لو رجعناكم محل ما أنقذتونا
الفاتح جبرا
مستمراً في نهج التفلت الخطابي وإستفزاز مشاعر هذا الشعب المكلوم وفي اللقاء التنويري بينه وبين أحزاب الحوار الوطني، صرح السيد وزير المالية بدرالدين محمود ضمن ما صرح قائلاً : : ( لو رجعناكم 89 كنتو حتمشوا المقابر).
والمتأمل لهذا القول الفطير الذي يجافي الواقع يجد أن السيد الوزير يؤكد بأننا كشعب كنا في (1989) في عوز وشدة من أمرنا كادت أن تفتك بنا وأن توردنا موارد التهلكة مقارنه بما نشهده اليوم (من شنو ما عارف) !
طيب تمام … لو رجعتونا إلى 1989 لمشينا إلى المقابر وإلى حتفنا راجلين ، بس لو رجعناكم ح تبقى مشكلة ..
لو رجعتونا (1989) محل ما أنقذتونا كنا ح نلاقي الدولار بي 12 جنيه والآن بعد نحو أزيد من 27 عاما نجد أن الدولار قد بلغ نحو 16000جنيه (كم % والله غلبتني) !
لو رجعناكم (1989) منو فيكم الكان عندو تسعة عملات أجنبيه في بيتو .. هو البيت ذاااتو كان طين وبالإيجار (هسه وزير بيشتري بيت بي 2 مليون دولار) وكمان بيملح (السمسار) !
لو رجعتونا (1989) محل ما أنقذتونا كنا ح نلاقي سعر الرغيفة وزن ( 140 ) جرام ( 14 ) فقط اربعة عشر قرشا سودنيا بينما سعر الرغيفة (المايكرو عيشة) الآن وزن ( 70 ) جرام او اقل (500) جنيها سودانيا
لو رجعناكم (1989) كنا ح نلاقيكم ماشين (كداري) وفي أحسن الأحوال راكبين الهنتر أبو دخاخين في السماء
لو رجعتونا (1989) ح نلاقي جالون البنزين سعرو ( 4.5 ) جنيه ، والآن بعد الزيادات الأخيرة بلغ سعر الجالون 29 ألف ونص ! قابله للزيادة كما صرحتم ! مع إنو في كل العالم سعره في إنخفاض مستمر (قال دعم قال) !
لو رجعناكم (1989) كنا ح نلاقيكم الواحد فيكم يا دوووب قادر يصرف على بيت واحد (بالتلتلة) ، والآن بيتين وتلاته وأربعة (ومرات فيها فك تسجيلات) !
لو رجعتونا (1989) محل ما أنقذتونا كنا ح نلاقي سعر جالون الجازولين . ( 2 ) جنيهان فقط لا غير اما الآن وبعد الزيادات الأخيرة فقد بلغ سعر الجالون الان بعد نحو ( 27 ) عاما من عمر ( حكمكم ) اصبح سعر جالون الجازولين ( 20 ) جنيه بالتمام والكمال !
هل تدري أيها الوزير الهمام أن سعر رطل السكر عندما جئتم كان (125) مائة خمسة وعشرون قرشاً (عندها كان القرش حي يرزق) !
وهكذا اللحوم البيضاء والحمراء والشاي والبن والخضروات والألبان والأجبان والأكفان والفول والبوش والبصل وزيت الطعام وزيت العربات وتعرفة المواصلات وتعرفة الجمارك والطحنية والعسل والمربي والموز والبرتقال والجوافة وصابون الغسيل والحمام والنظافة وكشف العزاء وكشف الطهور وكشف الطبيب !
قبل أن تنقذونا أيها الوزير الهام أعدنا أيها الوزير الهمام حيث كنا فقد كنا لا نعرف الفساد والتحلل ولم يكن المسؤولون لدينا ينكحون ما لذ وطاب من الإناث الكواعب ويمتطون فاره الدواب ويعيشون في أفخر الفلل والقصور ، ولم يكن لدينا دور لرعاية ثمرات الرذيلة أو (حاويات مخدرات) مجهولة المصدر !
