«الغالي بغلاوته يضوقك حلاوته»..الترابي : عندما دخلنا لسجن كوبر في العام 89 كان الوضع افضل بكثير من الآن.. تغيير النظام يحتاج إلى «مهر غالٍ» من الشعب.. انتخابات جنوب كردفان مزورة زيها زي الانتخابات الفاتت.
حوار : أسامة أبوشنب – محمد سعيد:
رأى زعيم المؤتمر الشعبي الدكتور حسن الترابي ان الشعب السوداني يتعين عليه ان يدفع المهر غالياً لتغيير النظام القائم،لكنه ابدى خشيته من ان يؤدى التغيير غير المنظم والمرشد الى تفتيت البلاد،مبيناً ان سكان الاقاليم في دارفور وجنوب كرفان والشرق اصبحوا اكثر وعياً من ذي قبل للمطالبة بحقوقهم، وقلل في الوقت نفسه من المساعي الجارية من قبل الحكومة لاقرار دستور دائم في البلاد، قائلاً ان»من لايلتزمون بالقرآن لا ننتظر منهم ان يلتزموا بالدستور».
واعتبر الترابي في حوار مع «الصحافة» عملية المشورة الشعبية في النيل الازرق وجنوب كردفان غير ذي جدوى «وكلام فارغ ساكت»،مشيراً الى ان المجالس التشريعية التي ستقرها « هي نفسها مجالس منتخبة زوراً» ،كما انتقد الترتيبات الجارية لزيادة عدد ولايات دارفور ،وقال انها لا تعدو ان تكون مخارجة للمحاصصة ومنح وظائف ووزارات ارضاء لقبائل وجهات محددة».
وشدد الترابي على ان الشعب السوداني يتحمل المسؤولية الاكبر في التغيير،ويدفع مهراً غالياً ان كان يريد الحرية وان تكون له اسهم في الحكم وقال»الرخيص برخصته يضوقك مغصته والغالي بغلاوته يضوقك حلاوته».
فالى مضابط الحوار
«من لايلتزمون بالقرآن لا ننتظر منهم أن يلتزموا بالدستور»
– بعد اسقاط البنود الخاصة بالجنوب في الدستور تحدث البعض عن ضرورة إعداد دستور جديد آخر..بحكم انك رجل قانون كيف ترى مساعي تعديل بنوده الجارية حالياً؟.
* مقاطعاً: كلمة دستور دي ما تستعملوها..وانتوا ما بتعرفوا معناها.. قبيل قلنا ليكم ما في حاجة اسمها دستور.. قانون الأمن يعملوه هم قانون استثنائي ضد الحريات وضد البشر.. يركبوكم ويكسروكم بيه.. كلمة دستور ما عندها أي معنى… كلمة دستور كلكم ما بتفهموا ليها معنى بالعربي لو قلنا المرأة «دسترت» دي حاجة كويسة؟… الدستور عهد بين الناس معناه أن الـ40 مليونا يتعاقدوا على نظام حكم – وليس عهداً بين شخص واحد وآخرين… الـ40 مليونا تتم خيانتهم الآن.. فكلمة دستور – هؤلاء – ليست لديهم قيمة بالنسبة ليهم – هي زينة فقط… علم وموسيقى ونشيد وطني وما تعرف ايه… هؤلاء يتحدثون عن حريات وحقوق انسان في الدستور – هذا كله كلام فارغ – أنا أسألك.. أيهما أهم القرآن أم الدستور؟ ويجيب مواصلاً: القرآن طبعاً.. كل الناس يقولون ما لا يفعلون «كبر مقتاً عند الله أن تقولوا ما لا تفعلون»… كل العالم الاسلامي هكذا… يأكل ربا كله خمور الا ثلاثة أو أربعة بلاد.. يقول الله أمرهم شورى بينهم… كل البلاد الاسلامية عسكريات ودكتاتوريات… الله قال مشيئة حرة «حتى في الزول البطعن في الله ذاتو» ..يقرأ الاية «يقولون الله فقير ونحن أغنياء… يد الله مغلولة» ديل يقول لا… ممنوع أحزاب مافي…ياخي الله قال في حزب الشيطان «أولئك حزب الشيطان».. لا قال سجلوها ولا قال ما مسجلين«في اشارة الى المطالبة بالتسجيل لدى شؤون الاحزاب»… بس قال ما تنضم ليهم.. ابقوا مع حزب الله مع الناس التانين بس… الله قال للنبي «صلى الله عليه وسلم» المال العام ما تهبشه… ديل يأكلوا بالملايين وأنتم شايفين.. العمارات..و العربات.. هؤلاء القرآن ما عنده قيمة عندهم، تقول لي الدستور؟.
