رسالة بت حموري الي مالك قصور كافوري
رسالة بت حموري الي مالك قصور كافوري
ايمان حموري
[email][email protected][/email]
بالدراجي
بلغنا امركم بدعوة التقشف والتزهد ، وعجبنا حتي ضحكنا من هذا الامر لانه فوق طاقتنا (يعني كل بح ) لان كلمة تقشف اصطلاحا تعني الاكتفاء بالضروريات والانصراف عن التنعم والملذات، ونحن والله يا سعادتك لا نملك ابسط ضروريات الحياة ، نعم التقشف لزمرة الحزب قد يكون جائزا وواجبا قللوا سيارتكم الفارهة، خفضوا ، مرتباتكم المليونيه ، اما دعوة التقشف لكافة بقية الشعب غير جائزة قد تكون فيها حرمانية والله اعلم،هذا غير الاستفزاز الغير مباشر لمشاعر الشعب، وقد تترتب عليه ان يلحس نافع علي نافع كوعه ولعله يدركه من بوعه، انت الان سيدي الرئيس تملك قصرا كافوريا فخما حتي وداد حرمكم المصون في حيرة من امرها من اين لها بالاساس لهذة الفخامه لان كل الاساس الموجود في السودان لايتناسب او اقل فخامة ، وهذا ما ورد علي لسانها لاحد الصحف المحليه (يعني الموضوع ما اوضتين وبرندة ) ثانيا عمائر اخوتك وابناء عمومتك في كافوري بنفس مستوي عمارتك يستحيل يكون مستوي الدخل يكون واحد يعني يا سعادتك مش كترتو المحلبيه انتو دفقتوها عديل كدة !! قطعة الارض في كافوري المتر بي كم ؟ دا غير الطوب والسيخ والاسمنت وحق البناء والبياض احسب حقك وحق جماعتك ، دا غير السيارات والبدلات والذي منو ، وبعدين يعني محسوبيه ظاهرة عملتو حوش بانقا مصغر في كافوري يعني يا ساعدتك تعيش انت متغشف وبقية الشعب يموت ، وبعدين ساعدتك شنو الاستتهتار بعقول الشعب لما تجي وزيرة الشئون الاجتماعية وتقول ناتج رفع الدعم حانديهو نقد للاسر الفقيرة يعني نفهم شنو؟ طيب رافعنوا لي شنو من اصلو؟ ولا دا تخدير لعقول الشعب السوداني!!!
ملحوظه
سعادتك كلم النائب بتاعك الاستاذ علي عثمان محمد طه لما يجي اتكلم مع الشعب ينزل لمستوي الشعب يعني ما اتكلم معانا من فوق شابكنا خدامات وشغالات وصالات افراح وماهية 15 مليون يعني هو في وادي وكيلو الطماطم في وادي يعني ابلغو الاستظراف في المواقف الزي دي بيخلي نافع يلحس كوعه !!!
في الختام
تحياتنا لكل اهل كافوري محطة حوش بانقا
الامضاء بت حموري
في الختام
تحياتنا لكل اهل كافوري محطة حوش بانقا
الامضاء بت حموري
عفيت منك يا بت حموري
لكن لو كنتي إسترسلتي شوية كان متعتينا وفشيتينا أكثر
اصبري يابنت حموري سوف ياتي اليوم الذي يهدمون قصورهم بأيديهم انشاء الله شعب طيب ذينا حقنا مايروح فقط قولوا الله عليهم كن فيكون .
التقشف ده هو ما قاصد بيه الشعب السودانى هو قاصد بيه ناس الانقاذ يعنى ناس المؤتمر الوطنى الجو باللوارى والحمير ولقوا الثروة وهاك يا لغف و وظايف بالكوم شى مستشار وشى مساعد وشى شنو ما تعدش ما اصلهم عينهم ما مليانة وبعدين هم من ارذل السودانيين
يا بت حموري أنا حنيت عليكي لأنك متقشفه شديد حتى ما لاقية طرحة تلبسيها وتستري نفسك حتى أسلوبك ضعيف جداً وفيهو تقشف شديد وتاني ما تقولي ( تغشف ) أصل الكلمة ( تقشف ) . والله يسترك في الدارين ويرزقك ابن الحلال لو ما متزوجة .
