الكبري الطلع من حقنتك بالسيسي..هداهو الجقر وقدت علبتو ام سيسي
ازهري محمد علي.
ياودالخدر وكت النفوس مطايبة
الخير بالشرق إلا المراكب جايبه
موجعني العوج فوق البلاد السايبة
فيرانكن تغن ولا الكدايس خايبة
ياوالي الوجع غافل سفهتا حديثي
وارخيت السمع لي كلبك البوليسي
الكبري الطلع من حقنتك بالسيسي
هداهو الجقر وقدت علبتو ام سيسي
السكة الحديد كانت تصينا دريسة
تبرا فلنكتا وتعرف تحدد ميسا
الليلة السدود عينتا ليها كديسة
للفار الجقر لافرتكان لاعيسي
بنوت اللعاب حمدتهن بالنفرة
وحندكتا الولاد بالدين ضفرتنا ضفرة
تربستا البلد غافل نسيت الشفرة
نحن مع الجقور في شرعك أولاد حفرة
في عز الطلب عايش عزيز في خيري
رطانة وعرب فاطنة وعزيزة وميري
الحال انقلب وانا ذاتي واحد غيري
بارينا العلب ولعبنا توم ان جيري.
سلم يراعك ايها الشاعر ازهري حفظك الله دخرا للوطن وللبلاد والعباد الروعة تاتي من المعناة وشعرك صار مدرسة الحقيقة في وجه الطغاة نأمل المذيد من شعرك الراقي ومن كل شعراء السودان الشرفاء
دمتم يا استاذ ازهري و دامت كلماتك النبيلة
استاذ يا استاذ
وهكذا يكتب الشعر
رائع يا استاذ أزهري… همنا الراهن بلغتنا المنكورة .. لغة الحاردلو وود الفراش وود ضحوية .. وأقرب الشعر للروح تحمله أخف الكلمات على اللسان.
إبداع
“بارينا العلب ولعبنا توم ان جيري”…علب عديل كده؟
هاهاهاها…عشان كده فى السودان بيستخدموا علب الصلصه كيزان فوق الأزيار !
يعني العلبه بتبقى كوز.
طالما هناك أمثال أستاذنا أزهري محمد علي .. فـ عمر الدوش ومحجوب شريف وحميد وغيرهم شعراء القضية المنحازين لشعبهم لم يموتوا. دعواتنا لك شاعرنا أزهري الله يعطيك العافية ويحفظك.
جميل كعاتك دائماً.
لك التحية أستاذ أزهري
كلمات مختصرة وموجزة ومفيدة
في انتظار المزيد من إبداعاتك أخي أزهري
ليتهم يفهموك :
أخاف عليك من حادث مثل حادث حميد … قلمك رصاص في صدور أهل الحكم
الشعب يتفاءل باسمك يا ( أزهري )
النصر بعد الله بامثالك ايها الوطني الغيور
استاذ بطل شجاع لماح ، يزيدك علم وعافية.
رائع جدا استاذ ازهرى..
تفرق عننا الهم وتزيل الغم بي حلو النم يا شاعر الحقيقة يا الصوتك صداهو بعيد محال يتلم
شكراً أستاذنا الجليل ازهري محمد علي قائد دفة الحلم الفسيح والبيت الوسيع.
تقدري وأحترامي،،،
روعه كلعاده استاذ ازهري
أخاف عليك أخى أزهرى من هؤلاء (الأوباش) لأن شيمتهم الغدر والخسة والنذالة.الله يحفظك أخى يا مبدع وداخرنك ليوم جميل يوم الفرحة الكبرى بالأنعتاق من أستعمار(العلب).
الجقور بريئة براءة الذئب من دم ابن يعقوب
الموضوع ببساطة شديدة جدا
الجماعة ديل اتفقوا مع الصينيين يعملوا العلب التى تقع داخل الماء في النيل
وقالوا ليهم الباقي بتاع الارض اليابسة ده عندنا شركات ( وطنية) بتعملوا وجزاكم الله خيرا
اها الشركات ( الوطنية ) دي كان مفترض تعمل اربعه علب صبة بمداخل الكبري من الجيهتين
اها قامت ما عملتهم وجابت تراب ساكت كبته وعملت من فوقه الاسفلت على طول
وقامت الشركات ( الوطنية) شالت السيخ والاسمنت بتاع العلب المفروض تتعمل في الارض اليابسة وشالته
وتحول الى بناء قصور وعمائر وفلل في بعض الاحياء
اها قام جاء الفيضان جرف الردميات مما هدد فصل جسم الكبري عن اليابسة
يعني ممكن تجي ساي عربيتك جمبلق تلقى نفسك عائم في الموية
اها الجماعة هسي دايرين يعملوا صبات لتصحيح الوضع
والخوف نفس الحكاية تكون اتعملت في كبري المك نمر وتوتي وخلافهم
لكن الجقور ماليها ضلع في الموضوع وبهتت افكا في الموضوع
الجقور بريئة
الاخ ازهري لك التحية وانت تناضل ضد نظام الدجل والشعوذة والسرقة المنظمة . في كل قوانين الدنيا يضمن المقاول و المهندس ما يحدث من تهدم أو خلل كلي أو جزئي فيما أقاماه من منشآت ثابتة وذلك خلال عشر سنوات من وقت إتمام الإنشاء . فكبري المنشية تم انشائه سنة 2006 يعني لم يتم عشر سنوات بعد ، فلماذا تهدم ؟ ولماذا لم يطبق شرط الضمان العشري ضد الشركة التي انشئته ؟ اشعر ان هذا الكبري قد حدث به تلاعب كبير من جانب المتنفذين من الحكومة ، فهم ما عندهم شغلة غير العمولات التي يؤخذونها من الشركة المنفذة . ان كبري المنشية لاكبر دليل على فساد الحكومة وفساد منسوبيها
يا ود محمد علي الجقر ساي حقروبو
حملوهو الغلط درعا ملبس فوقو
عارفنو مو غلطان
وهم أهل الغلط بس ما عرفو وين يجولوبو
وكيف يخلصو منو عاد الشريف بقلع توبو؟!
تسلم ياابني يالك من مبدع …اني أرى فيك شاعر الشعب محجوب شريف له الرحمة والمغفرة
ازهري الوطن
الوطن موجوع
لك التحيه ازهري