أسئلة مسطول لمدير المرور..اا
كيف لا
أسئلة مسطول لمدير المرور!!
منى عبد الفتاح
تقول الطرفة الشهيرة أن مذيعة خرجت تستطلع آراء الناس حول الزواج المبكر فقابلت مسطولاً على شارع النيل وسألته عن رأيه، فردّ عليها بسؤال: «مبكّر حوالي الساعة كم يعني؟» وها نحن من جملة المساطيل نسأل نفس السؤال للإدارة العامة للمرور التي منعت السفر الليلي على الطرق السريعة للحد من الحوادث المرورية: «سفر ليلي حوالي الساعة كم يعني؟» لأن ساعات الليل الممتدة من الصعب حصرها أو الالتزام بها كاملة.
الإدارة العامة للمرور تحاسب المواطن المسكين برفع مسئوليتها عن حوادث بشعة كحادثتي الدرادر والقطينة وإلقاء اللوم عليه لأنه سافر ليلاً. ولو سألنا أي صبي صغير لاستطاع وضع منطق سليم وهو أن منع السفر ليلاً لا يُصلح من حال الطريق نهاراً، لأن الطريق هو هو بحفره ومطباته الترابية وتعرجاته الناتجة عن إصلاحات لأغراض أخرى بطريقة غير مسئولة تقطع الأسفلت إلى أجزاء ثم تعود وتردمه كيفما اتفق.
إيقاف السفر ليلاً لا يُعد تدبيراً ولا تفكيراً حكيماً لأنه وكما جاء على لسان الإدارة أن (90%) من الحوادث تقع ليلاً بسبب عدم الإضاءة. إذن لماذا نصر على الظلام والإظلام، ماذا لو أخذت الإدارة جزء من الجبايات غير المقطوعة ولا ممنوعة لتضيء الطرق وتكون أراحت ميزانيتها ورجالها من شكوى عمليات التفويج المكلفة لتكون المسئولية من بعد ذلك على السائق، فماذا يريد هذا الشقي أكثر من طريق معبد مضاء.
لعل الإدارة العامة للمرور تعلم أن السفر ليلاً ليس بمغرٍ إلى الحد الذي تعقد معه الندوات وتخرج بهذه النتيجة الخطيرة. فبالرغم من أن طقس السودان المعادي للحركة والسفر نهاراً فإن المواطن لم يستطع تغيير ولو جزء يسير من نمط حياته بتخصيص جزء من الليل لأداء بعض المهام الاجتماعية والترويحية وترك النهار للمعايش والمصالح. ولم يستطع تغيير هذا النمط لأنه جُبل على ذلك ولأنه ما من مشجّع على ذلك فلا الطرق مضاءة وممهدة للعابرين داخل المدن ناهيك عن الطرق السريعة ولا الجو العام مشجع على البقاء خارج المنزل إلى ما بعد العاشرة ليلاً، فهناك هلع وخوف غريب من السهر. فالشوارع تخلو تماماً من المارة وتكسوها وحشة غريبة، وتنتقل هذه الوحشة إلى داخل البيوت فكل مطفأة أنواره عند العاشرة لأسباب اقتصادية ولتوفير ما تبقى من جمرة اليوم إلى الغد وبسبب حالة نفسية أن الكل ساكن والبلد في مواتها الليلي الرهيب.
هذا الجو والذي لا يغري بالتحرك داخل المنزل فكيف يهيئ لأحد ما بالسفر ليلاً وعلى الطريق السريع، اللهم إلا أن تكون هناك ضرورة ما كإسعاف مريض أو نقل سيدة على وشك الوضوع إلى المستشفى أو السفر لعزاء وهذه الضرورات تبيح المحظورات وأهمها إباحة حظر السفر ليلاً الذي من المفترض أن يكون مباحاً بالطبيعة مع التسهيلات وتوفير أدوات السلامة. في قرار المنع لم تضع الإدارة أية استثناءات مما يجعل الباب مفتوحاً لمعاقبة متجاوزي زمان الحظر هذا بالعقوبات والجبايات.