نحن حين نأتي كلنا كسودانيين.. نتعاهد ونتفق كيف نحكم أنفسنا… عندئذٍ أي كلمة حتكون عندها قيمة وعندها معنى وعندها ضمانات.. عندئذٍ نتناقش عبر الصحف والرأي العام كله يشارك.. ما يجو ناس متخصصين ليمرروا مصالحهم… هل هناك محكمة أو أي جهة تقدر تقول للرئيس جاوزت حدودك أو اختصاصاتك… أنتم تعرفون جيداً ان كل القضاء تحت السلطة.. المحكمة الدستورية تحت أمر النائب العام والسلطات الأمنية .
– أين المخرج اذن؟.
* المخرج في الشعب.. مسؤولية الشعب في النهاية.. الله يوم القيامة حيجيب الذين استكبروا ويجيب الذين رخوا ليهم وبركوا تحتهم… يوم القيامة الاثنين مع بعض تقلب وجوههم في النار «يقولون ليتنا أطعنا الله وأطعنا الرسول وقالوا ربنا أطعنا سادتنا»… اذن هم معاهم.. أكلمك النصيحة المسؤولية أساساً في النهاية ترجع للشعب.. المجرم الأكبر طبعاً بيأخد عقوبات أكبر.. لكن الشعوب لها مسؤولياتها…. هم يقولون مؤامرات أجنبية ومؤامرات ايه ما تعرف.. التغييرات التي حصلت في السودان.. في اكتوبر هل تمت بمؤامرات… هناك شعوب الآن غيرت حكومات.. الشعوب هي المسؤولة.. واذا هي متأذية فقد أذت نفسها.. جابت ناس سرقوا قروشها واموالها وظلموها وقسوا عليها واذلوها وأذلوا أبناءها وتركوا أغلبهم منافقين… يأخي نحن أيام النميري شفنا كل البلد بقت اتحاد اشتراكي.. يعني كلهم خلوا أحزابهم التي شبوا وقاموا عليها… لكن في اليوم الذي سقط فيه النميري لم يبق ولا واحد منهم اتحاد اشتراكي.. كله نفاق.. يعني كل الشعب تحول الى منافقين…
– لكن هذا النظام ليس كالاتحاد الاشتراكي.. ما وجه الشبه بينهما؟
.
* ياخي الاتحاد الاشتراكي كله جيش وأمن وتم تغييره بانتفاضة.. وأمامك سوريا الآن النظام يدفع بالدبابات.. والشعب برضو بيطلع… رغم أن جيشه عقائدي وبعثي و شيعي.. ويدهس الناس بالدبابات والرصاص.. الناس مارقة.. نعم هم يقتلون بالعشرات يومياً.. لكن المظاهرات لم تتوقف بل تتزايد.. الجيش الايراني… كان جيشا منظما وعقائديا وتم التغيير آنذاك.. الناس يجب أن تدفع المهر غالياً… أي حاجة في السوق غالية تشتريها بقروش غالية.. والرخيص تشتريه رخيص «برخصته يضوقك مغصته والغالي بغلاوته يضوقك حلاوته» …اذا أردتم حريات وتكون لديكم اسهم في الحكم …ما ضروري تكون وزير.. لكن لازم يكون عندك رأي.. ورأي له قيمة.. لذلك الناس لازم يدفعوا ثمن وثمن غالي.
-المشورة الشعبية في النيل الأزرق وجنوب كردفان برأيك الى ماذا ستفضي؟.
* ده كلام فارغ.. أنا زول قانوني ده تضليل… مثلها مثل الحريات وحقوق الانسان التي يتمشدقون بها.. الانتخابات في جنوب كردفان… زيها زي الانتخابات الفاتت كلها مزورة.. والمشورة الشعبية حتجيزها مجالس منتخبة زوراً… هسع المجلس الوطني بتاعهم ده… تمشي ليه أي شئ من الرئيس يصفقوا ليه.. بكره يتغير الرئيس كلهم يبقوا ضده… أما المراقبون الدوليون كانوا دايرين فقط يعملوا ليهم استفتاء الجنوب رغم انهم يعلمون جيداً ان الانتخابات مزورة.
