تسريب لحديث عمر البشير أمام مجلس شورى حزبه

عبدالوهاب همت

تحصلت الراكوبة على تسجيل خطاب الرئيس عمر البشير في اجتماع مجلس شورى المؤتمر الوطني والذي انعقد في قاعة الزبير محمد صالح في الخرطوم وذلك يوم السبت 22 أكتوبر2016. وفي الخطاب الذي لم يمضي عليه اسبوعين من الآن يجد القارئ الكريم أن حزب المؤتمر اللاوطني قد نفذ كل ماتم طرحه في ذلك الاجتماع بحذافيره حيث كان البشير قد وعد بأن هناك زنقه ستحدث بعد رفع الدعم عن الدقيق والبترول والدواء.

وأخطر مافي حديث البشير المسرب أنه يستهين بالاحزاب اللاهثه نحو المشاركة في السلطة ويصف الامر بأنه ليس امتطاء السيارات الفارهة فقط وانما هناك عمل كثير وهذا الخطاب المرتجل يعتبر صفعة قاسية لاحزاب الحوار عساها تتراجع عن ما اقترفته يداها قبل فوات الاوان.

حديث عمر البشير

الصلاة والسلام على رسول الله انا مفروض اتكلم بعدين ما عارف رئيس المجلس فرض علي هذا التعقيب… يضحك … يعني أول حاجة طبعاً امكن الحاجة المعروفة ما قدم من تقارير هي ملخص للاداء ولحفظ زمن هذا المجلس والناس حقيقة الواحد داير يقول ما دايرين نعتذر لكن الواقع بقول نحن بندير البلد دي في ظروف صعبة الحصار الموجود على السودان ما موجود عل اي دولة في وجه الارض الآن يعني امريكا رفعت كل عقوباتها عن ايران بعد إتفاقية النووي وأغرب حاجة في قرارهم برفع العقوبات يؤكد انه الحرس الثوري الايراني هي منظمة إرهابية وفي الوقت نفسو بيرفعو الحظر عن اكتر من 800مؤسسة ايرانية من ضمنها البنك المركزي ولفك الأرصدة الايرانية المحجوزة في امريكا واللي هى 150 مليار دولار أمريكي نحن ظلينا خمستاشر سنة السي اي ايه بترفع تقرير للحكومة بتاعته أنو السودان لا يدعم الارهاب ولا يأوى الإرهاب ومتعاون في محاربة الإرهاب وبجددوا اسمنا في قائمة الدول البترعى الإرهاب… هتافات حسبنا الله ونعم الوكيل … رفعوا الحصار عن كوبا, عندهن حصار على كوريا الشمالية لكن برضو بشتروا منها الفحم الحجري وبتاجروا معاها وما في حظر على التحويلات على كوريا الشمالية ه الكانوا مع فصل الجنوب ولو فصلوا الجنوب كان البرنامج كالآتي أول حاجة حرمان السودان من إيرادات بترول الجنوب اللي هي بتمثل 80% من إنتاج البترول في السودان وبالتالي أكثر من 90% من إيرادات النقد الأجنبي وحوالي 50% من إيرادات الموازنة لكن ما اكتفوا بأنو يحرمونا من بترول الجنوب في نفس الوقت كانوا بلعبوا وبولعوا النيران في دارفو, فحرماننا من بترول الجنوب وعائداته وتوليع النار في دارفور والصرف عليها كان تقديرهم أنها دي كافية أنها اتدمر السودان, أيضاً غير أنو فصل الجنوب حيحرم السودان من عائداته عايزين أيضاً جنوب السودان هو يكون ( ) القاعدة اليينطلقوا منها ليحاربوا السودان حرب في دارفور وحرب في جنوب كردفان حرب في النيل الازرق ودي اسمها قطاع الشمال. قطاع شنوهو جزء قطاع هو جزء معناهو جزء من الجنوب, وقالوا الناس يتفاوضوا مع قطاع الشمال وقرار من مجلس الامن يتفاوضوا مع