النسيان في الأغنية السودانية.. انكسار وكبرياء وحزن…. “قالوا لي أنساهو”

الخرطوم – أمانى شريف مزمل
يقال إن النسيان نعمة في بعض الأحيان للخروج من قمقم الحزن وأيقونة لاستمرارية العيش والتعايش مع الحياة وسط ظروف استجدت فعملت على تأليب الحزن داخل نفس صاحبها ولولا النسيان لدام الحزن ولصعبت الحياة معه.
والنسيان والتأسي ورد ذكره عند شعراء الأغاني السودانية وأكثر ما يكون عند من يمرون بتجارب عاطفية غير موفقة فتنقلب مجريات حياتهم رأسا على عقب ويجدون في كلمات هذه الأغاني سلوى وملجأ لهم وكأنها تقاسمهم المصير الحزايني والمتجول في هذه السوح يتأكد له هذا الحديث.
تحسر على الفراق
في مسيرة الأغنية السودانية ورد النسيان كثيراً وبرزت أغنيات التحسر على فراق الأحبة بكثرة ومن بينها (من حلاوة الريد وهمسو بكرة قالت لي ح تنسو) و(ما نسيناك جايي تعمل إيه معانا بعد ما ودرتنا) و(قالوا لي لأنساهو وامسح من خيالك ذكرياتو وانسى كل الماضي وابعد عن طريقو وعن حياتو) و(لو إنت نسيت أنا ما نسيت عشرتنا الأولى أيام جهالتنا زمن الطفولة) و(يا النسيتنا وما زرتنا نحن صادقين في حبنا) و(أنساني وأنا أنساك) و(بين الذكرى والنسيان مسافة قريبة يا إنسان) و(حكاية غريبة تنسى المحبة) و(آه أنا مانسيتو ودعت الحبيب وجفيتو).
عتاب الحبيب
وفي السياق توالت الكلمات الصادقة والمعبرة التي تمحورت في عتاب الحبيب على عدم السؤال عن محبوبه مثل: (عشرة الأيام مابصح تنساها كأنو ماحبيتن وكأنو ماعشناها) و(نسيان الريد عندك ساهل واكتر من كده تعمل زعلان) و(ما تنسى زول في الحلة إلا سلم عليهو وتبوس إيديه) و(قصة الريد القديمة بسألوني عليها ديمه كلما حاولت أنسى صحوا ذكراها الأليمة) و(بعيد ذكراكا يا ناسي) و(لو أنساكا إنت أكون غدار وخنت) و(أقول أنساك وعارف إني ما بقدر) و(يا ناسينا يا مجافينا حن علينا) و(لو بالصد كويتيني أو بالنار صليتيني بنساك) و(انساكي كيف وإنتي الأمل إنت الدعاش والسوسنة أنساكي كيف) و(يا النسيتينا وقلتي ما نسيتي يا زهرة السوسن) و(يا النسيت عهد الهوى يوم ما كنا زمان سوا) و(ليه ليه يا النسيت أيامنا ليه؟).
الوقوف على الأطلال
ونمضي في رحلة البحث عن النسيان حتى نصل إلى الوقوف على الأطلال على شاكلة (التأسى ما بنسى الا نفسي) و(والنسى لقديمو ضل) و(الناسيك يا قلبي أنساهو والناسيك يا قلبى سيبو) و(دايرة أنسى الذكرى ذاتا فينى تاواره ومعاودي) و(اصلو لو ما الناس بتنسى كتير بتنسى كانوا جنوا كانو فاتوا) و(ما بنسى ليلة كنا تايهين في سمر بين الزهور) و(ننساك انت انت بتتنسي؟) و(إن أنس لا أنسى ذكراك يا سلمى) و(اقول انساك وانسى شقايا لو قادر) و(انساكي كيف اقدر انا والشوق معاي عدا السنة) و(يانا الزمان يا ناس مالكم نسيتونا) و(بقيت ظالم نسيت الناس نسيت العشره يا سيد ريدي والإخلاص) و(لو كان الزمن نساك أنا مانسيت) و(رحلتوا بعيد نسيتوا الريد والحنان والعشرة الجميلة والسعد اللي كان) و(وانت نسيت أيام ما كنا نعيش الحب في عهدو الأول) و(يا النسيت أيامنا الضقنا فيها غرامنا) و(خلي كيف تنساها وفي الفؤاد ذكراها) و(صحو الذكرى المنسية من بعدك وين الحنية) و(نسيتني انا وخلاص يعني مافي طريق برجعني) و(لو استطيع أنساك لو ينفع النسيان).
ذكريات جميلة
ولن ينسى المحبون الذكريات الجميلة التي خلدتها الايام مثل: (أنا ما بنساك انت يا النسيت الناس) و(يا النسونى كفى أعرفوني) و(ارحم يا سميرى قلبي المانساكا) و(ناس ناسيانا من حنانا وريدهم بجري في دمانا) و(انا بحاول أنسى ريدك وانسى ماضي الذكريات) و(حاولت انساك وقلبي زاد في جروحو ورينى كيف الحي بودع روحو) و(ليكا رسالة لو روحك يوم تنسى دلالا) و(يا زمن علمني أنسى المحال نسيان عيونا) و(يعني نسيتنا خلاص مع إنك أنت الخليتنا نغني الحب ذكرى وإخلاص) و(ظلموني الحبايب وقالوا ليا أنسى) و(احاول مرة بس أنساك عشان يا غالية أتذكر).

اليوم التالي