“جلسة طرب وفرفشة” لرفع الروح المعنوية للبشير بالسر قدور وهدى عربي وآخرين.. صورة
اقام الصحافي محمد لطيف الشهير في الاوساط الاعلامية بـ”الصهر الرئاسي”، جلسة سمر في منزله، دعا لها رئيس النظام المشير عمر البشير، وذلك لرفع روحه المعنوية، بعد ان تدنّت ووصلت الى الحضيض ? بحسب المراقبين – بسبب حرمانه من حضور القمة العربية الاسلامية الامريكية التي تجمع الرئيس الامريكي دونالد ترامب بالزعماء المسلمين في العاصمة السعودية الرياض.
وعلمت (الراكوبة) من مصادر واسعة الاطلاع ان البشير شارك في “جلسة الفرفشة” التي حضرها الشاعر والمسرحي السر قدور والتي اقيمت بمنزل صهر اسرة الرئيس الصحفي محمد لطيف بضاحية كافوري.
وذكرت المصادر ان الجسلة التي اقيمت مساء امس “السبت” غنى فيها المطرب مصطفى السني والمطربة هدى عربي والفنان مبارك البنا.
وذكرت بعض الصحف المقربة من النظام ان البشير ظهر في الجلسة منتشيا، خاصة انها شهدت بعض القفشات والنكات التي اشاعت اجواء من المرح. كما انها شهدت مشاركة والي الخرطوم الفريق اول عبد الرحيم محمد حسين الذي جاء الى منزل محمد لطيف رفقة البشير.
ورجّح صحافيون في الخرطوم ان تكون الجلسة التي اقامها الصهر الرئاسي تهدف الى رفع الروح المعنوية للبشير الذي تم منعه من حضور قمة ترمب في السعودية، وذلك لانه مطلوب للمحكمة الجنائية.
وكان الفريق طه عثمان مدير مكتب البشير قد ناب عنه في القمة، وهو الامر الذي اوجد حالة من الاستفهامات، حيث رأى البعض ان البشير قام بارسال مدير مكتبه احتجاجا على حرمانه من القمة، وهو ما يعرف في الاوساط الدبلوماسية بالتمثيل المنخفض، الذي ياتي في شكل رسالة او احتجاج.
غير ان مصادر صحفية اخرى توقعت ان يكون تسمية طه ممثلا للرئيس تاتي في اطار الصراع داخل حزب البشير وخاصة بين المدنيين والعسكريين، الذين باتوا يسيطرون على دفة الامور بصورة كبيرة، وقالت المصادر ان عدم ابتعاث وزير الخارجية البروفيسور ابراهيم غندور ليكون ممثلا للرئيس تؤكد ان الصراع داخل حزب البشير وداخل الحكومة بلغ مرحلة كبيرة جدا، خاصة ان الفريق طه ذكر في حوار سابق نُشر بصحيفة “اليوم التالي” اجراه رئيس تحريرها مزمل ابو القاسم والصهر الرئاسي الصحفي محمد لطيف، ان المرحلة القادمة لن يكون فيها التعامل عبر حزب المؤتمر الوطني، وانما عبر رئيس الوزراء ورئيس الجمهورية مباشرة.
الله لا اعاد ايام الفقر والمسغبه يا محمد لطيف ومبروك عليك سكنه كافوري بعد خرابات الاجار
ارسال الدلاهه بدلا عن الغردون اظن السبب زعله من بشه لانه غردون طمن الجماعه أن السفره مضمونه ومقابله طرمبه حتي لو من بالنظر بتاعت اللمبي لذلك رسل ابنه بالتبني
وكت بقيت بتاع عقدات اها النوصف ليك ! القعدة عاد بي ترباس ! اكان اخليك ترقص الرقبة
هذا مستوي رئسنا الرقص والطرب
ي أخونا الريس بقي يرقصوه كتامي…
والله يا السر قدور مرقت من نفسنا ده شنو القرف ده يخسى عليك
سلط الله عليهم جميعا ..عالم زباله ..كنا نكن لهم بعض للاحترام والآن سقطوا سقوطا شنيعا هاويا الي اسفل درك …سلط الله عليكم
ياناس الراكوية إنطبق فيكم المثل ( البلقي هبوبوا بيضري عيشوا )
القمة اختتمت وانتهت ولم نر أو يظهر طه الحسين وشلته ولم يعطوا كلمة ولم نرهم حتى جالسين مستمعين ساي بين الوفود الحاصل شنووو؟
فرفشة شنو ورفع معنويات شنو .الرئيس يعاوده الحنين لأيام مغنيات وراقصات البلاط
الرئاسى على ايام الخلافة العباسية وعاوز يعمل زيهم ما هو خلاص فكت منو
وما بعيد بتكون قعدت خمرة وويسكى .