– هل تعتقد أن المعارضة قدر التحدي الموجود؟.
* يجب الا ننظر للاحزاب الحالية الآن… مرة فوق ومرة كده… ما ثابتة …لكن يجب أن تنظر لارادة الشعب.. والشعب الآن مهيأ… واذا الشعب يوماً أراد الحياة لابد أن يستجيب القدر… لكن كل زول الآن عايش عيشتو براه… يقولوا النظام سوا لينا كبري وخزان وما أدراك ويقولوا ما عندنا عوجة… خلاص رضيانين.. الشعب في كل السودان داير تعبئة… وتتعرض لمخاطر شوية يجب أن يعرفوا أن كل الناس ما بموتوا ولكن قد يتعرض البعض لرصاص وسجون.
– لكن أي تحرك في الوقت الحاضر قد يؤدي الى تفتيت السودان؟.
* نعم هذا خطر حقيقي.. اتفق معك تماماً… هناك من يقول ان الحكومة عندها قوات دفاع شعبي وعندهم سلاح… ويقولوا أي محاولة لتغيير النظام كلنا حنروح في ستين داهية.. هذا كلام فارغ حقيقة أنا خايف من الكلام القلتو انت… لو ماكانت العملية منظمة ومرشدة ..الانتقال من هذا النظام ستكون آثاره مدمراً تفتيت البلاد.. ونحن رأينا ما حدث في افغانستان كان في ارادة ولكن لم يكن التغيير منظماً.. يجب أن يكون هناك نظام عند التغيير… السودان كله أصبح واعياً.. ناس دارفور دايرين وليهم مطالبهم، وكذلك جنوب كردفان، النيل الازرق والشرق…ذهاب الجنوب هو أكبر مأساة في تاريخ السودان.. ما ممكن زول يقطعوا كراعيه الاتنين ويقول انه طلع من المستشفى متعافي وكويس واعتيادي.
– كيف كان وضعك في السجن؟.
* حال السجن الآن اقل ما يمكن ان يوصف به انه متخلف?انا قضيت اكثر من 12 عاماً متفرقة في السجون..عندما دخلنا لسجن كوبر في العام 89 كان الوضع افضل بكثير من الآن?لم ار في حياتي شيئاً تدهور مثل السجن..كنا في تلك الازمان نصلي جماعة في السجن?التلاوة في جماعة ..اما الآن حتى الصلاة جماعة منعوها..وحين تصلي يجب الاترفع صوتك?حتى لايعرفك احد..في فترتي الحالية التي قضيت فيها قرابة الاربعة اشهر لم أر وجه جاري في الزنزانة اطلاقاً والى ان خرجت لا اعرف من هو..فقد منعت في اول الامر من كل شئ الى ان جاء نائب مدير جهاز الامن وهو من جنوب السودان وسمح لي بالكتب والقلم والتربيزة?اقول ان السجن الذي هو اصلاح وتهذيب..يقوم بدور عكسي الآن..ما يسمون بالاحداث يدخلون «الاصلاحية» يمكن في عملية سرقة صغيرة ..يصبح بعد ذلك» مجرماً خريجاً».
الصحافة
عايزين راسك قبل راس تلاميذك قربان لهذا الوطن المنكوب بضيوف اتونا من غرب افريقيا واكرمناهم وقعدناهم في بلدنا ودي النتيجه بعد ما نخلص من الكيزان مفترض نكون مليشيات شماليه لتطهير البلد من الاوساخ المتراكمه من فترة الاستعمار والي الان
اخر من يتكلم عن الحريات والشرعية فانت اول من دوست عليهما بانقلاب مشووم استهل عهده بالاعتقال والتعذيب والقتل والتشريد والارهاب واشعال الحروب وباركت زفات عرس الشهداء فمن لديه القدرة لتصديق انسان بمثل خبثك وانتهازيتك وقذارتك ، فهل نسيت ايام دفاعك عن النظام ونفي تهم التعذيب وخرق حقوق الانسان واعتراضك علي مصر لاستضافتها المعارضة ، فيا ترابي لو سقط لن تفلت من العقاب صدقيني فقد ارتكبت الجرم الكبير في حق السودان والسودانين، فانت المسئول عن جريمة نحر ال28 ضابط وقتل الطلاب وتعذيب الناس وتشريدهم وجعل الناس تحس بالخوف وهي في بيوتها ، ولك يوم.