قبل خطوة المنع هذه كانت هناك خطوات كتنكر مدير المرور مستقلاً بص كوستي حتى يستجلي أسباب الحوادث، والأمر لا يحتاج لثياب تنكرية أكثر مما يحتاج لوقوف المدير على طرف الطريق السريع حتى يتبين أي نوع من الطرق الرديئة تنهبها مركباتنا. فالاتهام يجب ألا يوجه إلى السائق وحده ونعته بعدم المسئولية فهذا السائق يمر على نقاط تفتيش ولكن لا أحد يسأله عن إطارات مركبته التي من المفترض أن يتم فحصها دورياً وتكون مطابقة للمواصفات. كل ما يتعرض له في الطريق السريع إن كانت هناك مخالفة ما يدفع ثمنها ويذهب إلى حال سبيله ليقع الحادث بعد ذلك أو لا يقع فما على نقطة التفتيش إلا أن قامت بدورها الجبائي على أكمل وجه.
الاحداث
والله يامنى عبد الفتاح كلامك درر ، بالله مدير المرور يتنكر ويركب الباص عشان يعمل سبق صحفى ويلمع نجومو الفى كتفو ، اها يامدير المرور انشاء الله يدوك صقرين ومقصين ويبقوك مدير المرور فى الشرق الاوسط زاتو ، ياهى دى بصمتك الختيتا من خلال وظيفتك ؟ ياهى دى المحرية فيك ؟ ياهى دى العشانا تقبض فى الامتيازات ومكتب عشان تتنكر وفى الاخر تقول السواق مامسؤل ؟ اسع عليك الله الشارع المشيت بيهو مسؤول والحفرة الكسرت المساعد وخلت الياى يتلولو مسؤلة ؟ بس تشوفو الفيل وتطعنو فى ضلو ، اقول ليك شى ياخ انتا زاتو ما مسؤل والجابك برضو مامسؤل اعمل رايح فكنا ياخ .
تعرضت لتجربة قاسية في إجازة هذا الصيف عندما قررت السفر رفقة صديقي من الخرطوم لكوستي ومنها لسنار ثم ود مدني ومنها للخرطوم وأغلب الأوقات التي سافرنا فيها كانت ليلاً حيث رأيت الهول وأصبت بالرعب كثيراً جراء طرق ليس بها أدنى مواصفات السلامة و الأمان, لا يمكن أن تكون سرعة السيارة متوسطة لا تتجاوز الـ 80 كلم / الساعة في طريق به كثير من المنعطفات الخطيرة ولا توجد أي اشارات مرورية توضح أن هذا المكان به منعطف ،،، في ظني أن هذا سبب رئيسي للحوادث. إضافة لعدم وجود إضاءة في هذه المنعطفات. كنت أتحدث لصديقي وهو مهندس معماري لماذا لا يستفاد من الطاقة الشمسية مثلاً لإضاءة مثل هذه الأماكن على الطرق السريعة فهي طاقة رخيصة وصديقة للبيئة فقال لي يعني لو الناس في السودان عرفت توليد الطاقة بهذه الوسيلة الفعالة لما كان هنالك شيئ اسمه وزارة الكهرباء او الخمس شركات التي تديرها ولما عانى المواطنون الأمرين في سبيل الحصول على طاقة مفيدة وغير مكلفة ومرهقة للميزانيات الضعيفة أصلاً. نعمل أيه مع الحكومة التي استمرأت السطو على جيوب مواطنيها والتفنن في إفراغه من كل محتوياته الشحيحة أصلا؟
لعل قصة المسطول ذكرتني بي قصه حكاها لي احد السودانيين المقيمين بالمملكه والذي جبرته الانقاذ علي ترك اهله وولده المهم الراجل ده بيشتغل سواق لناقلة بضائع فحكي لي انه تحرك من الرياض لجده وبعد حوالي 350 كيلو وقفوه ناس المرور فسألهم انشاالله خير قالو ليهو انت ماشي في طريق مرور سريع وما مشغل نور العربيه فنزل السوداني وتأكد بنفسه وبعد داك قال لي انفجرت بالضحك ورفعت يدي للسماء وسط دهشة رجال المرور وقعد يدعي الله يحفظك يا الملك عبد الله الله يخليك لي وليداتك الله ينصرك فسألوهو ناس المرور ليه بتعمل كده قال ليهم والله ما جايب خبر اني ماشي 350 كيلو وما مشغل النور طبعا لان الطريق مضاء بإناره كافيه لتجعلك تسير من غير بنزين حتي دعك من طريق الرياض هذا والله الطريق الرابط بين مدينه في الشمال وقريه عدد بيوتا خمسين بيت اجمل من الاسفلت البمر امام بيت رئيسنا الموقر .. طريق بإربعة اتجاهات وفواصل حديديه واشارات علي رأس كل كيلو متر تنبهك عن المسافه المتبقيه او عوارض الطريق
وتقول لي رئيس مرور متنكر
– المقصود هي طريقة جديدة لزيادة الجبايات – يعني زول عيان لا حقين بيه الدكتور بالليل حيدفع حيدفع مره عائزة تلد ركبت الزلط بالليل حتدفع حتدفع . يعني العملية كلها تكملة لقرار الوزير بتاع تعديل المخالفات 50000 و 10000 الف .