من حي المرغنية بالايدار الي كافوري وداعا ايها الفقر
عاد والله الطردة حارة شديد وتلزما جلسة فرفشة ، وقطع شك كمان الايام دي شايلين منو الريموت ومزوغنو فلو شاف الاخبار وفود جاية ووفود رايحة أكيد حيتلبش زيادة، الله يكون في عونك يا بشبش بقيت زرزور في ايد عيال.
الخبر ما ذكر شيء عن الرقيص
ولما لم اجد سلوي
كسرت ابريقي والدنا
وسكبت علي الثري كاسي
وداعا روضتي الغنا
وداعا معبدي القدس ِ
كان وقت علي الفرفشه والنكات ساهله واقل ضرر ..يا ريت تكون وقفت لحد هنا
براي سويتها في نفسي قلبي الاتعلق بترامب وكان واعي
هدى عربي دي أوعى تكون الجنها تهز اكتافها ؟؟؟؟؟ كان اياها دي ، فعلا ممكن تفرفش .
يعنى محمد لطيف قدر يقنع الرئيس ويدعوه إلى بيته اللامتواضع ، ده واحد من اثنين إما محمد لطيف ده كوز كوز بمستوى عالي جداً ، أو الرئيس ما عنده موضوع.
اقـتـباس :
الصراع داخل حزب البشير وداخل الحكومة بلغ مرحلة كبيرة جدا، خاصة ان الفريق طه ذكر في حوار سابق نُشر بصحيفة “اليوم التالي” اجراه رئيس تحريرها مزمل ابو القاسم والصهر الرئاسي الصحفي محمد لطيف، ان المرحلة القادمة لن يكون فيها التعامل عبر حزب المؤتمر الوطني، وانما عبر رئيس الوزراء ورئيس الجمهورية مباشرة.
——————————————————————————– طـبعا كلام صحيح طـالما تـم عـزل و تهـمـيش كل من صقـور الكيزان اصحاب الوجعة واللحم والرأس عـلى عـثمان طه ونافع عـلى نافع الذين اصبحا كالـزوجـتين الـلـتـيـن تـزوج زوجهـما عـليهما بزوجـتين اخـريـتـيـن .
اللهم افتن الظالمين بالظالمين واخرجنا من بينهم سالمين
الشعب مسحوق والبلد سمعتها ممرمطة علي الزباله
والزبالة مفرفشة
انا لله وانا اليه راجعون
زعلان عشان ماركع لى ترامب وباس جزمته
رئيس جزمه والمعاه جزم
اللهم إن الترابى والبشير وجماعتهم شقوا علينا فأشقق عليهم
جابت ليها قعدات كمان؟ الله يجازي محنك يا ترامب .. طيرت الصامولة الفضلت عند البشكير.
اخسى عليك…يالسر احمد قدور الفنان ..
اخسى عليك…يامصطفى السنى يامن (دوام تطرينا) بابوداؤود
…كنت احترمكم…كنت احترمكم!!!!!!!!!!!!
انتهت القمة بنجاح ابهر العالم .
و كسب السيسي الجولة بخطاب كله ضد الارهاب و التنظيمات الارهابية.
و غاب صوت السودان عن المحفل ؟؟؟؟
يا بشة لو عارف الشعب السوداني يكرهك قدر شنو كان عدمتونا كلنا وتقعد انت براك في البلد دا ترقص
خلقتك الواحدة دي مضيع بيه البلد كلو شخص واحد اناني وجاهل قاعد وفارض علينا عقوبات وووو
انطرب ساااااااهى ياملعون الخازوق راجيك
خازوق مغرى مان
ولم نر أو يظهر طه الحسين يادي الكسوف ناس دبي قاعدين ظاهرين لترامب وقابلهم !وقدر ماكوسنا الجقر ماليقناهو يكون ادس
فى الوقت الحالى البلد لايوجد فيها رجال تستحى
ونحن وهم كل يوم فى شان جديد وفضيحة جديده
وماقميص مسى وعباية الحبشه ببعيده
استحوا ياكيزان السودان عيب عليكم ولكن العيب من
ناس العيب ليس بعيب
يعني دي ظروفك الخاصة … خلاص ارقص يا اخوي الجماعة القمة إنتهت
أصابكم الفشل الزريع وحاولتوا جميع طرق القدر والخيانة طوال الثمانية وعشرون عاماً لتسقطوا البشير ولكن هيهات ،، وأخيراً عجزتم وبدأتم في السخرية عن أبو حسن ،، لعلها تنفعكم
لراحن خلوهم اقرعوا الواقفات…
البلد اتباعت اراضيها ل 99سنة الراحت خلاص الحقوا الباقى…
طه عثمان وزمرته شغاليين بيع ووزراء ونافذيين عاوزيين يسطلوا كل الشعب باستيراد مخدرات ..