كبيرهم ده أظنو حرقتو انو الناس ما عملت ثورة ومظاهرات عشان يمرقوه فمرقتو بتو
عشان كده فضى الفي بطنو كلو والايام الجايه بيتحول القول لفعل
الكلام عين الواقع مع الحذر لأنه صادر من ثعلب الإسلاميين
وشدد الترابي على ان الشعب السوداني يتحمل المسؤولية الاكبر في التغيير،ويدفع مهراً غالياً ان كان يريد الحرية وان تكون له اسهم في الحكم وقال»الرخيص برخصته يضوقك مغصته والغالي بغلاوته يضوقك حلاوته».
============================================================
المهر الغالي للحرية هي النفس البشرية.
دعوته ليموت الشعب السوداني في الطرقات ليجلس هو وذمرته في كرسي الحكم ومن ثم يتعرض الشعب لقوانين إسلاموية مشوهة وجلد للنساء وفساد وقتل المعارضين.
لا أنت ولا هؤلاء ولا أولئك الشعب بمشيئة الله سيقرر من يحكمه !!!
و الله و و الله و و الله لقد سمعنا ل……..سياسيا حتى اصابنا الخنا و شهدنا دعارة سياسية حتى قرفنا، لكن مثل ما يأتي به هذا العجوز الفاني لم و لن نسمع به او نشاهده بتاتا.
في الدولة المدنية التي ننشدها يا هذا الدستور و القانون اهم لنا كدولة من القران و من شرعه، القران يخص كل فرد تعبدا لله و اما ذهابا الي الجنة او دخولا الي النار، و الدستور و القانون هو ما يتفق عليه كل المواطنين باختلاف توجهاتهم و عقائدهم و نحلهم لحفظ المصالح المشتركة و الشخصية و يعطي كلا حقه في الدولة (أتسال ماذا درس هذا التراب في السوربون؟). ثم ان الشعب الذي تتحدث عنه مرة تصفه بالتخلف و مرة تعول عليه في احداث التغيير، هو نفس الشعب الذي خططت انت بليل و معك بعض الرجال البلهاء و سرقت سلطته التي انتخبها، لماذا تريدهم ان يغيروا لك النظام الذي صنعت انت رموزه و وضعت لهم الخطط و الدساتير و القوانين لاذلالهم و اهانتهم حقدا من عند نفسك مع ان جل الشعب السوداني لم يزاملوك في مدرسة حنتوب، فلماذا فعلت بهم و تفعل ما فعلت؟.
أيها السودانيون الشرفاء لا تسمعوا لهذا الدعي الافاك و ان كانت لكم ثورة تنشدونها ضد الحكم القائم، أسالكم بالله ان ترجئوها حتى يأخذ الله هذا الكذاب الاشر المنتن.
يا أخينا الترابي .. بالله فكنا من كلامك الجذاب و الرنان وا لأجوف العامل زي جرس المدرسة .
خلاص ياحكيم التعليم والتربية والأخلاق … ؟؟؟
خلاص يعني كملت الحكمة والتربية والأخلاق والقراية وجاي تعرض لينا وتبشر في الناس الغلابا والمساكين ؟؟؟
يعني إنت اللي بتعرف العهود والقرآن ؟؟ , لو بتعرف العهود كنت وافقت على انقلاب 89 , وخنت عهود الديمقراطية ..؟؟ ولا ح تقولينا إنو ماقبل 89 ماكانت في ديمقراطية ؟؟؟
نحنا الشعب حنطلع في ثورة … دا كلام صح ومحتوم ..
لكننا حنطلع مش عشان نجبيك تاني .. شيخ يبكي في البرلمان
حنطلع في ثورة ياترابي , عشان نقش الوساخة اللي سبتها وراك …نقصد علي عثمان , نافع , قوش , الجاز, البشير, برلمان المهرجين , التنظيم الخاص , و جهاز الأمن …
يازول خلاص دورك التاريخي اكتمل واستعد للخمول الكوني الذي سيلف سيرتك ولن يرفعها لك الناس بالخير والفضل أبدا حتى بعد مماتك .
