فشل كلوي (مقال ساخر)

فشل كلوي

د.حامد موسى بشير
[email][email protected][/email]

( لقد أصيب السودان بالفشل الكلوي يا سادة … )
هكذا أعلنها صديقي المتشائم ، المستاء والحانق دوما… فقلت له :
– ما للدرجة دي .. ما تبالغ ياخ
قال لي :
– إنت مش دكتور ؟ عليك الله قول لي أسباب الفشل الكلوي
فكرت قليلا وأجبته :
– أولا إرتفاع الضغط
– بس.. عليك الله الضغط الفينا ده شوية ؟ نلقاها من وين ولا من وين ؟ ياخ نحن مضغوطين من أي حتة ومن أي حاجة والله الضغط العلينا ده لو في جبل كان انفجر .. أها وتاني ؟
– مرض السكري وإرتفاع السكر لفترة طويلة
– بس… عليك الله السكر ده ليهو كم سنة بيرتفع ؟ السكر براهو ؟ دي أي حاجة في البلد مرتفعة .. وأي حاجة بترتفع في البلد دي ما بتنزل تاني إلا الطيارات ، وديل ذاتم بقو يقعو.. أها وتاني ؟
– الجفاف الشديد
– عليك الله نحن ما مجففين ؟ عندنا أطول نهر في العالم ونص البلد عطشانا .. ها تاني؟
– زيادة المواد الفاسدة في الدم
– ههههههههه عليك الله فساد زي العندنا ده لاقاك في حتة في العالم ؟ .. قول قول تاني ؟
– إنسداد الشريان الكلوي أو مجرى البول .. يعني تكون مقفلة من كل الجهات :
– عليك الله ما شايفة مقفلة كيف في وشنا ؟ أها وتاني
– المناعة الذاتية
– يعني شنو مناعة ذاتية ؟ معليش أخوك حمار
– يعني قوات الجسم تجن وتبدأ تهاجم في الجسم ذاتو
تلفت حوله بتوتر ، ثم همس :
– خلينا من دي … أها وتاني؟
– نقص الأوكسجين الحاد
– هههههههه عادي .. عادي .. شوف غيرها
– الإنحلال الدموي الحاد
– عليك الله إنحلال زي الفي دولتنا دي في الدنمارك لاقاك ؟
– أنا ما مشيت الدنمارك قبل كده
قال لي منتصرا :
– قلت ليك ده فشل كلوي عدييييل
– أها طيب نعمل ليهو شنو ؟
قال لي :
– تعال معاي نشيلو نوديهو للغسيل
وهكذا حملنا وطننا الفاشل كلويا وذهبنا به لمركز الغسيل الكلوي وللأسف وجدناه مغلقا لأن الماكينات معطلة والعمال مضربين لعدم صرف مستحقاتهم ، فقلت لصديقي مذعورا وأنا أنظر للسودان الشاحب المريض الذي هزل جسده ، وأرتفعت درجة حرارته :
– البلد دي حتضيع ، الحل شنو ؟
قال لي صديقي وهو يبصق السفة :
– إنت الدكتور ، إقترح لينا الحل ما دام ماف غسيل
قلت له بدون تفكير :
– تاني ما بتنفعو إلا الزراعة
إنفجر يضحك بهستريا من كلامي .. يضحك ويضحك حتى دمعت عيناه وهو يهتف :
– هههههههه ما قلنا كده من زمان لكنهم ماسكين لينا بترول بترول .. يلا خلي البترول ينفعو