سودان جديد ، مبروكة أول خطوة
العالم عرف سودان نريدو ونهوى
يا كوز إنقرع كنداكة قايدة الصحوة
و يا وطن الأسود أبشر شبابك صفوة
بي دم الشهيد سودانَّا وِلدو جديد
محجوب يا شريف، أهديتنا أحلى قصيد
حمّيد في النضال شِعرك هتاف ونشيد
ويا الشعب العظيم أبدعت يا صنديد
سودان جديد، والشعب ريس و قايد
في حب الوطن لا برخي لا بيزايد
الحاسد عرف، يا وطني مجدك عايد
يا كوز السجم، أمنع نفاق ومكايد
سودان جديد، حرية نفحت نفحة
إنفتح الكتاب مدنية أول صفحة
السنبل برز شايل المباهج لوحة
بي صوت الشهيد كنداكة زغردي فرحة
سودان جديد، درب الإرادة سلامة
ميراث الشهيد، عزة وشموخ وكرامة
حي على الفلاح، فوق الخلاف نتسامى
بالعمل الدؤوب، تحرس وطنَّا حمامة
ضياء الدين مدثر رجب
برلين / ٧ سبتمبر ٢٠١٩
تمام دكتور وكلنا امل.