القضاة.. هل هم قساة؟؟

يا عصمان….يا عصمان…قضاة شنو…دي علينا ؟؟!!
شنو يعني القضاة لو كانو قساة….؟؟!!!
إحتسبو….أهو الشيخ أمين حسن عمر استاذ علم الجينات المعاصر
أثبت إنو الشعب السوداني…جِدو الكمييين كدا لى ورا….هو نبي الله أيوب عليه السلام(أنا شخصياً إتكيفت للحتة دي….أصلو أنا منقنق كيف يكون جدي هو ود الحسن….وحبوبتى هي البرتكان بت العباس ود احمد) فمن الناحية دي الواد لقا لينا جِد (آخر آلِسطا)…وكمان ربطنا بي قيم السما بدل ما نكون مطلوقين كدا في صحاري وادغال إفريقيا…
حِلو الواحد يكون جدو (أيوب) النبي…..ولا شنو ياعصمان!!!
أها الواد المنخنخاتي دا….طالِع تفتيحة ، ومقدِد عيون الكتب ومناخير المعرفة…قال إيه!!
قال جدنا دا …يعني قاصد ايوب النبي….قال دا نبي بتاع صبر…دينو وايمانو الصبر…
شايف ياعصمان….المنخنخاتي أمين….قال جدنا أيوب النبي دا ورثنا كووووولنا كدا نحنا السودانيين…آآآآي ورثنا الصبر على المحن والمصايب….والبصبر بِدخل الجنة
الراجل نخنخ بوضوح وبشر كل الشعب السوداني (شَت) بالجنة….
…أنا شايف يا عصمان موضوع قانون الصحافة دا مضروب…ولا القضاة لطيفين ولا قساة ماتشتغل بيهو كتير
ألحس كوعك معانا….حاول تذكر أصلك…إنو جدك حسب دراسات النخنوخ أمين حسن عمر هو النبي أيوب…وأيوب دا بتاع صبر وحاجات زي كدا….فإنت زاتك اصبر معانا…والجنة بتشيلني وتشيلك ولا شنو؟؟!!
وكبِر دماغك…إنت أصلك قلتا إنك خريج المدارس والمعاهد المصرية….آآآآي كبِر دماغك…إديلها مَية تديك طراوة…أُمال إيه…خليك في التنك ياعصمان…إسمع الكلام

اهم حاجة العصيييييير…. العصييييييير….العصير كان بارد!!! ولا مخستك؟!!
الإسبلِت الباااااارد يكون ضارِب في وشك…ياخى دا المهم…!
القانون….؟!!!.. ما عليك …سيبك منو…ما تشيل همو…ما هو 30 سنة إنت من الجماعة وعارف الشغل والحاجات الهلُم دي بتمشي كيف…آهو شغال معاهم في الكار ، صحافة وكدا ، والأمور ماشة زي السِلِك ياباشمهندس….القانون سيبك منو
أهم حاجة العصيييييييير والترطيبات… والإسبلِت…أهة كيف؟؟؟!!

….بعدين في حاجة مهمة….الواد الرزيقي…..آآآآآآآي الصادق الرزيقي…النقيب بتاعكم دا يا خي… كان مطقِم…ولا جا الجلسة مبشتن؟!
….أنِحنا غايتو .. القانون اصلي ، ولا مضروب في تايوان…ما فارقة معانا…آآآي والله 30 سنة شغلكم دا ما فارق معانا…ما هو الشيخ اللوطي ، دخلُم الجنة تووش ، شُهدا….وهاك يا عرسان ، وحورعين ،ومِسِك ،وخُمرة ،وصندل ،وكليت وشاف ،وطلح ، وبشتنة ودخاخين…وآخر sex في البارادايس…وتغاطيس في اللبن ، والعسل…والكرفوازير….بعد شوية الشيخ الكوديانة …إنتبه كِدا.. سحب كلامو…وقال ديل شوية فطايس ومعفنين و حاجات زي كِدا…وما في زول قال بُغُم…!!!
..هسع النسخة المعاك أصلية..ولا تجارية…دي ما قضية كبيييييرة….فإنت مافي داعي المسألة تديها أكبر من حجمها….شنو يعني فَرَقت….؟!
…إعتبرا زي طبخة الفطيس اللوطي ترابينا (أنا قُتَا ليهو يا خِي إنت روح أمشي القصر رئيس…. و انا حأروح مع الجماعة على السجن حبيس؟؟؟!!!)…لغاية ما الأمور تروِق شوية…وبعد داك ليها الف حلال….وقد كان!

فيا (شيخ) عصمان…القانون أصلي ولا تجاري…المسألة دي ما تهتم بيها كتير كدا دا…إنت بس خت بطيخة صيفي في كرشك وارقد قفا…وما تشتغل بيها…وكمان ما تشتغل بينا !!!
أهم حاجة العصييييييير…و الإسبلِت
أها كيف….كان بارد!!!؟؟؟….ولا مخستك؟؟

بعدين عليك الله دا تلفوني00966506386311
أضرب على لو عندك وَكِت…وريني….عليك الله الصادق الرزيقي كان في الجلسة ?مطقِم…ولا بشتنة….
أنا غايتو الصادق دا ….آآآآآي الصادق الرزيقي…نقيبكم دا أهم
لى من مجلس الوزرا ….آي والله أهم عندي من مجلس الوزرا زاتو!!
ياخي الزول دا قَعَد يطلِع دين الجلابية ، والعمة ،والشال ،والنعالين…عديييييل كدا دا…غايتو حاجة ما تخلص….
غايتو الود دا لو قلب….ولا فكو التسجيلات …محلو مع ناس الفتة…والرز باللبن
خليفة خلفا جاهز…والمراغنة ما بقصرو..يا رب بهم وباآلهم عجل بالنصر و بالفرج…..وهاك يا هزة جعبات…!!!
ولفة عمتو…قدُر ما حاولت ألفها زيو غلبتني…..أقيف قِدام المِراية بالساعات ….ما جِبتها …لفة الرزيقي دا…!
والله …والله مرتي قالت لي إنت ما تسألو …!!!
قلتا يا ولية إنتي معا منو…؟
.قالت لي ما معاك إنت…!!!
طيب أسعلو أقول ليهو شنو…يا مصيبة!!!
بي حرقة كدا….نبحت فينى

قول ليهو (بتلِفها كيف)..؟؟؟!!!

..لغاية يوم الليلة دي مقطِعا في مصارينى…(بتلفها كيف؟!)….(ياربي الولية دي بتقصد شنو)؟!!

أها إنت يا عصمان ما وريتنا الواد النضيف الانيق …الرزيقي دا…نقيب الصحافة دا….نَضَم …ولا …ما نَضَم
و…كان نضم قال شنو…؟؟!!!

….والله ياعصمان أنا غايتو … دا كل البهمني في الجلسة بتاعتكم دي…أما الورقة دي …قانون الصحافة… فخّّّذها معك….لعلها تنفعك إذا أردت (الخلاء وقضاء الحاجة) ….مواد سايلة …ولا تقيلة… صدِقنى يا عصمان
حتنفعك (مطالعةً أو مسوحاً)….او الإثنين معاً….!!!
….يعني في كل الأحوال ما حتضُرِش!