حس الشوق
حس الشوق
حسن العمدة
[email][email protected][/email]
حروف شعري ..وتري.. غناي
مروق الناس علي البلد النفتح بابها للجايين
ويبقى علي ملامح طينها حس الشوق وعمر الالفة والزرع المفتح فوقها باقي خدار
وتري … غناي
ولدا شايل كتبو بين ايديه
يكتب في كراريسو
صباح باكر
صباح اخضر
يلاقوا الكدح الاشواق
وتبقى القصة قصة ريد
ونبقى شراكة في الواطة
ساس الناس وآخر اللفة في الدنيا
لوين يا اخوي خطاك ماشة بلامقصد
ودي خطاك لباكر
اوعك يخر عزمك تصد فاتر
افتح للصباح ايديك
واقع الحلة موهيلك؟؟
كل البلد العليك اسمها
صبحت في كفوف عفريت
باع الناس وحق الناس وداس الاصلو مابنداس
باع الفكر والثمرة
وفضل واقفين حثالة الناس
بدورية … بكاباتهم الحراس
تدور وتدور
عليك تجور
تكد تكدح … ونص الليل ينط تلب حدا البابور
يجيك العسكر الطابور
يمينك دور
قول الزور هو القانون وهو الدستور
جاك الدور اقيف اركز
ابقى معانا وارجى الخير
ارجى صباحك الساويهو بايديك
ارجى شليل
ارجى الكدح الصالحين تقيف وتثور
دحين ابشر
تمشى معانا للمشوار
نمشى عديل ومابندور
صباح الخير يابلدا شهق زراعا والشدرة
شهرت سيفها للخاينين
للباعوها باسم الدين
شاقي جروفها موية النيل
وعالي غناها بالتهليل
ومابتغش
لابتغش ولا لابسالها مليون وش
البلد المفتح بابها للجايين
وباقي على ملامح طينها
حس الشوق
وعمر الالفة
والزرع المفتح فوقها باقي خدار
حسن العمدة
امدرمان 2005
اوعك يخر عزمك تصد فاتر
افتح للصباح ايديك
ياحسن دة كلام جميل جدا وما بقول ليك كدة مجاملة انا افتكر انوالقصيدة لامست الواقع السوداني لي حد كبير وبها عامية قريبة من قصايد حميد.