وإذا عرف السبب..!!

البدلات البدلات

في الصميم فترامب لم يستلم بعد و هو في مرحلة ترتيب البيت الداخلي اولا . لكن الوفد البرلماني لايهمه طالما التذاكر و الاقامة من جيب المواطن الفقران

بطل العجب هناك بعض مال بالخزانه العامه لابد أن يأتو عليها جميعها فنحن أمام محنة الدواء التي لم نجد لها علاجا بعد وان كان علاجها ممكنا وذلك بتوفير الدعم اللازم له ولكن الوفد البرلماني إثر أن تدعم رحلته الي امريكا فهي أولي من دعم علاج طفل مريض ويتألم من المرض فموته أخف حالا من إلغاء سفرهم فامركا بالنسبة بالاضافه للرفاهيه فهي تأتي بمخصصات مالية دولاريه فهؤلاء قوم لايستحون والاستحو ماتو

يا أستاذ عثمان ميرغني أرجوك أترك التشاؤم والنظرة السوداوية دي.. ياخي الناس شغالة ليل نهار ذي الحصين والحمير والبغال عشان يرفعوا العقوبات الامريكية عن السودان وأنت كل مرة تحتج وترمي لينا الشوك في الطريق وما بعجبك العجب ولا الصيام في رجب.. قلت لي مستعجلين لشنو؟؟ هسع لو إتأخرنا 6 شهور أو سنة وقررنا بعد ذلك نمشي لترامب حتقول أتأخرتو لشنو!!! عجبي.

فيها شنو لو البرلمان مشي قابل ترامب قبل دخوله البيت الأبيض؟؟ فيها شنو أننا نكون سباقين في التواصل مع ترامب قبل إنشغاله بمشاغل العالم الاخري؟؟ فيها شنو أننا نمشي نكلمو ونحكي ليهو ظلم أعدائه الديموقراطيين أمثال أوباما وبوش وكلينون قبل جماعات الضغط الامريكي والصهيوني يكلموهو ويضغطوهو ويحرشوه ضدنا؟؟ ياخي قول ربنا يوفقنا ويوفق ناس البرلمان بدل التشاؤم ده ياخي.

وبالمناسبة ترامب بيعرف السودان كويس وأول مسؤول رفيع عينه في حكومته هو رجل من أصول سودانية (رئيس موظفي البيت الأبيض).. أضف لذلك أن ترامب رجل عملي وشجاع وله رؤية سياسية وإقتصادية مختلفة تماماً عن كل الديموقراطيين الذين حكموا أمريكا في السابق.. والان ترامب يخطط لتدمير داعش والسماح لبشار الأسد بحكم سوريا وتركه في حاله لأنه لا يريد تكرار سيناريو العراق وهو يعتبر ما حدث في العراق من فشل الديموقراطيين أمثال الغبي بوش.. ترامب يكره الديموقراطيين ويعرف أنهم هم الذين كانوا يدعمون داعش والارهاب ويريدون تدمير الأسد وسوريا.. نفس الشئ ينطبق علي السودان الذي ظلمه الديموقراطيون كثيراً وفرضوا علينا العقوبات ظلماً ودمروا لنا مصنع الشفاء للأدوية في بحري ظلماً.. ترامب رجل جمهوري ذو شخصية حديدية وعشان كده خلونا نأمل فيه الخير شوية عسي ولعل.

يا أخوانا حبوا البلد دي وأكرهوا المؤتمر الوطني ذي ما دايرين.. ربنا يدمر المؤتمر الوطني تدميراً بس البلد دي ما تبقي ذي العراق وسوريا وليبيا واليمن ياخي.. أنتو مشكلتكم بتكرهوا الخير للبلد دي وفاكرين أنكم بتكرهوا الحكومة بس.. هسع واحد يجي يقول لي أنتو قلتوا أمريكا روسيا قد دنا عذابها.. والله عذبتونا وعذبتوا روحكم وما دايرين تنسوا الماضي كلو كلو.. ده ما منطق ولا حجة ولا موضوعية بل سبهللية وكلام دراب ساي.. خلونا نفتح صفحة جديدة.. كل الشعب السوداني زيتو طلع بسبب العقوبات الامريكية وحكومتنا كل شوية ترفع الدعم عن السلع غصباً عنها عشان الدولة ما تنهار.. ومجبر أخوك لا بطل.. يعني الحكومة المزنوقة دي تعمل شنو غير تضغط علي الشعب المسكين ده؟ غصباً عنها والله.. 27 سنة الحكومة كانت تدعم لينا العيش والقمح والدواء والبنزين والكهرباء وكل شئ لكن هسع خلاص البلد ماشة علي إفلاس عام والحكومة زيتها طلع والوجع وصل العظم.. والله لو أي حكومة تانية غير دي كنا زمان بركنا ذي برك الجمل بدليل أنو في دول كانت أكبر وأقوي مننا بركت وتدمرت وراحت شمار في ورقة.. ميزة حكومتنا دي إنها شاطرة في اللعب بالبيضة والحجر عشان كده حافظت علي البلد دي رغم كل التحديات والمؤامرات 27 سنة لكن بعد كده مافي ضمان لبكرة.. ولو واصلتوا في الكلام الفاضي ده يا عثمان ميرغني ممكن نسلم البلد دي لجماعة ياسر عرمان وبراكم حتشوفوا الويل والثبور وعظائم الأمور وتقولوا يا حليل أيام الإنقاذ.