سيقسو عليك التاريخ حتى لو ساهمت في كتابته . لماذا ؟
لأنك انسان شخصي ومؤلف وكذاب ومنكب على الذات وبتاع اختراعات مدمرة .
أنت رجل قانون وحقوق ودستور . هذا صحيح . ولكنك رعيت انتهاك القانون والحقوق لأكثر من عشر سنوات ,
انت قاضى صحيح . ولكنك حبست العدالة عن الناس حتى تركب عليهم بالسلاح والقهر باسم الإسلام وباسم جهاز الأمن . إنت من عينت نافع وقوش وعلي عثمان وجبت البشير . مش كدا ؟؟
لن يغفر لك أحد . ولا ترجو مغفرة لأن الضرر والحقوق الضائعة أكبر من تصوركوأفظع من خيالك .
نعرف أن هذا الكلام سيفرح ويبهج صراصير الإنقاذ الذين يحكمون السودان الآن من وراء أباريق الحمامات ,والذين يرغبون أن ينسى الناس انهم كانوا اسلاميين .
نعلم أن هؤلاء الصراصير الفاسدين يكرهونك أكثر مما نفعل . لأنهم يخافون ماضيهم الفاسد معك. وحاضرهم الفاسد ضدك. وبالمقابل أنت أيضا تحتقر ماضيهم معك وتكره حاضرهم ضدك , فقط لأنهم خانوك على شريعة الفساد والقهر والإنتهازية وخيانة الشعب عبر الإنقلاب عليه .
هذه كل قصتك ياترابي … وما تلفلف وتدور .
أنت فضيحة يا ترابي .
لماذا يعتبر الناس الأنسان الكائد ذكي وعاقل ؟؟؟
أنت متآمر وكأئد ولست ذكيا . إذا كنت ذكيا فانظر الى عاقبة ذكائك . ماهي ؟؟
عاقبة ذكائك يا كائد , سودان ممزق تحت مشروع استقطابي احادي معزول من الطبيعة الإنسانية السوية , مشروع محجوز في مستشفى الإدانة الأخلاقية والدولية بتهمة الجنون والهوس والعنصرية والإبادة الجماعية .
لو قلنا انك مؤلف ولك كتب عن الإسلام , فأنت كذلك في الكذب فقط .فحتى الكتب التي كتبتها لو جلسنا لإنتقادها لوجدناها أسوار عالية من الكلام المرصوص الملتفت الى الحضور الشخصي والذاتي لك وحدك , مجرد كلام لا يمس تجربة الإنسان ولا يحترم نوعه ولا مستقبله .
أنت فضيحة ياترابي . ولكن المصيبة أن بعض من هذا الشعب المتعب ما زال يتابع حماقاتك .
تريد للناس ان يدفعوا الغالي من أجلك يا كذاب يا مؤلف .
طزز في افكارك
طزز في تاريخك
طزز في فصاحتك وبلاغتك .
طزز في تلاميذك وأولهم علي عثمان ونافع وقوش وكمال عبيد.
طزز في طموحك وأوهامك الذي تخطط لها ان تتجاوز عمرك وتخترق الفضاء .
طزز في مستقبلك وماضيك .
باختصار كدا …
طزز فيك .
ومن الدى انقلب على الدستور فى 1989
لا تنهى عن خلق وتاتى بمثله
الثمن للتغيير لن يكون غاليا وسترى بام عينيك
النظام يحمل عوامل فنائه فى داخله ولن يحتاج الى جهد وهو ليس باقوى من النظام المصرى او نظام الشاهنشاه فسيخر كالفيل امام شعب له القدح المعلى فى اسقاط الطغاة
وان غدا لناظره قريب
أيها الدجال أخيراً تتحدث عن معنى الدستور وأنه عقد لكافة المواطنين ، أين هذا الكلام عندما طبخت وعجنت دستور عام 1998م… والله العظيم أمثالك اذا لم يقدموا للمشانق سوف لن يهنأ شعب السودان ابداً… شخص ينقلب على الحريات ويأتي اليوم ليطالب بها . فتأمل؟؟؟؟ اللهم اذل الترابي وأعوان الترابي وارنا فيهم يوم كيوم فروعون.
