عتود البرم كان ضبحو ما بزيل قرم وكان خلو ما بعشر غنم …
عتود البرم كان ضبحو ما بزيل قرم وكان خلو ما بعشر غنم …
ما يحدث هذه الايام، وتصريحات البشير وكركبة القيروانات فى البرلمان، كلو ما بجيب مريسة تامزينو . قبل سنتين بينما كان الناس يموتون جوعاً فى طوكر ويعانون فى شندى والنيل الابيض، افتتحت الانقاذ اثنين من اكبر المراكز الاسلامية فى الشرق الاوسط وربما الاكبر فى جنوب الصحراء . احدهم فى كافورى والآخر خاص بعبد الحى فى جبرا .
معتمد النيل الابيض كان يتكلم عن معاناة المواطنين وهو لابس ابيض فى ابيض افتكرتو انا باش تمرجى فى الحوادث . حتى الموبايل البيتكلم بيهو ماسكينو ليهو .
زمان لمن تدفع للناس فى الكشف ، وتجيك مناسبة الناس بدفعوا ليك الدفعتوا وزياده كمان . ناس الانقاذ ديل مافى زول ما عصروا ليهو . ناس باكستان العملوا ليهم جسر جوى ديل ما عاوزين منهم جسرين ، بس يدونا سقاله . ونشوف ناس غزه ولبنان. وديل ناس احوالهم حسه عال .
,,,,,,,,,,,,,,,,,,,,,,,,,,,,
هذا الموضوع خالينا بيهو ناس الانقاذ , ولا سمعوا ولا اهتموا ، قلنا نوسوس ليهم مرة ثانيه .
منقول …..
هذه الايام نمر بمحن المحن ، قديما في السودان كنا نقول الزول ده بيهضرب زي الراميه جمل ، البشير وحكومة السودان ، يصرحون ويقومون بأعمال يستعجب منها إبليس.
لم نسمع أبدا بحكومة دخلت في شكلة مع إذاعة . الحكومات المحترمة تتجنب مواجهات مع منظمات أو هيئات . وإذا كان عند حكومة السودان مشكلة مع الحكومة البريطانية فلماذا اقحام البي بي سي التي هي منظمة مستقلة من الحكومة . وليس هنالك حكومة متألمة من ال بي بي سي كالحكومة البريطانية وال بي بي سي متخصصة في شواء الحكومة البريطانية .
ومشكلة المعدات التي ادخلت بطريقة غير قانونية بواسطة ال بي بي سي إلي السودان لها سنتين . ولقد حسمت واعتذرت ال بي بي سي . ولكن يبدو ان الوزير الجديد يبحث عن بطولات وقد اضحك علينا العالم .
مستر مبارك (الشيوعي الآبق) والذي يمثل حكومة الانقاذ كملحق في لندن بدون مناسبة يبدأ يتحدث عن وقوف الحكومة البريطانية مع أعداء السودان والمتمردين علي الحكومة . بكل بساطة وضع سيادته المناضلين والشرفاء ومعارضي حكومة الانقاذ في خانة أعداء السودان . نشكره لأنه لم يصفنا بالخارجين عن الملة . والذين سينتهون في نار جهنم وبئس المصير .
البشير كالغريق لا يتمسك فقط بقشة بل يتمسك بأي شيء حتى بذبد البحر . ولهذا فتح موضوع دكتور علي الحاج حتى يحمله بعض مسئولية دارفور .
هذه ليست محنة بل هذه مسخرة . السؤال ليس هو هل أكل دكتور علي قروش السكر أم لم يأكلها . السؤال لماذا أدخل دكتور علي في السكر ؟ مما نحن صغار بنسمع وبنغني :
واحد اتنين سرجي مرجي . انت حكيم ولا تمرجي .
أنا حكيم بداوي الناس . من الحمة ووجع الراس.
العيان بديه حقنة . والجعان بديه لقمة.
يا عالم بلد متخلف تفتك به الأمراض يحتاج لأي داية أو بصير . ودكتور إخصائي دفعت عليه البلد دم قلبها . يشتغل في تجارة تغيير العدة “أديني كفتيرة أديك رطلين سكر” بمعني اعطني سكر اعطيك شارعا .
في الخمسينات كان للاستاذ ميسرة السراج سيارة تجوب العاصمة ونسمع بالمايكرفون : أعطني قرشا أعطيك مسرحا .
عندما أتت المنظمات العالمية في بداية الانقاذ وسألوا المسجونين السياسين عن احتياجاتهم . قال لهم الدكتور خالد الكد رحمة الله عليه : هذا هو السؤال الخطأ السؤال هو لماذا نحن هنا ؟ .
