أسعار قياسية جديدة للجنيه السوداني

إذا لديك أكثر من 10000 دولار فإن السعر 12 جنيه ونصف (12 جنيه و 50 قرش) والسبحة جارة.

الجماعة ديل ما قالوا لينا لو نحن ما جينا كان الدولار لحق 20 جنيه بالقديم هسه الدولار حصل 13 الف معناها مفروض الشعب يتحرك لازالتهم وكنسهم من حياتنا السياسية.بتزكر نحن زمان لمن نميري الله يرحموا يزيد قرش ساكت بنمرق الشارع وين الشباب يا جماعة ولا خلاص القلوب ماتت؟؟؟

و سوف يستمر تدهور الجنيه السوداني امام العملات الاخري طالما نستورد البسكويت و الحلويات و الفواكه النادرة في وقت تعاني البلاد من ندرة في الادوية … الوضع الاقتصادي يحتاج ان يتصدر له علماء لهم خبرتهم و تاريخهم

يا جماعة المصارعة بتاع الحزام الذهبي ما ساعد الجنية؟

لا حولة ولا قوة الا بالله ياجماعة الحقو البلد انتهت وزير السجم دة بعمل في شنو اعلنو انهيار الاقتصاد كي يساعدكم العالم يابجم

الانقاذ لمن جات الدولار كان ب 12 جنيه، وقالوا نحنا لو ما جينا الدولار كان وصل 20 جنيه، تخيلوا الدولار زاد الف مرة … الف مرة … الف مرة … لو كنت استطيع لكتبت هذه الجملة ألف مرة … الف مرة …. !!!!!!!

الجماعه الكيزان رفعوا يدهم من كل شئ و شقالين بيجمعوا الدولارات من السوق ويحولوه الى ارصدتهم فى الخارج و قالوا بالواضح اى تاجر يستورد بطريقته اى البنك المركزى ما بوفر لك و لا دولار واحد , الدواء الذى تجارهم بيربحوا فيه 200% ما عاوزين يوفروا له دولارات و برضو الناس تقول ليك الحكومه فعلت و ما وفرت لينا ما تطلعوا الشارع

اسوا شئ انك تخطئ دون تراجع عن الخطا
وتستمر في غييك وضلالك وعدم الاعتدال
هكذاهي حكومة السودان.

يا حليلك يا بلدنا و آشريري $$$$$$$

الانقاذ من ضمن مبررات انقلابها .. فلولا الانقلاب المبارك سعر الجنيه كان حيواصل الارتفاع وكان ممكن يصل 20 جنيه (طبعاً بالقديم يعني 20 قرش حالياً هههههههههه)
الجنيه واصل انخفاضوا مقابل العملات لامن ….. طلع

معاي حوالي 60 ألف من الأخضر أبو صلعة

علي كم السعر

جيبو صلاح يشوف ليهو مجدى تانى(الله يرحمه)

الدولار…حركة مسلحة…بس من نوع اخر

طيب ياجماعه بسال المبلغ ده يعنى بعادل كم بالعمله القديمه قبل وصول الانقاذ للسلطه؟

اصالة عن نفسي ونيابة عن حكومة السجم والرماد أيها الحاقدين..دائما تفضحونا بسعر الدولار والريال جنيهنا يهز ويرز 1 جنيه سوداني = 1.0643 يوان صيني.

اللهم اجرنا فى مصيبتنا واخلف لنا خيراً منها يا اخونا زمن الديمقراطية التانية كنا بنحول 137 جنيه سودانى بواسطة العلاقات الثقافية بتعادل114$ يعني كان بسعر 1.14ج للطلاب بالخارج

الحل ما صعب
حزب ثالث ينافس بشدة
ليس له علاقة
بالصادق اولا
ثم بالكيزان

حينط ليكم واحد من الكيزان ويقول ليكم اتضرعوا وأدعوا لنزول الدولار ما بنقدر نسوى شيء ابتلاء الهى, كألعادة هذه هي لعبتهم الأخيرة.

الدولار اليوم 12.500 .. والله عاوز لي 500 دولار ادفعا رسوم لحكومة الجن دي قالوا لي الا 12.500 ومافي للآن أنا بفتش