l( ما اريكم إلا ما ارى )) فالانتخابات مزورة -والسودان اسوأ بلد في الدنيا لان حضرة الترابي بعيد عن كرسي السلطة –
هل الترابي يلتزم بالقران ؟؟ ؟؟؟؟؟؟؟؟
ن شاء دى كلو يجيب ليك عقل تراجع بيهو نفسك .. منم سجنك وعذبك حاليا هم تلاميذك وطبقوا فيك ما تم تطبيقه وانت أعلى سلطة فعلية من خلف البشير .. ذوق قليلا من الذل الذى تلقاه السودانين من نظرياتك ومؤامراتك ومكيادتك السياسية وربنا يفكنا منكم ومن بلاويكم يا تجار الدين السياسي
( فقد منعت في اول الامر من كل شئ الى ان جاء نائب مدير جهاز الامن وهو من جنوب السودان وسمح لي بالكتب والقلم والتربيزة)
يعنى فى كل حوار تفضح الراجل عشان الجماعة يتعشو بيهو مش كدى؟ ……… وانت ذاتك الاهبل التانى …… طالما تلاميذو ما ادو قلم انت مالك؟ اها ……. الراجل ياهو ضيعك ……. عشان تبطل الطيبة الزائدة ……. هسع مش طيبتنا دى الخلاهم يفرتكو البلد ولسع قاعدين.
هل هذا الشخص تغير ام فقط يدعى التغيير
من الذى اتى بهولاء المجرمين اللصوص الذين لم يسلم منهم احد . حتى بن لادن سرقوا امواله باسم الدينز هل نسى السنيين التى سبقت المفاصلة والتى نكل فيها الشعب السودانى. الوضع اصبح خطييييييييييير حتى اخوك اصبح يستحل سرق اخيه . لا حول ولا قوة الا بالله
ولازم يا شيخنا انتم قيادات الأحزاب تدفعوا الثمن وتكونوا في المقدمة وقبل دة كلوا انتم فقط من يتحمل مسوؤلية تعبئة الناس وتوعيتهم
رأى زعيم المؤتمر الشعبي الدكتور حسن الترابي ان الشعب السوداني يتعين عليه ان يدفع المهر غالياً لتغيير النظام القائم
يا جماعة الشيخ عوزكم تكونوا كبش فداء حتى يتربع على عرش حكم السودان , زي ما سوى مع المجاهدين في الحرب مع الجنوب
نقول هذا الموهوم ان الشعب السوداني وعي الدرس ولن يموت لأجلك امثالك بعدما ما تأكد من كذبك منذ المفاصلة بينك وبين ابناءك الذين لفظوك خارجا من خارطة العمل السياسي والمواقع النافذة في الدلة
الله يطهر السودتن من امثالك وأمثال عيالك الاطاحوا بيك
الثورة الحقيقية تحدث بشكل تلقائ دون التحريض لها ،،،لاحول ولا قوة إلا بالله ،ما الذي حدث للعقلاء
تسوي بإيدك يغلب أجاويدك
نرجو ان نغفر ونسامح. الكافر اذا اسلم لا يسال عن معاصيه قبل اسلامه. والشيخ ذكر اكثر من مرة انه تاب ولن يدعم اى انقلاب عسكرى مستقبلا . ويتحدث كانه واحد منكم. دعونا نغسل ما ران فى قلوبنا ونسامح ولتتحد المعارضة يمين ويسار حتى نستطيع القضاء على الانقاذ.
مسطول اتزاعل مع ابوه فطرده من البيت …راح علي المقابر وحط صورة ابوه وكتب عليها >>\
coing soon
الانتخابات التى ادخلتك البرلمان كانت نزيهة ؟؟؟؟؟
انتبه لنفسك وتوب الى الله فى ماتبقى من عمرك
الترابي ده يقفل…. لأنه هو الي طلع لينا الجني ده من القمقم. راجل جاهل لكن يبدو فعلا أن الأعمى في بلد العوران ملك. راجل خبيث حقود لا تزال تحركه النرجسية وحب السلطة ورغبته في الانتقام ممن شيلوه القفة. هؤلاء الناس كلهم على بعضم حيوانات منقرضة انتهت فترة صلاحيتها وسيذهبون هباء كما الزبد ويبقى في الأرض ما ينفع الناس. الواحد حاسس بنفسه عايز يستفرغ.