السؤال الآن ، السودان من أكبر الدول العالمية مساحة ويمكن أعرق حضارة في العالم . هل السودان ده انقاية ولا مترة ؟ عشان يخلوا فرد واحد من أمثال علي الحاج يتصرف في مصائر الآخرين .والسكر ده لمن أدوه لي دكتور علي الحاج ختاه في دحلوب ؟ ولا عباه في كباكا ؟
علي الحاج ده مش سيد القصر العشوائي في فترة الديمقراطية ؟ والذي اوصل الكهرباء لمنزله من الجامع لأن كهرباء الجامع مجانية ؟
ألم يستورد الأسمدة الفاسدة لحكومة الصادق المهدي ؟
وهاجمته الصحف إلا أنه كان محميا بالترابي الذي كان ولا يزال يتحكم في الصادق المهدي .
ان صلة علي الحاج بالسكر وبناء الطرق مثل صلتي أنا بجراحة الأعصاب . ولماذا يقبل علي الحاج السياسي والزعيم والاخصائي بمهمة إعمار وإنشاء ؟ .
البشير يحب أن يصرف الأنظار عن مشكلة دارفور ، وتفسيره واتهامه هذا زي عتود البرم ، كان ضبوحوه ما بيزيل قرم وكان خلوه ما بعشر غنم .
منذ أن بدأت مشكلة المحكمة الجنائية البشير بقي زي الولد الخواف في مدرسة الشرامة لازم يدي حق الفطور عشان ما ياخد علقة .
جاب المصريين واكرمهم وصرف ليهم عربات . واتنازل لي مبارك عن حلايب . قاشر الافارقة بخصوص مياه النيل ووقف مع مصر . مسح جوخ للقذافي . دفع لي شاد . وأرسل مساعدات . ونسي موضوع طوكر بالرغم من الفيضانات والغرق والموت والجوع وكأن “توكر” ليست جزءا من السودان .
أرسل الولد مصطفي عثمان الي لبنان بمساعدات ومستشفيات متحركة . يرسل مساعدات وفلوس هبطرش للفلسطينيين . والمأكولات والفاكهة المعروضة في شوارع غزة ، الأغنياء في السودان عايزين درس عصر عشان يعرفوا أنواعها وأسماءها .
دي كلها جرسة . قالوا المافيه فايدة لي أهله ما فيه فايدة لي غيره .
طيب دارفور دي اصلو البشير مقاشرها وقال فيها مالم يقله مالك في الخمر . طيب شندي دي ما بلد البشير ، أهلو جعانين وغرقانين وقاعدين في الصقيعة . لماذا ترسل المساعدات لي باكستان ؟
باكستان دولة نووية ؟ أكرر .. دولة نووية. يعني تمتلك طاقة نووية ولديها قنابل ذرية.
متي ساعدت باكستان السودان ؟ وهل هنالك دولة في هذا العالم تمر بظروف أسوأ من السودان . فحتي رواندا قد انتعشت وانشأت فيها المدارس والجامعات والآن تمر بانتخابات ديمقراطية .
هذه محن المحن .
شوقى بدرى …
ازيك ياشوقى بدر الحجاى بما انك زول محنة وبتجيب الرايحة انت الخمج البعملو فيهو ناس الانقاذ ديل عندو علاقة بالماسونية وصحى كبارهم بنفذوا فى اجندة ماسونية ,لانو قبل فترة الهطله كرم الله والى القضارف ده قال هو مشى مع على عثمان اديس ابابا وسفره من هناك لتل ابيب –الناس ديل بعملوا فى شنو ياشوقى –والحاجات البتونسو بيها الناس كتيرة وليه لحدى اسه الامريكان ماعايزين يشيلوهم مع انى بتشالو فى طرفة عين بدون طلقة امريكية واحدة
الأستاذ شوقى بدرى شكراً للمقال الشيق فى قرائته و مليان فى محتواه , الناس ديل (الانقاذ) و ال معاهم ناس ظلنطحية ساى قايلين الحكاية فهلوة و غش و كذب و نفاق .. غشو الشعب السودانى منذ مجيئهم المشئوم فى 89 حينما ذهب شيخهم للسجن حبيساَ و الآخر للقصر حبيساً , و منذ ذلك اليوم الاسود ما زالو مستمرين فى نفس الكذب و الخداع مفتكرين الحكاية فهلوة و ذكاء منهم , لا يدرون بأن هذا الشعب الكريم الذى سرقوه و أفقروه و جعلوه متسولاً , لا يعى ما تفعله هذه العصابة .. الشعب السودانى شعب معلم شعب حكيم يقف من على البٌعد و ينظر لما وصلو إليه من انهم اصبحو وحيدين لا صديق لهم داخلياً و خارجياً , ينظر لنهايتهم المؤلمة التى تنتظرهم ..