قطاع الشمال ح ينتفاوض مع قطاع الشمال بتكلموا عن إغاثة عبر الحدود, يا جماعة نحن كونو نتنازل ونقدم إغاثة لمناطق التمرد ونحن بالنسبة لينا الاكل والدواء والذخيرة دي حاجة واحدة اسمها مواد تمويل القتال, لكن ما اكتفوا ليه عايزنها عبر الحدود لأنو وزي ما أقول هسه الباخرة الجاية دي , دا عيش ماشي جنوب السودان عندهم إتفاقية معانا أنو الإغاثة لجنوب السودان تمشي عبر السودان, الإغاثة لجنوب السودان تمشي من السودان, الجنوبيين الجيعانين جونا هنا في السودان, وبعد كده قالوا عايزين الإغاثة تجي عبر الحدود, دي إغاثة؟… دي ذخيرة ونحن ح نقولها نحن دبوس عبر الحدود ما بنخلي يطلع لبره البلد دي… أصوات الله أكبر … حنتفاوض الليلة والسنة الجاية ومية سنة وناسنا بيمشوا ناس إبراهيم بيمشوا ويجوا راجعين والإغاثة عبر الحدود واللي ما عارف ايه والشئون الإنسانية ومجلس حقوق الإنسان نحن والله ما بسمح بدبوس يجي من اصوصة أو غيرها … هتافات الله أكبر… , الحاجة التانية بدأوا يشجعوا في الناس ديل انو يجندوا في الناس ويعملوا في فرق جديدة على أساس انو عندما تجي الإتفاقية الناس ديل نحن حنستوعبون في الجيش. نحن طالما هو جيش وجزء من جيش دولة تانية وهو قطاع من الجيش التاني نحن ما ح نستوعب لا عسكري ولا ظابط في الجيش السوداني ولا في المخابرات ولا في الامن من القوات الموجودة في جنوب كردفان والنيل الازرق حتى لو نحارب تاني مية سنة… هتافات الله أكبر… عشان الناس تكون عارفة يا جماعة نحن محتاجين لمواقف محتاجين لناس بقيفوا معانا فيها, لأنها هي ما مواقف ساهلة ونحن ما بنصارع في قوى ساهلة نحن بنصارع في القوى الحاكمة الآن, القوى الدمرت العراق رغم قوته واللي دمرت سوريا رغم قوتها واللي دمرت اليمن وايران, هسع دي بدأت الحملة واضحة جداً على المملكة العربية السعودية, يا جماعة نحن كنا على رأس قائمة الدول, كل الدول الادمرت دي نحن كنا على راس قائمتها لكن نحمد الله سبحانه وتعالى أنو نحن لا زلنا واقفين على رجلينا, أنا ما بقول نحن لمن تحصل حاجة بطالة دي مننا نحن ولما تحصل حاجة كويسة والله دي ما منكم نحن برضو بنقول جهد الناس بتوفيق الله سبحانه وتعالى هي اللي حافظت على هذا البلد وعلى امنه وعلى تراثه, وعشان كده نقول للناس ما عندنا حلول سهلة, اللي اللي اللي هي الناس عايزة كل شئ من الحكومة وما عايزين يدفعوا للحكومة, ناس دايرة الحكومة نقدم علاج مجاناً صاح, ودايرة تعليم مجاناً, كل زول داير يوصلو الكهرباء وكل زول داير يدوهو موية وكل زول داير يوصلو شارع ظلط وكل زول داير بنزين مدعوم, ودايرين ياكلوا قمح مدعوم والقمح دا يا جماعة القال أخوانا ديل ناكل مما نزرع, يا الاستاذة سعاد ما القمح لانو كل ناس ربنا سبحانه وتعالى اداهم مناخ معين عشان ما ينتجوا اكل معين عشان ياكلوا وبكل اسف نحن بناكل قمح والقمح ما هو من المحصولات الهي ممكن تنتج في السودان بالصورة اللي ممكن تكون هي الغذاء الرئيسي لأهل السودان يا جماعة نحن دول تشتري الطن بتاع المزارع بكم باربعة الف, بنشتري طن القمح من المزارع باربعة الف كنا بنبيعوا للمطاحب 1200