أعدنا أيها الوزير الهمام فقد كان لدينا مؤسسات ناجحة كالنقل الميكانيكي والمخازن والمهمات ، الأشغال ،النقل النهري ، الخطوط البحرية السودانية (سودانلاين) ، مشروع الجزيرة ، السكة الحديد، الخطوط الجويةالسودانية (سودانير) … وخط هيثرو ذااااتو !!
كسرة:
نحنا بنرجع .. بس إنتو تاني بترجعوا !!!
? كسرة ثابتة (قديمة) :أخبار ملف خط هيثرو العند النائب العام شنو؟ 85 واو – (يعني ليها سبعة سنوات وشهر) ؟
? كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 44 واو (يعني ليها ثلاث سنوات وثمانية شهور)
الجريدة
وزير في السعودية قال انتاجية الموظف ساعة في اليوم بعد اسبوع شالوه بره
عندنا الوزير يشتم الشعب ليل نهار كانه ما حصل حاجة
HA HA HA HA
رحم الله الفنان عبدالعزيز محمد داؤؤد
تصحيح ،،
في 1989 سعر رطل السكر كان 25 قرش وليس 125 قرش يا جبرة ،
و سعر الدولار 12 جنيه كان في السوق الأسود وليس السعر الرسمي
جبرا كلامك – كبير والله – الكويز ما بقدر عليهو هههههههههههههههههههههههههههههههه
الجماعة طبعا حذفو تلاتة اصفار من الجنيه ونحن كالعادة بلعنا الطعم, ودي اكبر عملية نصب واحتيال حكومي علي مر التاريخ.
عمنا جبرا متعك الله بالصحة و العافية
الصورة دى اكيد قبل ما ينقذوك ولا انا غلطان
ما يعجبني في الفاتح جيرة انه يأتي بالمختصر المفيد وبالارقام التي لا تقبل الدغمسة و اللت و العجن بتاع الكيزان
متعك الله بالصحة و العافية
أري فيك ضمير و صوت المواطن السوداني الحق
يومهم قرب و سترجع كل الحقوق التي ذكرتها الي اصحابها
وسيرجعون الي المكان الذي اتوا منه
لا ندري اين هو
وحينها سيرتاح الطيب صالح حتما في مرقده
والله قصة
ما اي معفن مقطع لبس بدلة اشتراكية بي قروش البلد و راكب عربية بي قروش البلد
يعمل نفسه الوليد بن طلال وهو صنجة حقيقة نفسه اوضع واحقر من ان يولى مسؤلية بلد
تصريحاتكم الهبلة دي بتدل على خواء عقولكم وبنعتبرها ( كواريك سكران في حفلة )
مفتكرين انكم من كوكب تاني ؟ انتوا من السودان
والله جد زي ما بقول ليكم من السودان ( يعني حيط زبالة وغنم وتراب و فتة و حر )
بديتوا بي شنطة تمكنا + موتر اسود + دقن قبيييحة جدا + ( ودي مهمة جدا ( ريحة اباط عفنة جدا جدا )
انتوا يا شياطين الاسلام نسيتوا لمن جيتوا( من الحتة العاوزين ترجعونها ليها دي ) كنتوا وين ؟؟؟
كنتوا عطالة قاعدين في بيوت الناس البتمنوا عليهم ديل سكنوكم معاهم والكتوا من عيش اولادهم
وعاوزين تفتروا عليهم اسي ؟؟؟
كنتوا طلبة بليدين جدا … احمر منكم الله ما خلق
احترموا نفسكم واسكتوا نحن متحملين نصادف اخباركم دي بي يا الله
جيتوا غبببببببش زي الدحوش
الله لا جاب باقيكم !!
جضومكم كانت مطفقة زي باب الامجاد في الحادث
وعاوزين تقلوا ادبكم اسي بعد سرقتوا مال البلد ؟
حكمة ربنا بقيتوا حكام !!
ونحن مؤمنين بقضاء الله وبحكمته الربناية
بانه جابكم لينا بلاء زيكم وزي السرطان …
ويا اتعالجنا منكم يا اتحللنا منكم مشينا المقابر براااانا .
