التعايش من الإقتصاد المُنهار

الهادي بورتسودان

كل السودان ما قادر يتصالح مع حكاية إقتصاد منهار دي، محل ما تمشي حكاوي ما تنتهي كل زول يحكي ليك تفاصيل وفروقات أسعار بإستغراب وإندهاش، وتسمع كلمة جشعين في كل مكان .. الأسوأ مافي زول بعمل تنبؤ وتصور Forecasting , للوضع على شهور مقبلة قبل ما يتفق على أسعار :-
– أصحاب الوكالات ناس الحج السياحي ، أعلنوا أسعارهم للحج بعد حسابات بواقع 10 جنيه للريال ، إشترو الريال 13 الخسارة حاصلة لا محالة أكيد حا يقللوا من شروط الخدمات في المشاعر ، حتى حج الحكومة الأتفقوا معاك فيهو ما يحتنفذ ، لأنو الريال إرتفع 30% .. ما مفروض نلوم الوكلات مفروض نلوم الزول المتسبب في الواقع المزري
– صاحبة مدرسة خاصة سعّرت الرسوم الدراسية في أول العام الدراسي ، هسه يادابو مشى ليهو شهر .. أكيد المشاكل حاصلة وأسعار الخدمات المفروض تقدم للطلاب أكيد إختلفت يا ترفع السعر يا تقلل الخدمة . مافي داعي للشكية لو ألغوا مناشط محددة أو رفعوا السعر تاني
– مهندس مباني شغال ليك اداك أسعار شال دفعة مقدمة وبدء في التنفيذ ما يقدر يتم ليك وحا يتعثر بعد أيام ما تلومه لوم الفيل
من هسه بنهاية ديسمبر الجاي إحتمال الأسعار كده : 20 جنيه رطل اللبن – 22الجنيه للريال السعودي ? 85 جنيه للدولار ?10 الف طن اسمنت ? 60ألف طن الحديد ? 50جنيه طلب الفول ? 10 -15جنيه أقل مواصلات – 50جنيه كيلو السكر .. وكل حاجة حا تكون بالمنوال ده .. بعدين ما نجي نستغرب ونسب ساكت .
البلد منهارة إقتصادياً وده ما كلام معارضة حتى الإقتصاديين الكيزان عارفين الكلام ده و بقوا يقولوهو على الملأ ، البلد خارج المنظومة الدولية مافي زول بيقيل عثرتها ولا يمكن تصمد براها ، البلد فيها فساد لا يطاق ما نسمع مكافحة الفساد الديكورية دي ، البلد الوحيد في الدنيا دي أغنى مافيها الدستوريين .. لحدي هسه بيمشو إجازات وعايشين عيشة ملوك و البلد شغالة أقتصاد رزق اليوم باليوم مافيها تخطيط إستراتيجي وكل الفئات الشعب مطحونة حتى أصحاب الأعمال ،
الكيزان الفاضلين حول البشير بيعصروا في رؤوسهم كيف نطلّع وهمة جديدة تضلل الناس ونصبرهم .. بترول الجنوب حا يبدأ الضخ .. نعمل وهمة نسميها نفير الإقتصاد .. كلو كلام في الهوا ساكت “وأقتصاد الوهمة ” .
البلد دي مشكلتها واحدة والفيل معروف ومحدد يا تخلّصنا منو ، يا إرتضينا بيهو وما مفروض نزعل لو وقفنا في صفوف ، وللا من بتاع مطعم وللا بتاع بقالة أو كريز وأو صاحب مدرسة زاد الرسوم ، وللا حتى موية وكهرباء ..نحن لو حانرتضي بسبب الإنهيار يبقي نتحمل ، وتسارع الإنهيار ده متزايد لحدي 2020 نحن ما متصورين الوضع من هسه يكون كيف ، ويمكن الإنهيار يستمر لحدي 2025 إذا كتّفنا يدينا.