– قصة حدثت امامي في عبور سوبا تم مخالفة الحافلةالتي كنا نستغلها نظرا لعدم وجود منفستو وهي تحمل اربعة 4 اشخاص توسل سائقها دون جدوي وحلف ليهم بكل عزيز بان من يحملهم هم اقرباءه قدموا من بلاد الغربة دون جدوي ، وعندما يأس منهم صار يتوسل ان يكتبوا له المخالفة بتاريخ اليوم الثاني لانو الساعة قاربت الثانية عشر ليلا حتي لا تتم مخالفته في اليوم التالي دون جدوي .
وجدنا صاحب بوكس يحمل شخصا مريضا علي عنقريب وتم مخالفته وحلف ليهم انو جاب المريض بدون قرش و لاتعريفة لانو انسان مريض في حالة سيئة وليس لديه مال ، برضو من غير فايدة يعني برضوا دفع .
هل منع السفر ليلا هو قرار مروري فني ام تدبير امني؟ لا اعني بامني امن الناس و سلامتهم من حوادث المرور و لكن اعني لاسباب امن النظام؟؟؟
كما ذكرت ان المدن صارت كمدن الاشباح فمنذ العاشرة تهمد الحركة و تطفأ الانوار و تلك سياسة امنية عملت علي توطيدها منذ سنواتها الاولي و كلنا نذكر كيف ان حظر التجول استمر لسنوات عديدة كجزء من برنامج التامين بالاذلال و كبت الحريات….
المنع ليس حلا لمشكلة الطرق الرديئة المظلمة التي تخلو من الخدمات و تخلو من الاسعاف و هو حل غريب سبقنا اليه العالم و طبقنا شعار الانقاذ " حنفوق العالم اجمع" فقد فقنا العالم اجمع في معدلات الفشل و استنساخ الاخطاء و الحلول الغريبة التي لا تواجه المشاكل بل تلتف عليها كمنع السفر ليلا…. فشل آخر يضاف الي اكوام فشل الانقاذ
يا استاذة منى الناس عينها في الفيل وتطعن في ضلو، يعني لو طلبت الحكومة من المحليات المنتشرة على طول الطريق العام إنها تعبد ما يليها من الطريق بأن يصبح الطريق مسارين لارحنا واسترحنا ، وهذ الاجراء لا يكلف كثيراً لا مالياً ولا زمنياً ويمكن للمحليات ان تفرض رسوم جديد تنتهي بانتهاء ما يليها من الطريق
وما أظن في زول ح يرفض يدفع، لأنو نحن ياما دفعنا
والله ياجماعه المشكله اكبر من مسئولية السائق او فحص العربه …………….
بلد بدون مواصفات ومقاييس ……….اطارات مدتها منتهيه والبضاعه الصينيه الرخيصه
ملت البلد
مافى اى معايير اذا دفعت اى بضاعه تخش مطابقه اوغير مطابقه .. يعنى القصه
جبايه فقط وليس حمايه للمواطن
وبعدين ناس المرور او الشرطه العامة تجد الواحد لم يتجاوز ال50 سنه ادوه فريق معاش
كلهم بقوا فرقا يعنى من مقدم ويتلمع ……… البيشتغل منو؟؟؟؟
ياجماعة الخير السودان يعانى من مشكلة اداره .. اداره ……………
نشيل كوم المرتزقه بره وناجر مكتب استشارى لادارة البلد !!!!!!!!!
يخططوا البلد وينظموا الطرق ويسنو القوانين المروريه ؟؟؟؟؟؟؟؟؟؟؟
والتكلفه حاتكون اقل بكتير…………..
أعقتد أن أكبر سبب للحوادث المرورية هو باختصار ضيق الطريق ولو كان الطريق أكثر من مسار في الاتجاهين لما كانت مثل هذه الحوادث أن تحصل ..
المعروف أن الطرق تعتبر من البني التحتية الرئيسية في أي بلد حتى لو كان فقيراً ولكن الوضع عندنا يختلف رغم كل الجبايات والتي أسميها (سرقات) التي تحصل في الطرق (دعم طرق) لا يتم صرفها في الطرق بل تذهب لأشخاص وهذه هي العلة لابد من الاهتمام بالطرق ولكن ما أظن هذا يحصل في عهد هذه الثلة والحثالة الحاكمة ..