الترابي على راس قائمة من نطالب بالقصاص منهم عندما يزول هذا الكابوس. يأتي بعده مباشرة على عثمان طه، ثم البشير، ثم نافع، ثم غازي صلاح الدين، ثم عبدالوهاب الأفندي، ثم قوش، ثم وزير الدفاع الأهبل ده (من كتر ما هو نكره لمن نسيت اسمه). واسمعوا جيدا من الآن ما في واحد يجي يقول لينا "عفا الله عما سلف" ولا بتاع العبارة دي ما عايزين نسمعها تاني بالمرة.
من الأحياء من نظام نميري نطالب بالقصاص من ابو القاسم محمد أبراهيم وكل من شارك في انقلاب 25 مايو.
التسامح الأكثر من اللازم ده هو الي خلى المصريين يطلقوا علينا عبارة "يا سوداني يا طيب" وهي من مترادفات عبيط بالنسبة لهم.
ومن الان خليكم صاحيين كويس لموضوع قسمة مياه النيل الجديدة، اي اتفاق يخل بمصلحة السودان سوف نعتبره خيانة عظمى عقوبتها الاعدام، واي تنازلات عن قطرة واحدة من نصيبنا في مياه النيل من أجل مكاسب سياسية سوف لن نرحم من يوقع عليها.
الترابي ينتقد تصريحات المهدي ولكن الترابي يلحن اراء المهدي !!!!!
اليست هذه نفس المحاذير التي يخشى من حدوثها المهدي ؟
Torabi, you are the mastermind of what is happening to Sudan judiciary since 1983 till now:mad: :mad:
انتو ياجماعة الراجل ده نسى شنو وماعملوا فينا ايه رايكم نديهو فرصة اخيرة ونعرف النساهو شنو وماعملو؟؟؟
(ما مىدانيم يك روز مىايد اقاى ترابى وبشير ونافع وعلىدستكيرمىشوند)كلكم لصوص وحراميه
انت كبيرهم الذي علمهم السحر ..انت من يجب رجمه في اكبر ميادين الخرطوم ايها المنافق الضليل ..لست افضل منهم بل هم تلاميذك نهلوا الفساد منك و تعلموا منك علوم اللصوصية و الانحراف ايها المنحرف المأفون
هوي هوي يا زول خلاص طلعته الله يجازي شيطانك:eek: :confused:
يا جماعة الوضع حرج للغاية
انفصال جنوبنا الحبيب
انفصال يلوح في الافق لدارفور
غلاء فاحش لأساسيات المواطن من السلع التموينية
ومحسوبية لأهل التمكين على عينك يا تاجر
يبقى بعد كدا البلد ح تكون -الجمهورية التي كانت إسمها السودان-
يا نكون قدر التحدي أو نستاهل البحصل لينا بعد داك
مافي شيء مجاني
انا ذاتي بكره الترابي
لكن الوضع الراهن يتطلب التكاتف مع جميع الاطراف
مش الترابي براهو
حتى لو لقينا صلاح قوش ينضم للمعارضة في الوقت الراهن ما عندنا مشكلة
يجب أن نسمو فوق جراحاتنا في فترة النضال
وبعد كنس المؤتمر الوثني
كل زول بحسابو
والغلطان يدفع التمن
كل هذه المشاكل من تحت راس هذا الترابي وهو يقدم نفسه كمن بيده الحلول ويعتقد ان الشعب في انتظاره فهو المهدي المتظر لهذا الزمان .
الترابي هو من خلق كل هذه المشاكل في السودان وكانت تجربة الحكم في السودان هي من واقع نظرياته والتي اعتقدانها ستخلق سودانا كما في مخيلته 0
ولكن نظرياته فشلت فهي كانت نظريات ليست قائمة على التحربه 0وعندما فشلت مشاريعه وكان اول الفشل خروج تلاميذه عليه .فبدا ان يقدم نظريات جديده
فالشعب في فكر الترابي هو حقل تجارب متناسيا تجربة الدوله فيمن حكم قبله
وكل الدعوات العنصريه والعرقيه والعقائديه صنعها الترابي والان يتنكر لها 0
To Hadeed, It is not wrong to disagree with Alturabi or anybody else, however, in your commentary you have used some trivial words like (Tuz) . If you are unable to censure the people in avery polite way or showing behavior that is respectful and considerate for other people, then avoid getting engaged in politics and in such case you would have done favor for the commentators .
