بالصور والفيديو: أسباب تظاهرة بورتسودان .. وملاحظات حولها

شهدت مدينة بورتسودان تظاهرات بالامس احتجاجاً على انقطاع خدمات الكهرباء والماء، وعلى الغلاء.. فقد وصل سعر لوح الثلج إلى 400 جنيهاً، وجوز الماء إلى 20 جنيهاً..
وكان الناس قد خرجوا نهاراً واستأنفوا التظاهرات بعد الأفطار.

وعلى فيسبوك وصف الناشط مُصطفى عثمان ما حدث كما يلي:

عن الحِراك الحصل الليله :

أولا ً : التحية لكل النِسوه القامو بشرارة البدءِ حينما عجزنا او تقاعسنا نحنُ كرجال عنها .

ثانياً : عشان ماننقص من حق زول الحراك البدء بكوريا دا ما اتوقف عندها بل شمل كل احياء بورتسودان من ” ميرغنية ودار النعيم وديم جابر وديم سواكن ودارالسلام وسلالاب”

ثالثاً : الناس مُستاءه الى درجه بعيداً جداً والحكومة والمسئولين مفروض يعو الحكاية دي ” نساء رجال شباب شيوخ اطفال ” كل الناس دي بكل اطيافهم مستائين الاطفال بقو بتكلمو ف السياسية ومابقى في خافي عليهم ولا خوف لديهم .

رابعاً : أنحنا كتار كتار جداً والله وكل واحد فينا الفيهو مكفيهو ، كل واحد عاوز يحس ف بلدو ب الامن والامان عاوز يحس انو مواطن ، كل الطالبنو انو تتوفر لينا عيشه إنسانية ما اكتر ، ماعاوزين رفاهيه ولا عاوزين معامله من نوع خاص ، كل المطلوب انو مقومات حياتي من مويه وكهرباء وغاز وبنزين وعلاج تكون متوفره ما اكتر .خامساً : زي مانحنا كتار الا انو الحراك دا مابينجح او يكون ليهو اثر فعلي الا ب اشياء زي:

* انو الناس تسيب التخاذل وتبقى جاده في دوافعها الطلعتا برا

*الناس دي كلها قاعده ع الهبشه ناقصاهم قياده رشيده تتكلم ب اسمهم وتبرمج الحراك .

سادسا ً: المُلاحظ من حراك اليوم إنو معظم الطلعو من النساء الاطفال صغار السن والمااتعدو 12_14 سنه مع قله من الشباب والرجال .

سابعاً : الناس تبعد بقدر الامكان من اعمال التخريب البتتم دي ومابتزيد بل بتنقص شغلنا دا لدى الشارع يعني مثلاً انت عاوز تظهر إنك غضبان ومستاء تقوم تكسر عربية زول ولا تكسر دكان زول !!! مامنطقي نهائي الكلام دا هنا انت ماحتلقى تعاطف بتاع العربيه الممكن يوقف عربيتو ويطلع معاك ولا حتاخد مساعدة بتاع الدكان الممكن يساعدنا كلنا في حراكنا فرجاءً بالله رجاءً الناس تبعد من الحته دي وهنا يكون دور القياده الرشيدة البتعمل كنترول للبرنامج والشباب الواعي موجود والله .

ثامناً : الناس البتحبط الشغل وناس تموتو ساي وناس البرنامج دا مانافع ابعدو منهم قدر الإمكان

تاسعاً : الناس ماتثق ثقه كليه في متسلقي المعارضة ، اي نعم هم ليهم دور ف التوعيه والارشاد والقياده لكن ابعدو من تسليمهم دفة الامور .

عاشراً : سواءً البنعمل فيهو دا نجح فعلياً أو مانجح ف أعتقد انو الناس نفثت ع مابداخلها شويه كدا

[SITECODE=”youtube z6jyLbKdbGU”].[/SITECODE] [SITECODE=”youtube 9onCZ7wSj0g”].[/SITECODE]