تداخل في أصوات الحضور …. نشتري بكم؟ 4 الف ونبيعو للمطاحن ب 1200 لو عملنا مقارنة مع اخواننا في اثيوبيا, الاثيوبيين تعداد سكانهم قدر السودان تلاتة مرات واستهلاكهم للقمح تلت استهلاك السودان, لأنو فارضين على ناسهم ياكلوا من انتاجهم اللي هو التست حتى في الطيارات بتاعتهم دي لو ركبت فيها بتلقى الانجيرة قاعدة, فنحن رغم دا كلو نحن حقيقة بتقول نحن محتاجين للفترة الجاية عندنا حزمة الناس تكون عارفة عندنا حزمة إجراءات إقتصادية فيها زنقةواضحة فيها رفع دعم عن الوقود وفيها رفع دعم عن الدقيق… هتافات الله أكبر… الله أكبر وفيها رفع دعم عن الدواء… الله أكبر… الله أكبر نحن عايزين نصل في النهاية انو الحكومة واحدة الإصلاح الإقتصادي بنى أولاً على رفع الدعم لأنو بندعم سلع … الله أكبر… بندعم سلع كثيرة جداً ح نرفع الدعم لكن رفع الدعم معاهو إجراءات أول حاجة لازم نرى انو التعديل في المرتبات ما يعادل أو يعوض ما رفعناه عن دعم من السلع.
أيضاً عندنا برنامج تجاه الفقراء والمساكين ودي مسئوليتنا نحن, نحن تجاه فئتين بس فئة الفقراء والمساكين, يجب أن نراعي لهم ونعوضهم نزيد الدعم بتاعهم في الدعم المباشر والدعم الغير مباشر سواء في التمويل في الزكاة في غيره دي الفئات دي نحن مسئولين منها والفئات ذات الدخل المحدود انو المرتبات يجب أن نعمل فيها تعديل واضح جداً وكلفنا المجلس الاعلى للاجور انه يعمل دراسة, ما هو الحد الادني من الاجور اللي ممكن أيضاً يمكن يواجه الإحتياجات في حدها الأدنى للاسرة دا يبقى المعيار, بعديها كيف نحن نقفل الفرقة ما بين الاجر وإحتياجات الاسرة في المعاش, دا حيكون برنامجنا ويكون عندنا برنامج واضح لزيادة المرتبات حسب زيادة إيرادات الدولة لغاية ما نقفل الفرقة دي ويكون المرتب مجزئ فعلاً لكل من يعمل والزول البعمل دا لو ما اديتو مرتبو مجزئ ما حيشتغل ليك, فدي إجراءات جاية يا جماعة عشان الجايين معانا ديل وقايلنها حكومة ساهلة وشغل ساهل وهي وزارات وراكبين عربات وحايمين حيلقوها الحكاية دي مسئولية كبيرة جداً انو تعمل إصلاح يحقق للبلد دي, نحن محتاجين انو كحزب حاكم أنو نحن نمسك عضويتنا وننور عضويتنا نرفع عضويتنا وهي التي تقود ما تبقى الحكاية هي مطالبة فقط, أنو لازم المجتمع يكون ليهو دور, نحن نتكلم عن المجتمع الرائد, القائد للدولة والمتقدم عليها, ما كل الناس منتظرين الدولة عشان تعمل ليهم اي شئ, قضايانا الخارجية زي ما قلنا ماشين فيها وحنعمل عليها ان شاء الله وحنعمل نحسن علاقاتنا مع امريكا ومع غيرها وكلها ماشين فيها ولكن بدون أنو نحن نتنازل عن مبادئنا هتافات… الله أكبر… ما بنبع مبادئنا… ليه نحن المستهدفين الاوائل سؤال ليه نحن الدولة الوحيدة الما اتعفت الديون بتاعته؟ ليه نحن الدولة الوحيدة العليها حصار اقتصادي؟ ليه نحن الدولة المصرين يختونا في قائمةالدول الراعية للارهاب رغم كل الكلام البقولوهو عننا, لأنو نحن رافضين ايضا ان نكون دولة خاضعة ودولة مستسلمة للسياسات ونحن لما رفضنا زمان دخول القوات الامريكية للمنطقة لانو عارفين دي النتيجة. الليلة العراق وسوريا وليبيا واليمن وبكرة بقية الدول كلها في وموجودة في البرنامج لأنو الجماعة الآن واضح جداً انو في حلف صهيوني صليبي شيعي لتقسيم المنطقة ما بين اسرائيل والدولة الصفوية. ونحن اتكلمنا يا اخوانا في الكلام دا زمان ما صدقونا والآن بدأوا يصدقونا لكن بعد الفاس وقع في الراس, ما فات فوات حنشتقل معاهم حنعمل معاهم ان شاء الله لإبطال هذا المشروع, كل البنطلبو نحن يا جماعة انو كحزب نكون اكثر تماسكاً, اكثر قوة وما نستمع للارهاب والناس البتكلموا عن انو الحكومة دب أفقرت الناس الفقر المدقع وشظف العيش نعم في فقر في فقر.لكن نحن بنقول انو المستوى المعيشي للمواطن السوداني ارتفع كم سوداني كان ماشي برجلينو ولا راكب دفارات وبقى عندو عربية؟ كم مواطن كان عندو تلفون زمان وكم واحد الآن عندو تلفون, لو مسكنا فقط الناس.
كم عدد الناس في المدارس الخاصة يا عبد الرحيم في الخرطوم؟ يا جماعة عدد لالطلاب الفي المدارس الخاصة في الخرطوم اكتر من عدد الطلاب في المدارس الحكومية. في اسرة فقيرة محتاجة ما عندها رزق اليوم بترسل ابنها لمدرسة خاصة؟ لو قالوا ياخ ناس الحكومة صعبة النتيجة يا الاخت سعاد موجودة, النتيجة بتاعت المدارس الحكومية متقدمة على المدارس الخاصة, اذا تحدثوا عن بيئة المدارس الحكومية بانها ليست بيئة مثالية لكن المدارس الخاصة قاعدة في بيوت مهما كان الحال البيئة المدرسية افضل منها.
كم الناس البمشوا الآن الإجازات بسوقوا اولادهم ويمشوا خارج السودان؟
كم الناس الآن بنو بيوتهم كان ضالوص والآن طوابق؟
يا جماعةانا حتى لو بتكلم هل الدافوري والبنلعبو في الحواري والآن بقى في ملاعب خماسية… ضحك.
النفايات لأنو بقينا مستهلكين زيادة النفايات زمان اسم النفاية شنو يا جماعة زمان الحاجة قفةظو الناس دي لحدي اسع ترمي قفة الملاح, القفة دي بشيلو فيها الخضار والملاح, الما عندو قفة بشيل في كيس الورق داك بتاع الاسمنت والكيس ما بجدع لأنو العواسة بالحطب بولعوا بيها النار… ضحك… ما في ورق بجدعوا صاح ولا ما صاح يا استاذة سعاد…ضحك… لكن حسع الدنيا كلها غاز وبتوجاز بقى الورق بترمي, الأكياس ما كان في زول بحتاج لكيس لأنو في قفة ولو عاينا .. للكوشة ح نلقاها أكياسظ, حنلقاها قزاز بتاع موية. يا جماعة أنا أول مرة في حياتي شفت موية في قزازة سنة 75 لمن مشيت ابوظبي وأصلاً ما كنت متخيل في يوم من الايام أنو السودانيين ديل ح يكونوا محتاجين يشربوا موية بقزازة. حسه الليلة في كم واحد بفتح الماسورة ويشرب منها في كم واحد ممكن ينشل الموية من البير ينشل منها, حسه العندو بير والعندو حفير والعندو جدول وأنا دايماً بحكي للناس لما نحن جايين ننفذ الشغلانة حقتنا دي وأنا كنت جايي من المجلد وأنا دايماً بحكي للناس بيتنا في بابنوسة ومن بابنوسة راكبين عربات جايين في الطريق الدنيا كانت رشاش, قدامنا في درب العربية عامل شوية موية اتخيل الموية الفي درب العربية دي مويه طملة زي المديدة والبنات بغرفن في الموية من درب العربات والغريبة لما العربية تقرب يقومن جاريات فسألت الزول المعاي وهو من ابناء المنطقة البنات ديل بجرن مالن؟ قال خايفات تسالوهن ليه بتشيلن الموية دي… يضحك… الليلة الناس بشربو في اي حتة في اطراف السودان بتلقى الموية البتنتج في الخرطوم بنلقاها هناك الناس بشربوا منها وبعدين المفارقة في انو القزازة القدامكم دي بكم بتاعت سوبا دي آآآآآآ (واضح ان الرئيس لا يعرف سعرها) ويتطوع احد الحضور ليجيب عليه باتنين جنيه. ويواصل الرئيس ناس الخرطوم قبل مدة قالوا يعملوا المتر بتاع الموية بجنيه البرميل مش كدة, المتر فيهو اربعة براميل او خمسة براميل مش كده بجنيه خمسة براميل بجنيه جرايدنا كلها صحافتنا صحافيننا الحكومة تضاعف سعر الموية وتضغط على المواطنين المساكين وعلى الفقراء وعلى المساكين خمسة براميل بجنيه يوصلوها لغاية البيت في الماسورة بتاعتو يوصلوها ليهو خمسة براميل في الماسورة بجنيه ويقولوا الحكومة ضلغطة على الناس.
يا جماعة حقو نحن برضو لما نتكلم نتكلم واذا قلتم فاعدلوا يعني ما ممكن الخمسة براميل بجنيه وتقولوا الحكومة والله ضاغطة على المواطنين هو خاتي قدامو قزازة باتنين جنية عشان يشربة في شربة واحدة, في فقر لكن نحن لازم نقول انو الاثر على الفقر الآن حاجتين أول حاجة التمدد بتاع الفنى في ناس غنو وناس مرقو من الفقر وفي ناس وصلو مرحلة الرفاهية عايشين برفاهية فالتوسع دا رفع ايضاً تطلعات الاخرين, اي زول عايز نفس المستوى, اي زول عايز العربية الخاصة واي زول عايز البيت الكبير واي زول عايز اسبلت كل شئ شئ الرفاهية دي الاستهلاكية دي عايزين يصلوها ودي المتعبة الناس لكن ما ممكن نحن نقول الناس الكانوا في سنة 69 (يبدو انه قد نسى تاريخ انقلابه المشئوم) سنة 89 واللي نحن عملنا حداشر سلعة في البطاقة التموينية عشان ندي الناس السكر بالوقية ولا يقولو افقرت الناس واتعبت الناس. يا جماعة الجهد البذل وما تحقق في السودان ما شوية وإذا قارناه بالظروف والضغوط المتعرض ليها السودان حنلقى نحن بنعمل في معجزة ودي كتبها صندوق النقد في تقريره انو الحصل في السودان معجزة. والفضل ما شهدت به الاعداء نحن بنعمل عمل كبير ما حقو نخجل منو حقو نقدمو وندافع عنو بقوة وما يكون همنا انو الحتة دي مسئولية ناس ولا مسئولية الناس القاعدين في الحكومة, كلنا حكومة اي واحد عضو في المؤتمر الوطني هو مسئول مسئولية كاملة زيو زي اي مسئول قاعد في اي موقع نحن حنسعى حنجتهد وربنا سبحانه وتعالى ان شاء الله معانا ومع اذن الله نحن والله شاعرين بيها تماماً لانو لولا وجود الله سبحانه وتعالى لما كان السودان.
اخونا ( ) رحمه الله قال الناس بستدلوا على وجود الله ببعرة تدل على بعير وأقدام تدل على سير قال لا السودان دا موجود الله موجود وجزاكم الله خيراً والسلام عليكم ورحمة الله وبركاته