دولاراتك يا الوالي

اقتراحات
طرح نادي المريخ كشركة مساهمة زي نادي مانشستر يونايتد لكي لا يتحكم في النادي رجال اعمال فاسدين وجهلة في مجال الادارة الرياضية
الاستعانة بكوادر ادارية احترافية
انشاء اكاديمية ناشئين لتخريج عناصر تمتلك الولاء للمريخ ومع الولاء الصقل الجيد للموهبة
ارسال لاعبيين اكفاء واصحاب اخلاق دمثة مثل فيصل العجب الي ايطاليا او المانيا لاخذ دورات تدريب متقدمة والاعتماد عليهم مستقبلا في التدريب كما يفعل نادي الترجي التونسي واندية شمال افريقيا المحترمة

طبعا ده كله ضرب من ضروب الخيال في حالة عدم التخلص من نظام قاتل للابداع ومنمي للفساد والاحباط مثل نظام الانقاذ

انتو عارفين والله الحال كولو من بعضو يعني الاخفاق الاقتصادي والسياسي والاجتماعي طبيعي تكون الكورة عندنا تعبانا لماذا لانو البلد الاقتصادها تعبان شعبها جيعان والزول الجيعان بيكون مرضان والمرضان انتو عارفين الباقي ربنا يصلح بلادي آآآآآمييييين

في واحد كتب امس عن انه سعيد السعودي عميل

يعني الكلام دا طلع صحيح مائة في المائة
هو واخرين في الفريق ومنهم جمال الوالي نفسه

كل ده في هلال مريخ شعب مهزوم من كل ناحية كيف ينتصر المريخ وبكرة الهلال ح يتهزم لان ثقافة الانهزام هي السارية في دمنا من خمسين سنة ولا زالت وسوف تظل الي ان نغير مفهموم معني الحياة عندنا وغدا سوف تشرق الشمس للوجوه الجميلة التي سوف تاتي حتما

لست متابعا جيدا للكرة وان كنت اشجع المريخ سلبقا ولم اسمع بهذه المباراة التعيسة الا بالامس من احد الاخوة المهمومين بالمريخ صباح مساء والذي صدمته نتيجة المباراة للدرجة التي لم يستطع معه تناول وجبة الغداء والعشاء
ان المأساة التي توصلت اليها من حديث صديقي تكمن في هذا المسمى بجمال الوالي والفلوس التي تحت تصرفه والتي يوزعها يمينا ويارا دون ضمير يؤاخذه او شخص يسأله من أين له تلك الاموال التي يصرفها ومن اي خزينة فالدولة لا اعتقد بأنها تعطيه تلم المبالغ وبالتالي اما انها اموال منهوبة من هذه الدولة التعيسة او انها اموال مستخلصة من غسيل لما تأتي به المخدرات وعمولات السلاح وغيرها من ضروب الثراء الحرام الذي استشرى بفضل نظام الانقاذ الفاسد
هل يعقل ان يوجد بالسودان اكثر من 90% يعيشون تحت الفقر ويصرف على المدعو الحضري والذ تسبب في هزيمة ةالمريخ عمدا بالتاكيد يصرف شهريا 25 لف دولار في حين ان الأستاذ الجامعي مرتبه لا يزيد عن 140 دولار؟؟؟؟؟؟؟؟؟؟!!!!!!!!!!!!!!!!!!!!!!!!يا جماعة الحضري دا قالو اشترو ب75- الف دولار وبدفعو ليه حوافز عقب كل مباراة وبعد خروجه من المباراة يسافر رأسا الى مصر في اقرب طائرة مقلعة ومعكيه الوالي عربة برادو جديدة وساكن في شقة مفروشةبأحدث ما نتجته مصانع الموبليا العالمية ويوجد تحت امرته 5 خدامين يقومون بخدمته
بالله عليكم في شعب تعيس ذي الشعب السوداني دا ناس نكرة ذي المدعو جمال الىالي يصرف شمال ويمين دون حسيب ولا رغيب على حثالة لاعبي دول لم تقدم للرياشة العالمية غير الفوضى والرشاوي منهم من قبض كما اخبرت 2 مليون دولار ومنهم من اقل من ذلك بقليل الا يدق هذا البذخ الفاجر الجرس لمعرفة من اين هذه الأموال
صحيح انها خربانة من كبار عندما قدم البشير الراقص للاعبي مصر عربت وتكريم وهذه الفلوس نعرف انها من مال الشعب وذهبت رشوة لنظام الفاسد مبارك بمصر لزوم المحكمة الجنائية ولكن المال الذي يدفعه جمال الوالي وصلاح ادريس لا نعرف له اصل ولا فصل
اللهم صبرك على هذا الفساد