أملا قلبك بالوطن ?!!..شعر / محمد الحسن سالم حميد
أملا قلبك بالوطن ?!!
محمد الحسن سالم حميد
أملا قلبك بالوطن ? بالصُّغارْ
قومة العمال دَغَش ? بالنّضارْ
المزارعية الغُبُش
بالجنود الوين تخش
في سبيلك كالنهارْ
بالمداد الما بيغُش
بي وتر جاء من الجحيمْ
أملأ قلبك بالنسيمْ
ملِّي بالطير الرطنْ
طيبة والعالم قديم
ينسى كالريح المحنْ
خلِّي بالَك مستقيم
دغري وإن مال الزمنْ
راحل الليل البهيم
والبصيرات ما عِمَنْ
الظروف الليلي أبن
طيبة لا خوف لا حزنْ
باكر التِّقْيات تنورق
وتنملي الضرعات لبنْ
طيبة يا صمت الحنين
كلما طفاهو همْ
لا في آهة ولا أنين
لا بيروع ليح ودمْ
من مرارات السنين
من عصارات الألْم
بيمرق الشوق الدفين
بي كعنكيل العشمْ
احكي ليك يا طيبة حكوة
ذات زمان من ضيق وقسوة
وكل يوم من بارحو اسوأ
والمراحات قاطي قطْ
فجأة في قلب السماء
غيمة غيمتين غيم ربطْ
كتمة حتى الطين عِرِقْ
والشجر قرب يَبِقْ
إلا يا طيبة الخَلِقْ
من بدل تفرح تَنِقْ
الشِّكايات السخط
لا السُّحب دارت تَصُبْ
لا الهبوب داير تَهُبْ
نسمة نسمة آ رب هبوبكْ
من شمالك من جنوبكْ
الهبوب يا رب هبوبكْ
من شروقك من غروبكْ
من تحت من فوق هبوبكْ
كتمة كتمة معاها ضيقة
نسمة يا رب الخليقة
سكت الأطفال دقيقة
نبكي خش آ حول في حول
ظاهر الحال ماهو مخفي
وقولنا فيك ما فيهو قول
نسمة كل راس ساعة تكفي
نسمة واحدة لألف زول
ينطلي الجو بالَحمَارْ
فجأة من حر لي غبارْ
الطشاشات الدّوارْ
السبابات النِّقارْ
نقة الضيق تنطلقْ
قلنا فاقت باتت أزحمْ
الغبار من كتمة أرحمْ
أرحم الحر البيلحم
لا ده لا ده ولا فرق
طيبة تمي الحكوة قولي
الصّبرُ خلقوهو هولي
الزمن يقسى ويَرِقْ
وانتي يا كتمات تطولي
اليطول بال الخلق
طَرِّقْ الغنوات يا زولي
عدّ فات الريح شَرِقْ
من بعد ما جاب سحاب
من بعد قشّ التراب
مشط القش والشجر
رجّع الطير للوكرْ
ها البرق شال البرق
الرعد ريحة الدعاش
ابشروا بالخير نقطت
أي والله المطر
;( ياسلام عليك الحبيب محمد الحسن سالم والله انت اروع انسان فضل في السودان وربنا يرجع الايام الجميله للسودان الفضل حيران من المنافقين الكيزان .
حميد ما بنقدر نعقب وراهو \ مرة في رمضان قبل المضي استضافوه مع القدال في غفلة زمن من الكيزان القدال قرا قصيدة لي حميد بعد انتهي حميد صحح ليهو حاجة القدال شعر حميد استعصي عليهو ابقي معانا حق نستعين بي اصحابنا الشوايقة يترجمو لينا الدرر بتاعت حميد ويفكو الطلاسم لك المغفرة والرحمة مصطفي سيداحمد الوحيد البتقدر تجاري العمالقة ديل وقدمت ما قدمت
حميد الشايقى الجلابى المندكورو ودالبحر …………….. الخ.
خم وصر
يا زهير ! حميد شايقي وجلابي ومندكورو و ود بحر ، و أزيدك من الشعر بيت : وأفصح من نطق بالعامية ، وأفضل من عبرّ عن هموم ومشاعر الغبش من حلفا لي نمولي ، وأشجع وأرجل و أصدق من نظم شعراً ، أمثال حميد كالنجوم البعيدة اللامعة في عتمة سماء بلادي .
اها يامعارضة رايكم شنو انو حميد فى لقاء صحفى لمن سالوهو عن صلاح عبدالله (قوش) قال: ودعبدالله البعرفو انا ممامكن يضبح فرخة خلى يعذب.
سوال: حميد كضاب واتفنس ولا المعارضة كضابة ومانذيهة؟
اخيرا لانو حميد راجل صادق وجميل اثر ان يعتزلنا جميعا حكاما ومحكومين
اجمل ما كتبه حميد :
تعب لمن ضلي المعاي لاوز رجع …. انتكل فوق الصبر قام الصبر ميل وقع
اعتقد ان اروع ماكتبه حميد هو : يابحر الحاصل لاك ناشف :cool: :cool: :cool: :cool: ولا قلمى فى ايدى عصا موسى
حس الصغار في الموية والقعو والمعوز,,,,,,,,,,,,,,,,
طراهو للديك العجوز…………………
يالضو يجوز؟………………
ينجا ويجوز؟……………….
والله انت اشعر اهل الارض ربنا يحفظك ياحميد