و الله يا اخوانا متمني اعرف و اشوف رأي الرئيس في الكلام ده شنو؟؟
يعني ما معقول الواحد يكون دمو بقري بالشكل ده..
ماذا يا تري يحتاج البشير ليتيقن انه رئيس فاشل.. خلي بالك نحنا ما أسأنا ليهو بل بنتكلم عن أداؤه كموظف يشغل منصب الرئيس.
التشبث بالحكم في ظل الارقام الحاصله دي يدل انو الكيزان ما عندهم علاقه بالوطنيه و لا المواطن رغم اللعلعه الكانو شاقين بيها راسنا زمان.. ياخي ما ممكن الانسان يدمر بلدو عشان يعيش بحبوحه ولا عشان يتهرب من اتهامات الجنائيه.. الناس ديل واعين يا ربي؟؟
هسه في زول بضحي بحياة شعب كامل عشان يعيش هو مرتاح و في الامكان انو كل الناس تعيش مرتاحه؟؟ اللهم الا اذا هو بيستمتع يشوف الناس دي فقرانه و جيعانه و معدمه و مريضه.. و ده يكون شخص مريض و غير سوي و مصاب بامراض نفسيه معقده!!
هل يا عمر البشير مسكت البلد عشان تنتقم من السودانيين ولا ايه الحكايه بالضبط؟؟
ياخي لو الزول ده عايز يعيش في نعيم حد يقنعو انو معطل ملايين الامكانيات عشان يحقق هدف واااااااحد.. ياخي انزل منها و ليك علينا نعيشك زي ما عايز.. ياخي خلي البلد دي يمسكوها الناس البيعرفو ليها.. و ده ما عيب اذا انت ما بتعرف تحكم لأنو كل انسان ربنا اداهو كفاء ا ت معينه لذلك ما تمرضنا ساي و الله العظيم البلد دي لو مسكها هبنقه ولا اي واحد منغولي لحدي الوكت ده كان عرف اعقد اساليب ادارة الحكم ياخي انت لهسه ما عارف الابجديات.. كلام ما اتعلمت تتكلم.. ابسط حقوق الناس (و ما بقول عليها مشاكل) ما قدرت تقدمها.. شنو يعني مويه و صحه و تعليم؟؟ ياخي احمد الله انت هسه لا تفجيرات لا داعش لا زفت عايش ليك سبعه و عشرين سنه ما سمعت ليك تفجير في الخرطوم.. ياخي انزل منها الله يهديك والله العظيم ده شعر ما عندك ليهو رقبه.. و الله اخير ليك عيش باقي حياتك دي مع الناس اصلك زول بسيط ساي تاكل و تشرب و تختم يومك بنكته و شكلة مع زول.. ده ياهو مستواك مالك و مال رئاسة السودان و مالك و مالك ابو السودان.. ياخي انت عباره عن انتهازي ليس الا و الانتهازيين المعاك الكانو نكرات قبل الانقاذ ديل و الله يغطسو حجرك محسـسنك انك زعيم و رئيس و اسد و تمساح.. و الله اخير ليك تتفكفك لسه في امل الحال ينصلح.. ما تقوي راسك ساي و تصدق.. الشغلانه دي ما قدرك.

مواطن مل مشاهدة مسلسل الفشل البشيري

وفي واحد أهبل لافي في الجزيرة حسبو. طوالي قال الجزيرة سوف تمزق فاتورة القمح ..

لا تزرع الشوك وتتمنى ان تحصد الورد . فكل المشاريع الزراعية دمرتها الحكومة فاصبح ما في انتاج ويواكب ذلك ازدياد في طباعة العملة ، وهذه هي النتيجة الدولار وصل 12,300 جنيه سوداني ، وبقت القروش يشيلوها في جوالات وفي درداقات وما عاملة أي حاجة . قبل الإنقاذ كانت القروش ما كتيرة لكنها سادة الحاجة وزيادة ويمكن ان توفر منها ، لكن اسع أصبحت كثيرة وما عاملة أي حاجة .
اضف الى ذلك فالدولة لا تشجع الإنتاج والاستثمار ، فمثلا اذا فتحت محل صغير برأسمال متواضع في اليوم التالي تجيئك الجبايات من الحكومة فتكرهك الشغل واذا كنت بتاع رشاوي بتمشي حالك لكن ستجد ان المرتشي لا يشبع بل كل ما يفلس يجي يقلع منك والنتيجة واحدة تكره الشغل وتفكر في الهروب من البلد .
اذن للخروج من هذه الأحوال الردية لابد من استقالة الحكومة الحالية وتسليم الحكم الى حكومة قومية تضم مؤهلين في كافة المجالات ونزيهين لتخرج البلاد من الازمة التي هي فيها وترسم للشعب السوداني الطريق للنماء والتقدم والرفاهية .

السعر دا ليهو شهر

الدولار ده عايز أى واحد من الاتنين ديل:
(1) صلاة إستسقاء كاربه
(2) 3 جواكر

هناك تراجع في الجنيه السوداني ومعظمه بفعل طلاب السلطة والمعارضة من أجل المعارضة جملة حسب الكمية والتاجر تموبه عندما يجد البائع اﻻمر خلاف ما تقول فيبحث عن تاجر آخر ولم يجد … تعبتوا الناس بالبحث عن التاجر