الجاليه السودانيه في الخرطوم (حوش بانقا)!!
الجاليه السودانيه في الخرطوم (حوش بانقا)!!
ايمان حموري
[email][email protected][/email]
كل انسان في السودان لا علاقه له بالحكومه اوالمؤتمر الوطني يعامل اسوأ المعامله ويطفح المرء لكي يصل هدفه اومرماه وفي كثير من الاحيان حتي هدفك ومرماك يقلعوا منك عيني عينك مهما كان هذا الهدف كان رسالة دكتوراة اوقطعة ارض في الحارة 1000احيانا ينتابك شعور انك لاجئ سوداني داخل السودان لكن بعد شويه تفكر تجد
انو اللاجئ افضل منك حالا لان اللاجئين عندهم منظمات وهيئات تحمي حقوقهم وترعاهم. واحيانا تفكر انك سوداني من دوله سودانيه سادت ثم بادت وانت حاليا جاليه سودانيه داخل السودان الخرطوم حوش بانقا لكن تجي تفكر برضو الجاليات عندها سفارات وقنصليات لوحصلت ليك مشكله ممكن يشوفوك ويحلو ليك مشكلتك يا رجعوك بلدك. لكن هسه انت لو حصلت ليك مشكله وقلت تمشي لسفارة السودان في حوش بانقا والله الايرجعوك ترعة النشيشيبه!!!الجاليه السودانيه في الخرطوم تلقي الواحد ماشي في الشارع واتلفت لانو الشارع مامريح وكانك في بلد غريب وتتوقع في اي لحظه واحد يجي يقوليك اقامتك!! اخوي قاعد عاطل ليهو سنتين في الخرطوم سالتو قلت ليهو يا خوي انت عندك شهادات كمبيوتر مالك ماشغال؟ قال لي ما عندي ضهر؟ قلت لي بقلبي قصدك كفيل وطني (وانا رايت لي رؤيه كان صدقت بعد الرقم الوطني حايعملو ليكم اقامات وكان ما اخاف الكضب الكفيل نافع علي نافع) ياخي معذيبين الناس في معايشه لو عملت ليك حفاظة داندرمه ( ايسكريم ) يدفعوك رسوم ولو دخلت الحمام في السوق العربي يدفعوك رسوم لوشربت من البحريدفعوك رسوم لو خارج من وطنك تاشيرة خروج ولو داخل لوطنك تاشيرة دخول (لو ماصحي جاليه كيف تاشيرة دخول لبلدي )غير رسوم المدارس والمستشفيات والجامعات وغيرو وكان قعدوا للسنه الجايه بيدفوعكم رسوم ضؤ القمر!!! الرسوم البيدفعوها الجاليه السودانيه في الخرطوم اكترمن الرسوم البيدفعها المغتربين في دول المهجر كدي اثبتوا لي حاجه واحدة تدل علي انكم سودانيين وبتتمتعوا بحقوق المواطنة وما بتتعاملوا كجاليه سوادنيه في الخرطوم حوش بانقا
مع مودتي
ايمان حموري
والله يا أخت أيمان حمورى كلامك صااااح – وهذا المؤسف جداً في هذه الحكومة ولكن هذا التحيز سوف يعجل بنهايتها إنشاء الله – لأن المهمشين سوف يظهروا أخيراً ويدمروا كل مابناهو هؤلاء الفاسدين لأن الظلم ظلمات يوم القيامة – ومن الأحسن لهم أن يسكنو الشعب مما سكنو ويعلموا أبناء الشعب مما علموا أبنائهم – ويرفعوا كل أنواع الظلم والقهر والجبايات عن هذا الشعب ويفتحوا الفرص لأبناء المهمشين والفقراء والمساكين – لأن الظلم بطبعه لا يدوم والله ناصر المظلومين وعليهم الإنتباه لهذه الحقيقة الربانية …
إلى ايمان حمورى
انا الاغبش بن الغبش أبان مسوحا مى ، اشهد الله انى قد تعرضت لعشرات المواقف التى عبر عنها قلمك الرائع فى بساطة راقية ، وبما انى من اصحاب الوجعة القادمين من جحيم الاغتراب ، فانى ارشحك رئيسة للجالية السودانيةبحوش بان النقا بالخرطوم و التزم بكل النفقات التاسيسية للجالية و تقديم اوراق الاعتماد.و حتى تحظى بالموافقة و الاعتماد و تضربى عصفورين بحجر واحد ، يجب ان يتضمن برنامجك فرض ضريبةعلى التنفس بشقيه ، أي عملية الشهيق ، و هو سحب الاكسوجين من المخزون الاستراتيجى للطبيعة ، وعملية الزفير ،و هي تلوث الهواء بثانى اكسيد الكربون ، على ان تعفى الجالية السودانية منهذه الضريبة و ضريبة المركبات التى ى فرضت مؤخرا .و لا تنسى ان تستقطبى الخيرين من اصحاب حوش بان النقا من بنات جنسك ، وداد و فاطمة ، فمن يفعل الخير لا يعدم جوازيه.
شنو الخرطوم حوش بانقا ؟؟؟؟؟؟؟؟؟؟؟؟؟,.حكومة زبالة صح وسيئة وكل صفة ذميمة فيها وفي كل عضوية المؤتمر المعفن الفكرة واضحة لكن حكاية حوش بانقا دي دايرة شوية شرح مع تحياتي
احدي الاخوة المغتربين قدم الي السودان من ميناء جدة ايام ترعتي كنانة والرهد والمجهود الحربي ،، فرضت علية ضرائب ونصايب لا قبل لة بها ،،، اغترب مرة اخري وعادالي الميناء وجد الجباية باسم الفضائية السودانية ،، ولانبة بداوة لا يعرف شنو فضائية سودانية ،، دفع ما علية من ضريبة وفي نفسة شيئا من حسرة قائلا وكمان دي حفروها متين ،،،
انا فى السودان لما اصحى من النوم اعاين فى المرايا عشان اتأكد هل انا مازلت سودانى
والجواز اصلا ما بفارق جيبى اصلى خائف من كل شى ويوم اكون ماشى لاى ادارة حكومية اعبى جيوبى ورق واتسوك لغاية ما سنونى تبقى بيضاااااااااااء لزوم البسة وبعد دا كلو ارجع اقول ياريتنى ما روحت ياريتنى ما حولت ياريتنى ما استثمرت ياريتنى ماسافرت ياريتنى ياريتنى
ياناس السودان اتسرق
عوووووووووووك الحقوا البلد
الاخت الفاضلة / أيمان حمورى أصدقك القول أننا جالية سودانية نتبع لحوش بانقا بالسودان ال اليشير و لذلك أخترنا و فضلنا البقا ء بالغربة و نحن كسودانين بالمهجر نحس بأننا لاجئين و ليس بمغتربين لطول الغربة و الوضع الماسوى ببلادنا التى تسبب فيه ابالسة النظام و اصبحت أزمة وطن جريح – واملنا بفجر الصبح و ان ذلك قريب لو تكاتفت الايادى من اجل الوطن وا لشعب الجريح .
يا ايمان الظاهر ما سمعتي بالفنان الشايقي القال
تصور كيف يكون الحال اذا ما كنتت سوداني
واهل الحارة ما عارف ايه