والله يا جبرة انا خايف عليك من السكتة القلبية لانك لاتزال تخاطب عصابة الرقاص ظانا الخير فيهم مع انهم هم الشر والباطل والفساد بل هم ابليس ذات نفسه بس علينا بالعصيان المدنى وكمان لو ناس الجبهة الثورية ساعدونا بجكة قوية واسقطوا ليهم بعض المدن الطرفية يكون المحلى دخل عطبرة نهار والعين تشوف وهاك يا اعواد القذافى
الاستاذ المحترم جبره لك كل الود .. هنالك حقيقه لا ينتبه لها معظم الناس عند مقارنة جنيه العام 89 ( ما قبل الكارثه ) وجنيه اليوم (ما بعد الكارثه ) فلو قارنت جنيه ما بعد الكارثه بالجنيه قبل الكارثه كقولك مثلا الدولار كان 12 جنيه والآن 16000 وللحقيقه واذا تغاضينا عن قولبة الجنيه الى دينار وكثيرا من الملعوبيات التى ألمت بالجنيه .. تكون القيمه الشرائيه ( بالمناسبه لو جبت اعتى خبير او بيت خبره اقتصادى الله اعلم يتوصل للقيمه الحقيقيه لجنيه ما قبل الكارثه اوالعكس ) ولكن ( يبقالى ) قيمة الدولار الآن 16000000 فقط نرجو من علماء الاقتصاد ان يتوصلوا لنا عن كم بالضبط فقد جنيه 89 من قوته الشرائيه ؟؟
والله كسراتك حلوة وظريفة لكن مالاقىلها اذن صاغية
والأفضل من ده كمان،يرجعونا تاني إلى ما قبل تطبيق قوانين”بدرية سليمان”التي صاغتها بنفسها في عهد الرئيس الأسبق/جعفر النميري،حتى التاريخ الميلادي كمان قالوا لإصحاب الشركات ما يكتبوا بيهو ويكتبوا بدلا عنه بالتاريخ الهجري ـ مع إحترامي طبعاً للتاريخ الهجري ـ لكن هذين المشروعين توقفا بسبب إندلاع إنتفاضةأبريل سنة1985م،فظننا وقتها أن الإنتفاضة قدإقتلعتهم من جذورهم كما تنبأ لهم”محمود محمد طه”الذي شنقوه قبل حوالي(90)يوم فقط من إنتفاضة إبريل ،لكن جذورهم كانت أعمق مما تصورنا،ذلك أخذت في الظهور من جديد في عهد الإنقاذ الوطني،الدليل على ذلك هو ظهور تلك النسخة طبق الأصل لقانون”بدرية سليمان”مرة أخرى في حي الديم وتسببت بطريقتها “الإستفزازية”المقوضة للحريات،إلى مقتل أنثى بريئةوهي سليلة السلاطين في جبال النوبة”عوضية عجبنا” وكأنهما أرادوا من ناحية أخرى أن يضربوا”شعب جبال النوبة”وسكان أحد”المنطقتين”في شخصها هي،لذلك لم يكن غريباً أن تعتبر قضية “عوضية عجبنا”ليست مجرد قضية.
ينصر دينك يا أستاذ جبرا
يا اخى انت استاذ الماس ( الرياضيات ) كلها
اديهم ….. يديهم الكود و وجع اللغود
ارجعونا لحدى 1956 نشوف بحصل شنو
دى عملتها كيف ياجبرا؟
لو هم مقتنعين بكلامهم دا ، ما كان قمة طموحاتهم تكون سنعيدها لسيرتها الاولى
اول مرة اسمع ببلد تحلم بانها ترجع للوراء
قالوا فى فورمات اى واحد عايز ارجع لعام 89 عليه تعبئتها الفورم ب 10 دولار ودمغة جريح 10 دولار و10 دولار تجهيز مجاهد و10 دولار رسوم نفايات و10 دولار همبته عديل والماعجبو خليه فى وضعه الحالى , سارعوا الفورمات محدوده