When you were in power for ten years, we never heard you mentioning phrases like, freedom, justice and equality , so, what is your true motivation this time ?? I believe you just seek revenge ,,,nothing more or less
الاخوة الكرام : زورونا ..
http://www.facebook.com/pages/ظ?ط¹ط§-ظ?ط¹ظ?ظ?ظ?ظ?ط¯ط©-ط§ظ?ط·ظپظ?ظ?ظ?ظ?ط©-ط§ظ?ظ?ظپظ?ظ?ط¯ط©-ط¨ظ?ظ?ظ?ط§ظ?ظ?ظ?ظ?ظ?ظ?ظ?ظ?ظ?ظ?ظ?ظ?ط©-/179492245431263
sahih elekhtasho mato
واجهت الحكومة ضغوطا شديدة من منظمات ومن جهات مؤثرة لاخراج الترابي
اولهم الماسوني الاكبر القرضاوي
نبشر كل الثوار السودانين بحال حدوث الثورة سيكون هو قائدكم(الترابي) سارق الثورات
الترابي الذي اباح زواج اليهودي والنصراني من المسلمة مثله كمثل الطالبان تجار الخشاش الذين لم يجدوا دليلا في القران يحرم الافيون والهيروين والبنقو
الترابي الذي قال لابيه انا افقه من الامام مالك سوف تجدون منه فتاوى تشيب الراس
الترابي مؤلف الكتاب الاسود وهو راعي العنصرية والجهوية والقبلية ولن ننتظر منه خيرا
اللهم قد بلغت اللهم فاشهد
الله يشفيك ياشيخنا من مرض العظمة. ومرض السلطة. عايز تضحي بالشعب من اجل الكرسي. حرام عليك. اعمل ليك عمل لا اخرتك. قبل مماتك. بحكم انك اسلامي,,,,
والشعب السوداني وعي الدرس بتاعك كويس. يعني شوف غيرة. قال تضحية. لمين التضحية لسعاتك ولا للوطن. اسمح لي بان اقول لك انت مرييييييييييييييض. نسأل الله الشفاء العاجل لك.
والله الناس دى مفروض يرجعو للخلف ويقرأءو فى مدارس السياسة من جديد ياجماعة الرجل خرج من النظام قبل 10 سنين يعارض الحكومة بالمكشوف بدون خوف وتلاميزو الما فهمو منه درس السياسة ماصدقو بقو حكام يتخبطو بالبلد يمين وشمال وشطروه الى قسمين والحقيقة الترابى فعلا كان غلطان جمع شلة مشاغبين ومستهترين رباهم فى الجامعات وتعلمو البلطجة وطبقو النظرية فى المواطنين بعد أقصائه والترابى أدرك وعرف غلطتو أنه كان يتعامل مع مشاغبين قدارين الان هو بصلح الغلط الذى لحق به نحن نظن فيه خيرا يقف معنا لتغير النظام وهو أدرى منا فى تعرية النظام والسياسة ويمكن يكون ليه تأثير كبير فى التغير أحسن من باقى الانبطاحين للنظام وراء مصالحهم الخاصة . والله انا شايف الترابى أرجل واحد من كل الكبار ويتحدى الحكومة ما نقعد للجعجعة دونما نملك أرادة مقاومة لو كنا رجال فعلا خرجنا الشارع ضد النظام لكن للأسف إنبطحنا تحت أرهاب رجال الامن خوفا من التعذيب والاغتصاب وحادثة الاخت صفية ليس ببعيد أغتصاب على عينك دون خوف من أى عقاب وهل نحن فعلا رضينا بالإهانة ونحن الان محتاجين أى واحد عنده قوة يقف معنا للتحرك ضد النظام . وإلا نقعد نكرر فى سيق قديمة أكلها الزمن ونطيع الوقت ويستفيد منه الانقاذين وعامل الوقت مهم جدا لنا نكون واقعين ياناس …. والله من سبيل القصد