يقولون بأن الضرب فى الميت حرام , هذه العصابة و جيشها الجرار من الطفيليين و الأرزقجية و عديمى الضمير و فاقدى الأخلاق لا يهمهم أمر هذا الشعب الكريم و معاناته اليومية , حيث أصبح اطفال العاصمة يتصارعون حول ما تحويه سلل القمامة و الكوش .
إن الذل و الإهانة و الإساءة التى تعرّض و يتعرض لها الشعب السودانى من هذه العصابة المتفلتة و من معاونيها لم يراها فى تاريخه الطويل , حتى فى حكم التركية السابقة و الاستعمار الانجليزى لم يمر المواطن بربع ما يلاقيه من هؤلاء الشرازم المريضة “حماة الدين” حسب زعمهم ..
و لكن هانت و سوف يريهم هذا الشعب الكريم بأن سكوته عليهم ليس خوفاً منهم و عندها سيأتى القصاص و العين بالعين و السن بالسن , و إن غداً لناظره قريب .
يا شوقى لا تضرسنا فالمثل هو عتيد البرم لا بزيل صرم لا بعشر الغنم – ولذلك لا تدخل فيما لا تعلمه حتى لا تفسده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يا السيد/عبدالله ، انت قليل المعرفة و الثقافة. الامثال يتم قولها و اعتمادها و من ثم يتم تناقلها و تدويرها و اخراجها بكلمات و صياغات تختلف من مجتمع لاخر. لذا المثل الواحد قد يقال بطريقة تختلف من منطقة لاخري. اعطيك مثال ( التبش بيقوم فى زرع الاترم – مثل من دارفور) ، هو نفس المثل فى كردفان ( المريسة ما بتقع فى شرابيها). عدم معرفتك بالامر لا يجعل من يعرفه بجاهل. الاخ شوقى بدري كاتب هذا المقال رجل فهامة و خبير بالمجتمع السودانى ( ليس السودان المحصور بين الباقير و العيلفون و الفكى هاشم و ابوروف)، و تاريخ السودان ورجل سودانى قل ما تجد من امثاله، لذا لزم التنويه. ان كان لك شئيا يستحق القراءة ، فاكتبه ، خلاف ذلك لا تتطاول على اناس لا تعرفهم
ياشوقى انت بتنفخ فى قربه مقدودة وياريت يقدرو يسدوها – هو القاليك البشير جعلى منو؟ بالله ده عمل اولاد جعل ؟ واله ود سعد لو قام من تربتة ولقى البشير بيعمل فى عمايلوا دى كان اتبرى منه ورجع لى قبرة تانى .
والله حلوة ” وكان خلوه ما بعشر غنم” ما هو زولنا ذاتو – كم بهيمه عشرها؟ حرمتين معاه وماخفى اعظم وبرضو جارى ولا الزرية – ربنا يقطع زريتك ياالبشير وليد………. بالمناسبة امه اسمها منو؟ تقول رمت الوليد وربت التبعية زى ما بيقولوا يقطع زريت ناسك البهم قادر ياكريم
سوف نرحل هذا العتود إلى لاهاي قريباً
الرجال فى السودان اصبحو دون نتمنى ان يتولا امر هذا البلد النساء لانهم اشرف وانظف من البشاكير المانفعة (ياتري اين ابناء مهيرة ؟؟؟؟؟؟؟؟؟؟؟؟؟؟؟؟؟؟؟؟؟؟؟
استاذ شوقي السرق الكهرباء من الجامع ايام الديمقراطية دا الصافي جعفر بتاع الحرامي بتاع مشروع سندس
المشكلة الكبرى في النظام الشمولي الذي كرس كل شيىء للحزب الحاكم وكان التمكين الذي جعلهم السادة وضاعت الكفاءة والعمل والانتاج وأعمهم لسلطة وضعف معارضة متنطعة تلهث وراء المال والمناصب . الشعب صبر واحتمل دون طائل . لانقاذ الموقف تكون حكومة محدودة العدد وذات قاعدة عريضة حقيقية وليست مسرحية تمومة الجرتق ويجب ان يبتهعد الحزب الحاكم عن معظم الوزارات السيادية الهامة والإستعانة بمهنيين ودون وزراء دولة ومستشارين مع خفض المخصصات وتوفير الحريات ومحاربة الفساد ومحاكمة المفسدين ورد الأموال النهوبةوان يتبرع كل من استفاد من السلطة ببعض ممتلكته لتطهير النفس . كما يجب ان يستقيل كل وزير عمل اكثر من 6 سنوات كما خب تطهير الخدمة المدنية ممن دخلوها في غفلة واصبحوا صناع قرار دون خبرة .
لابد من تداول سلمي للسلطة وشفافية وعدالة وحرية للجميع ومعارضة قوية