والله ياجبره ماخليت ليهو صفحه ينوم عليها …سلختواسلخ تمام….وفى حاجات كانت زمان فرطت فيها حكومتنا مع سبق الاصرار …كالتعليم العالى الذى كان يدرس فيه طلبه الجامعات باللغه الانجليزيه…وتم التعريب وحصلت الكارثه …زمان كان التعليم العام 3/3/6 نظام جيد وتم الغاؤه 3/8 ونقصت سنه تعليمه من عمر الزمان وهسه بعد سبعه وعشرين سنه اكتشف الخطا وحا ارجعونا لى 1989م…زمان ماكان فى مدارس خاصه والتعليم حكومى موحد وكل الطلبه بعرفو خريطه السودان من حلفا لى نمولى…زمان كنا بناكل الكسره الفطورعصيده بى ملاح تقليه…وبتغدى بى كسره بملاح باميه او قرع مع سلطة خضراء…وبتعشى بى عصيدة قمح باللبن بالسكر…وكل الحاجات دى بننتجها ماقاعدين نشترى حاجات من بره الا السكر والشاى ..والقروش ماكان عندها قيمة فى حياتنا لانو بتعلم مجان وبنتعالج مجان وما بنركب ماوصلات …نعمل بى القروش شنو مامحتاجين ليها اصلا فى حياتنا ….اقول ليكم كلام رجعونا لو بتقدرو.؟؟
وكان سودانا مليون ميل مربع وحلايب والفشقة تبعنا ودارفور امنة وجبال النوبة هادئة مطمئنة والنيل الازرق فى سلام والشرق على قلب رجل واحد وكان ما عندنا بيوت أشباح ولا سرطان ولا فشل كلوى وكان حكامنا أياديهم نظيفة وما ملوثة بالدماء ولا بالمال الحرام ووزراءنا لا يوجد بينهم فاسد ولا حرامى ونساءنا نعم النساء وما فيهم واحدة حرامية ولا فاسدة ولا منحرفة،ومويتنا نظيفة وما كان عندنا نفايات مستوردة ولا مكبات نفايات مشعة ولا بضائع صينية مضروبة وملوثة ولا حاويات مخدرات ولا تجارة بشر.
عام 1989 كان عام شؤوم يوم أستولت الجبهة الاسلامية على السلطة الشرعية بالخيانة العظمى و قوة السلاح وأجهضت الديمقراطية.
الواد عامل زكي عاوز يرجعنا نحنا وهو يقيف في محطة ٢٧ هههه تلغاها عند الغافل..نرجع كلنا محل انقذتونا ونحاسب بعض كيف كنتم وقتها وكيف كنا .فإن لم يكن حالكم أسوأ من حال الشعب الآن ، عافيييين منكم دنيا وأخرة…شفت كيف؟!! يلا أقبل التحدي…قصرنا؟؟؟؟
فقط للتوضيح السريع
البوش كان مجانا وبدوك علية حبت زيت ومويةجبنة بس انت تشتري العيش
شاهدتهم يتجادلون في زيادة مويةالفول اقل ما يطلبه فقير اصبح يباع بالغالي لك الله يا بلد
اقوليكم حاجة ترجعونا دى مابتقدروا عليها لكن نزلونا هنا وقرضو على كدا
كان انتو مشيتو حفايا
استغرب من هذا الوزير الذي يسخر منا ويتبجح علينا بكلامه ولكن الحقيقة ان الكيزان هم الذين اذا عادوا الى ما قبل سنة 1989م سنجدهم كانوا فقراء ولا يملكون ثمن الطعام لهذا كشروا انيابهم على الشعب بعد توليهم السلطة
زمان العملة كانت 10 جنيه وجنيه وريال 5 قروش وقرش وتعريفة ومليم وما ننسى الفريني الظريف. يعني
جنيهات وكسر من الجنيه دلوقت ما عارفين موقع الجنيه من الإعراب. دي الفاطحانا برة. أعيدونا وابعدونا
من الناس العملوا قروش.
انت ياجبرا….الكلام ماقل ودل….انو بقصدنفسه…لو رجع لي 1989 كان مشي المقابر بر رجليه
…لانه كان مابمتلكةحاجه
زمان العملة كانت 10 جنيه وجنيه وريال 5 قروش وقرش وتعريفة ومليم وما ننسى الفريني الظريف. يعني
جنيهات وكسر من الجنيه دلوقت ما عارفين موقع الجنيه من الإعراب. دي الفاطحانا برة. أعيدونا وابعدونا
من الناس العملوا قروش.
انت ياجبرا….الكلام ماقل ودل….انو بقصدنفسه…لو رجع لي 1989 كان مشي المقابر بر رجليه
…لانه كان مابمتلكةحاجه