بت حمورى من مكة المكرمة لكم التحية بمناسبة حى كافورى قبل أيام كنت أقرأ فى صحيفة الانتباهة مالكها الخال الرئاسى لقاءً وفى حلقتين مع شقيق الرئيس الراقص عبدالله يقول فيها أستغرب للذين يطلقون على كافورى حوش بانقا وحى كافورى قال تأسس عام 1955م وقال يعنى ايه العجب أن نمتلك منازل فى حى كافورى قال ا،ا طبيب حقيقة أصابنى (القرف) من كلام شقيق الرئيس الراقص وقذفت بالصحيفة الأرض وأقسمت أن لا أشترى هذه الصحيفة
(حتي وداد حرمكم المصون في حيرة من امرها من اين لها بالاساس لهذة الفخامه لان كل الاساس الموجود في السودان لايتناسب او اقل فخامة ، )
يا بت حموري لك مني التحيه الخالصه انا فهمت وداد ما عندها اساس ثقافي (قرويه) لك العتبى ….. اثاث القصر
بت حمورى الله يحلنا من لصوص كافورى
وانها الثورة حتى النصر انشاء الله
دحين يابت حموري يابتي تقشف اكتر من بقينا ناكل وجبتين في اليوم عايزننا ناكل وجبه واحده ولا شنو
وبعدين طمني الريس كان بيتكم حدا بيتو قولي ليه عمتي مسره بتبلغك السلام وبتقول ليك اطمئن رمضان قريب وبنصوم وبنفطر بعصيده بدكوه وما دايرين لينا اي شربات ليمون عشان نوفر ليكم السكر اصلوا وداد دي ما بتقدر تقعد بره عصير وتكثر استعمالات السكر عندها ( ح….وكده )
دحين يابت حموري الدكاتره ديل موش قالوا لينا السكر ده بعمل لينا السكري
وكان علي شربات الليمون بنعمله بالتمر
ودحين يابتي العوضين بره برنده لافه موش ابرد من القصر وبعدين ناس كافوري ديل ذاتن ما ناس الزول يعاشرن ويسكن جمبهم
زقلونا دي ماله
بس في حاجه واحده يابتي بدورك تكلمي بيها البشير ده قولي ليه عمتك مسره بتسلم عليك وبتوصيك ارفعوا الدعم عن اي شي الا بس البنقو والعرقي ديل اوعه تهبشوهن لينا
لانكم علمتونا الادمان عليهم ما تحرمونا منهن
بس عندي امانه بعلقه ليك في رقبتك طال مارقبتك فاضيه مافيها سلسل يابتي ذي الابساهوا وداد ( دحين يابتي حقها ده دهب صحي صحي ولا فالصوا )
امانتي توصليها لعلي عتمان تقولي ليه طيب انت بعد مرضان قدر ده مابتخاف الله مالك اسحن ليك باقي ايامك دي عديها في كدباس كان تحفظ ليك صوره تنفعك يوم القيامه ويغفر ليك حق الحيوانات الرحلتهم وما معروف قتست حجرن وين
سمعنا تحت تحت بذكروك ابوك الكان عائش معاهن
سعال لناس الحيكومه ديل
هل الخلقنا ده ياهو نفس الخلقكم
ولا عندكم خالق تاني
ياناس كافوري كفرتونا ودخلتونا الجامع ودخلتوا السوق
وهوي يابت حموري ما تجيبي لينا الهوي اصلي انا مره كبيره وما بستحمل شباب الامنجيه ديل
تحياتي لحموري وكافوري
المغلوبه علي امرها
عمتك مسره
ىابت حموري كلامك سمح لكن اسودنى شويه واستري راسك ده البلد مافيها طرح برضو
لكن وريتيهم الحرامي
ثورة حتي النصر
ياخرطوم ثوري لن يحكمنا راقص كافوري
انتى يا حمورية قريتى وين بالظبط؟؟بس كويس انك صلحتى الاخطاء الاملائية الكثيرة
بتبالغي يابت حموري صدديقتي انت جاملتيهم الان قصور كافوري دي عادية بس المهم قصور ماليزيا ومدن دبي الرجال حول البشير مشترين مدينتين في دبي حتى رجال دبي تكلموا قالوا اشتروا مدن وجوعوا شعوبهم دا غير الارصدة الست وداد اشترت دهب السودان بتراب الفلوس وسفرته خارج السودان تانيا تقشف شنوا البقول راتبي 15 مليون دي بدوها لبتاعة الحنة والمساج انتي عارفة القوصي طبعا نسوان الحكومة مابدخلن المطبخ القوصي بجهز للواحدة اكل اسبوع كامل اكثر من هذا المبلغ انا بعرف المرة البتعمل لي وداد المساج والدلكة كل يوم بتاخد مليون بعملوا حمام السونا بالمياه المعدنية والاطفال بشربوا مياه ملوثة وكان للمتعافي هو العلمهم السرقة اول زول هو القروش بالشوال بدخل بيها ديل فاتوا ابليس زاته البشير قال راتبه خمستاشر 15 ولا تكفي ثمن ثياب زوجاته شهريا بنعرف البتجيب ليهم الثياب من دبي الثوب بكلف ثلاث مليون اربعة مليون شغل خاص بزخ بزخ يابت حموري
والبقول لقينا الشعب جيعان هل هم جابوه من بيت ابوهم مابرضوا حق الشعب الله يرحم زمن غرفتين بدون صالة زنكي بيوت العساكر وود الصادق وود الميرغني طلبوا مارسيدس ابيض للنهار واسود لليل مال سايب والمال السايب بعلم السرقة والشعب نام ونسي امره
اتمني يكون الشعب اتعظ ويشوف حاله الانقاذ حتغور بس مايجي يركب في راسنا الصادق ولا الترابي ولا الميرغني نتمني الشباب يصحي البلد محتاجة لشبابها
شاذ الافاق
يا الصارم الجلاد بت حموري كان عندها املاء ولاما عندها املاء المهم رسالتهاوصلت وماخايفه من اي زول اشجع من المندسين والارزقيه ونحن دايرين اي زول يقول راي ويا كوز خليت الموضوع كلو وقبلت علي الاملاء