ياخي لما نسمع أن البرلمان بتاعنا ماشي يقابل ترامب مفروض نعمل حاجة واحدة بس وهي أننا نقول ليهم ربنا يوفقكم ونديهم دعوتين بدل نكسر مجاديفهم كده.. ليه بتتعاملو كده ياخي؟! هم قالوا ليكم ماشين سياحة وفسحة مثلاً؟! ديل ماشين عشان يشوفو مصلحة الشعب السوداني الصابر ده.

أي مواطن سوداني ما داير أمريكا ترفع العقوبات عننا يبقي مفروض ما يحتج أبداً أبداً أبداً علي رفع الدعم والأسعار الولعت نار.. ده المنطق كده لو بتعرفوا المنطق.

خليهم يا باشمهندس يمشو يقابلو البواب بتاعو, يقولو ليهو في جماعة من السودان جو وما لقوك!!

ردود على طارق
اولا شكرا على هذه الروح الوطنية
ومحن مع علاقات ممتازة مع امريكا
لكن قل لي من عنل على تدمير هذه العلاقات
من الذي كان يدعو بالثبور والخراب على امريكا روسيا قد دنا عذابها
من الذي احتضن الارهابيين والمنظمات المصنفة ارهابية في العالم
كل هذه المصايب التي جرت في علاقات السودان الخارجية من المظؤتمر الوطني
ولا سبيل للعلاقات ان تعود الا بزوال هذا النظام الاخواني المندس

الظاهر عليهم ماشين سفرة وزوقة (على وزن عمرة وزوقة) – ماخلاص الشغلانة بقت واضحة وضوح الشمش فى رابعة النهار – البلد افلست اقتصاديا وسياسيا بفعل فسادهم الغذر.

الجقلبة والكبكبة لزومها شنو؟؟ خلوا الزول يرتب بيته وبعدين ما تفتكروا ترامب هذا اهبل يمكن (خمه) انتم واهمون ومضللون للشعب

سلام…
كلمة (تغير) هنا حددتها أمريكا بوضوح.. وقف الحرب.. انسياب المساعدات الإنسانية لمناطق النزاعات.. حقوق الإنسان والحريات.. فما الذي (تغير) ليسافر هذا الوفد ليشرحه للأمريكان!؟.
هذا هو لب الموضوع والذي تعتمد عليه امريكا في سياستها تجاه السودان فنرجو من المسؤولين عدم إضاعة الوقت والاموال التي نحن في أمس الحاجة لها لسد الكثير من الفجوات والثغرات التي لا تحصي ولا تعد .
لو نظرنا اليوم لكل الشعب ( إستثناءاً اعضاء الحزب الحاكم ) لوجدناه يعاني من جوع وجهل ومرض وإنعدام الدواء ليس ببعيد ، فهل هناك أصعب من هذا الحال الذي تنفطر له القلوب .
لماذا هذه النثريات وخزينة الدولة محتاجة لكل دولار موجود بها ؟؟؟
لماذا تترفهون بأموال الغلابه الذين لم يجدوها لا ستيراد الدواء ؟؟؟
لماذا تتمعون بأموال المحرومين من لقمة العيش ؟؟؟
لماذا ولماذا ؟؟؟؟؟
كل مؤسسة في السودان محتاجة للسنت الواحد لتقوم بالخدمات التي كان من الواجب عليها تقديمها للمواطن البسيط الذي يصحو من الصبح ويخرج بحثاً عن الرزق كي يسد به رمق من ينتظره بالبيت على أحر من الجمر .
ودمتم…
أبوعيسى…