..وخلوا العالم مشغولة بالحوار والكيكة..
يا جماعه هووو الحقوا البلد …باكر يقولوا ديمقراطية..ويعلبوا مع الشعب لعبة ملوص ملوص… يسلموها زى جنازة الابيض..
والحكومة الديمقراطية المنتخبة لا تجد الا غواء…زى العنكبوت لما يمص ضحيته يخليها ظاهريا بكامل شكلها واناقتها ولكن مجوفة جوفها هواء خواء…
الحقوا يا ناس هوووى يا ناس الفريق يا ناسى الحارة..
الحادبيين على السودان ..هناك والله رجال باقيين حتى فى داخل الامن الوطنى..داخل المؤتمر الوطنى هناك رجال اصواتهم تخنق…
انى لاحترق عشان هذا الوطن ..ينتخب البشير و يجى بشير يحكم من يحكم بس الارض..جدودنا وصونا على الوطن …حتى الاحزاب تتصارع لاجل الرفاهية ويدفع فاتورتها هذا الشعب المعدم الذى يصوم ويفطر العدم ويبحث عن السلام من انسام رائحة الدم وزفرات الهم خلو الجيفة والعصبية ويبقى كل السودان اولاد عم ونقول حرم..حان الاوان عشان كلنا نتلم..اعزلوا الناس الجايبة الغم..
السودانيين يختلفوا ولكن يتفقوا على الوطن الا ترى توحد السودانيين شعب وتنقراط وصحافة واعلام ضد مصر فى التصدى لحملتها..
روساء الدول مجتمعين في قضايا جوهرية.ودي مجتمع مع شلة الانس علي قدر أهل العزم تأتي العزايم.الحثالة الآتي احتفلت معهم يا البشير دول مستواك فلا تنظر أعلي من ذلك خليك مع السر قدور الشايب وما واعي
قعده بدون ويسكي وبنقو ،،،شن فائدتها ؟
رئيس موهوم ماعندوا وزن لادولي ولاافريقي ولاعربي. الهوية الهوية اصبحنا مجتمع منبوذ.
الرؤساء المالين مركزهم قاعدين مع ترامب والدلاهة الهمبول بتاعنا قاعد مع قدور !!!! في ذلة أكتر من كدة يا عالم ؟؟؟؟
بسم الله والصلاة والسلام على محمد
الله لا يبلانا..
اتاري عندو ظروف خاصة ده بالله عندو طرب جامدو مهم الشأن
كدا أعتز عن مشاركة في القمة.
موضوع البشير ده معقد شديد وضحك السر قدور ماب يحل ليهو مشكله وواضح من الصوره قدور يضحك وهو حتى ما اتلفت عليهو ووشيهو على غبرة – نسأل الله السلامه – ما معروف من شنو ؟؟ هل من دماء الابرياء التى أزهقها ام من الإحراج الكل يوم متعرض ليهو ده ؟؟ وعلى كل حال يا محمد لطيف إنت وللا طه تشوفوا ليهو حاجه تانيه بردلوبه حبشيه او إن شاءالله بتاعة ميسى ديك .
لماذا لا يعاقب البشير من حوله من وزراء وهم يتسببون في إحراجه امام العالم وامام شعبه لماذا يصر علي ان يحيط به هولا الفشلة الذين أوردوه هذا الذل وهو من رفعهم واستوزرهم يا ريس البلد فيها كفاءات ممكن تساعدك بس اطلع من محيطك والمتسلقين من كوادر حزبك. فانة مسي اكبر احراج ولاكنك تقبلت الامر ولَم تحاسب حراس قصرك الذين ادخلو لك هذه المهزلة حاسبهم فقد اغتنو بتشريفك لهم وما عادو يبالون بك
السر قدور تحول في اخر عمره الى (صبي رقاصه) يؤنس ليالي اسياده و يبذل الجهد لرضائهم و توفير الانس لهم … تبا لكم من حثاله
الزول ده مبارى الجداد من 89 فدي النهاية الطبيعية ذي ما بقول المثل لك العتبى يا وطن