يااختى منى دايرة الصراحة السودان كلو من رئيسو لشعبو داير اعادة هيكلة …
المشكلة انو الناس دي مفتكرة انو ادارة المرور هي المسؤلة عن انشاء الطرق وصيانتها!! لكن في الواقع الدولة متمثلة في وزارة الطرق والجسور وزارةالتخطيط العمراني هي المسؤلة ، اما ادارة المرور فما عليها الا تنظيم حركة المرور ، اما قرار السفر ليلاً ففعلا الشارع دا بالنهار مشكلة وكونو تسوق فيهو بليل دا يعتبر مجازفة وهو في الاساس ما شارع سفر، فهم طلعوا القرار دا لانو في يدهم مافي حاجة اعملوها ولانو الحوادث دي اغلبها حصلت بليل!!.. ومدير المرور صرح في صحيفة الراي العام انو ادارة المرور بتتحمل اخطاء الغير!!
– ومشكلة السودانيين ديل الواحد اشتغل ليهم انتقدوهو! ما اشتغل ليهم انتقدوهو اكتر واقولوا قاعد ساي ما شغال!
– المشكلة شنو لو لبس عمة وجلابية ومشي شاف الاوضاع بي نفسو! وهو زول جاي مدير جديد!
– حصل قبلي كدة شفتو ليكم (لواء) حايم شغال في الشارع بي نفسو؟!!
– وياريت يا مني عبدالفتاح تمشي تشوفي منو المسؤل عن انشاء الطرق وتوجهي ليو كلامك دا
– ومدير المرور لمن مشي ركب البص عارف مسبقا انو الطرق ما مهيئة وما كان راجيكم توروهو المعلومة دي!.. وهو ركب البص لانو معظم السواقين مع سؤ الشارع بسوقوا بي تهور!.. والراجل ما قصر في النهاية حفز السواق لانو لقاهو منضبط في الشارع
– ويا(ود نمر) اللواء عابدين اكبر من منصب مدير مرور الشرق الاوسط وما محتاج اعمل لي روحو اعلام لانو معروف بي اداؤه المتميز ولو ما بتعرفو امشي اسأل منو.
مادام المساطيل بقوا افهم من الواعين اقول ليك في واحد معتوة والمعتوة في الفقة هو قليل الفهم مختلط الكلام فاسد التدبير لكن رغما عن ذالك بقولوا حكم شفتي كيف يضع سرة في اضعف خلقة متعود يجي يلقي زول راكع او ساجد يقوم يشوت شلوت تعرفوا الشلوت المهم فمرة علي اهل مسجدة وجدهم ساجدين فقال ياربي هس نشوت منو ونخلي منو ناس الاستيراد والتصدير والا المواصفات والا الطرق والجسور والا ناس المرور السريع ونشكيهو لي مين القدر ونشكي المقادير لي منو وبالمناسبة القدر هو المتهم الاول في فقة العامة والمتهم الثاني المرحوم لكن انا اري ان المتهم الاول هو امير المومنين الذي عثرت عندة بقلة في جبل اولي لانة لم يسوي لها الطريق
والله حرام الهنود بقوا ناس ونحنا لسه في الموصفات والتصنيق تصنيف شنو وقرف شنو وين التصنيع المحلي وين الاناره وين وين نحنا في الالفيه الثالثه والناس في الطرق والخدار والعدس ونسوا الناس التعليم والقلم وذادوا في الطين والبلم
ودبحرى خلى كسير التلج الماجايب حقو . اداء متميز شنو واكبر من الشرق الاوسط شنو ؟ والله كلامك ده بدل على انك بس منبرش ساى اما لعلاقة قربى او نفاق اجتماعى ليس الا
لو كان الاداء متميز ماكان تم منع اصحاب الهايسات على ماتم منحه لبصات الوالى ولو ماعارف منعو شنو ومنحو شنو اسال المدير المتميز البتقولو انتا
ثانيا المدير بتاع المرور قال حيعمل مخالفات للزول البقطع الشارع غلط مامشكلة بس الشارع فى والناس فى بس المافى الاشارات البقطع بيها الماشى بى كرعينو
التمييز وين ؟
ياخ اسال على الاقل مدير المرور ناس الركشات ديل وضعهوم شنو ؟
ياخ اقول ليك شى ياو دبحرى انسا ياخ