(بيضاء) في حياتنا !!
*عمر الجزلي إيه اللي يتم تكريمه؟!..
*أقول هذا رغم إني كنت من أول- وأقوى- الداعين لذلك..
*عمل إيه عمر غير (اسماء في حياتنا)؟!..
*ولكن هنالك من عملوا (حاجات في حياتنا)..
*وهم الذين أولى بالتكريم من بتاع (الكلام) ده..
*يعني مثلاً عصام صديق أدخل (البركة) في حياتنا عبر حكاية (البكور)..
*فبسبب البكور هذا صرنا نهرع إلى الشغل بدري..
*وأطفالنا يشقُّون الكلاب نحو مدارسهم من بدري..
*ونعمل بهمة واخلاص ونشاط من بدري..
*وحاجاتنا كلها تنقضي في دواوين الحكومة من بدري..
*وفتنا العالم كله بساعة زمن كاملة..
*وكانت النتيجة أن قفز دخل الفرد منا إلى (2600) دولار بالصلاة على النبي..
*وبرضو تقول لي الجزلي ومش عصام ؟!..
*وأيضاً من الذين يُفترض تكريمهم نواب البرلمان..
*فهم أدخلوا ثقافة برلمانية ما سبقهم بها من أحد من البرلمانيين..
*ثقافة التناغم بين الجهازين الرقابي والتنفيذي..
*التناغم إلى حد (التطابق) الذي يستوجب (التصفيق)..
*وأتحدى أي واحد يقدر يميز بين صفقة كورس محمد النصري وصفقة النواب..
*وهذا بالضبط هو هدف الصفقة داخل (الصالة)؛ أقصد القاعة..
*(تشجيع) الحكومة على (الأداء) بدل مناكفتها..
*يعني هسه لو في نشاز بصفقة كورس النصري مش ح (يشاتر) هو؟..
*أهو بالضبط دي فلسفة نوابنا (الفنانين)..
*أن تضبط الحكومة (أداءها) على إيقاع (صفقتهم)..
*والهدف في النهاية هو مصلحة الشعب..
*فحقكم علينا- إذاً- يا نواب لحد ما يتم تكريمكم..
*وتقول لي الجزلي ومش نواب الصفقـ(مان)؟!..
*ويستحق التكريم أيضاً اتحاد أسامة عطا المنان..
*فهو أعطانا نموذجاً في (الوفاء) تجاوزنا به ما يُنسب إلى السموأل..
*وفاء تجاه المدرب مازدا رغم مرمطته لسمعتنا الكروية بـ(الثلاثيات)..
*والآن بعد أن جيء به للمرة العشرين لا يصح أن نقول (أوفى من السموأل)..
*وإنما (أوفى من أسامة)!!..
*وكذلك يستحق التكريم حسن فضل المولى..
*فهو رد الصاع صاعين لراغب علامة عبر شاشة قناته (النيل الأزرق)..
*ومش راغب وبس وإنما كل العرب (المسترعبة)..
*وأثبت له أن السودانيات (بيض وحلوين) زيهم وزي اللبنانيات واحد..
*وفوق كده صار اللسان واحد برضو ومفيش فرق..
*يعني تشابه في (تعطيش الجيم) وترديد مفردة (حابِّي) و تكرار جملة (الو مرحبا)..
*والحكمة في مط الصوت بعبارة (أهليين وسهليين)..
*وانداح (الفسخ) من فضائية حسن إلى شاشاتنا الأخرى..
*ثم إلى الشارع لنرى (البيضاوات) في كل مكان..
*أفلا يستحق التكريم رجل ارتبط اسمه بشعار (بيضاء في حياتنا)؟..
*وتقول لي (اسماء في حياتنا)؟!!
الصيحة
ولا تنسى أهمية تكريم البشير يا أستاذ! فتدمير بلد بحجم السودان وخيراته وتدمير السوداني بكل ما يتمتع به (أو كان يتمتع به) من كرم ومروءة وخصال طيبة وفي أقل من 30 سنة ليس بالأمر السهل البتة!
لقد اضاع عمر الجزلي فرصة العمر ببرنامجه اسماء في حياتنا فقد كان من الممكن ان يكون هذا البرنامج كتاب تاريخ وعلوم واقتصاد لكل السودان و ربما صار مرجعاً لاي دارس يود الكتابة عن تطور السودان في شتى المجالات ولكنه اي عمر اراد وحده ان يكون المحاور في العلوم و الطب و الادب و الاقتصاد لذا لم يستطع ان يستخرج من ضيوفه سوى القليل. برنامج مثل هذا يحتاج لفريق عمل متكامل يدرس تفاصيل حياة المستضاف و اسهاماته العلمية و الفكرية و الادبية فياخذ منها الكثير و يقدمه للمشاهد.
مش معقول رايع رايع بيجنن بيخرب العقل اكتير اكتير مهضوممش عارف ايش اقولك انت دايما متفوق علي نفسك يا عوضه توت وللناس لما بيفهموا اللغه النوبيه توت معناها ود عوضه ربنا يحفظك يا حريف وزواق واجرف من عوض الحاج ود امبكول
عجوز هجمت على بنت وهاك يااحضان وبوس .قالت ليها ياحبوبة ماعرفتك .قالت ليها انا ذاتى ماعرفتك بس طولت ماشفت لى بت خدره.
و يستحق الوزير حسن اسماعيل التكريم لتطويعه الحروف اجلالآ لكرسي الحكم المحلي .
الله يهديك يا ود عووضة !!
وتنسى تكريم عراب الانقاذ؟؟
الشيخ حسن الترابى الذى خطط لثورة الانقاذ الوطنى ضد حكم الصادق المهدى الانقلابى وخلق من السودان دولة موحدة مزدهرة تنعم بالسلام والرخاء والاستقرار السياسى والتداول السلمى للسلطة وكما اقول دائما اهم حاجة انه ادخل اهل السودان فى الاسلام وحولهم من عبادة الاصنام لعبادة خالق الكون الواحد الاحد!!
ايه الحلاوة دى وحدة واستقرار وسلام ورخاء وحرية وديمقراطية وكمان نور الايمان
ياااااااااااااااااااااااااااااه ده كتير اوى!!!
ياخى ده مفروض يختوا صورته فى الجنيه السودانى مثل جورج واشنطن وبقية الآباء المؤسسين للولايات المتحدة من اخوانه قيادييى الحركة الاسلاموية!!!
انا ما عارف الحكاية دى فاتت كيف على حكومة السودان الانقاذية؟؟؟؟
من الواجب ايضا تكريم كل قيادات وعصابة الرقاص لانهم تفوقوا على ابليس فى النفاق والضلال والتضليل وفعل النكرات
من الواجب ايضا تكريم كل قيادات وعصابة الرقاص لانهم تفوقوا على ابليس فى النفاق والضلال والتضليل وفعل النكرات