مقالات وآراء

عندما اعتذر لي حمدوك

جاء فى الصحف ان رئيس الوزراء حمدوك يعتذر لتأخير تشكيل الحكومة للشعب السودانى و حقيقة الامر اننى غير مصدق رئيس الوزراء شخصيا يعتذر احس انه بعض من حلم و ان (مدنيااااو) شئ حلو , و بمناسبة (حلو) ان الحلو اعلن انه سيتعامل مع حكومة حمدوك , و بما اننى احد افراد الشعب , يعنى اعتذاره اعتذار لى شخصيا  , مافى مشكلة فنحن تأخرنا 30 سنة بقت على الشهر ده و لا يهمك يا ابو الشباب , بلاى كده حا تتعامل الحكومة يعنى عادى كده ارد عليك و الحاله واحده شكرا و لو سمحت , و اسف , ياخ انحنا نسينا الكلمات اللطيفة ده , تهذيب و علم وتواضع.

ففى ازمة المواصلات , قالوا لينا الدلع اصاب الشعب و ذكرونا ركوب الدفارات و لمن قلنا العيش قالوا لينا علمناكم الهوت دوق (نقانق) و ترجمناها بذكاء فوجدناها الكلب الحار فهوت بمعنى ساخن و دوق كلب , و البتزا , فصلناها اتنين طلعت بيت بالعربي و زا بالانجليزى تعريف (ال) و بعد ذلك ادركنا هى حق للأمن فى المطارد و دخول ألبيت و ايضا الرئيس المخلوع عندما تظاهرنا و ارتفع صوتنا ( بتسقط بس) هددنا فهدينا حيله قال لنا المزيقا لو دقت كل فار بدخل جحرو , ثم اختفى كثير من قياداته فى الجحور و نعت الشعب بالخونة و العملاء و المندسين , فوجدناه قد دس فلوس البلاد , و نافع قال لنا الحسوا كوعكم فأحضرنا صاحب لسان طويل استطاع ان يلحس كوعه فلا شئ مستحيل لدى الشعب, يعنى انحنا متعودين على انو نتنبذ و يسيئونا و يتجاهلوا كلامنا , و الضرب و السجن و الشلوت لسه ما مصدقين فمن اعلى درجات الخشونه الى النعومه طيب درجونا فبراحة علينا  , و بما انا اذن ومن باب اوربا و الانجليزى ( take it easy ) فتيكت ايزى يا عزيزى , ادونا طيب فرصة او ثغره نعارضكم بيها.

ومن المدهش للشعب اعلان رئيس الوزراء ان الحكومة الانتقالية ستبدأ العمل فورا  و الله بالطريقة ده و الدلع ده حا نحلف ما نخليكم الا تقعدوا معانا طوالى قال انتقاليه كيف تقول انتقاليه و انت داخل عينا بالتقيل كده ,  و كمان العمل فورا لا كده كثير , اتعودنا على حبل المهله اربط و احل , اين احتفال و استقبال السيد الوزير و التهانى و الحلاوة و الرقص و السفر و المؤتمرات و الفعاليات العالميه التى كانت تعود على الوزراء بالخيرات و على البلاد بالبلاء.

فالوزراء الذين ذهبوا كان عندهم شنطتين واحدة فى البيت و واحدة فى المكتب , مساكين هؤلاء الوزراء عمل طوالى ,تجيب وزراء اشغلوا طوالى كده وزارة بدون سفر و مكاسب ده تكون كيف , و سؤال سخيف شويه عن فقه التحلل بالنسبه للوزراء الجدد بالنظام القديم وله فى نظام جديد  ؟ و الظاهر بعد كده حا تخربوا طبعنا و الشعب حا اخلف رجل على رجل و اقول ليكم عملتوا لينا شنو , ياخ معقوله كده.

عمر عثمان
[email protected]

تعليق واحد

  1. الشعب سيخلف رجل او يخلف رجل. لا اعلم لماذا معظم السودانيون يكتبون حرف ال الف بدل حرف اليا. تحياتي.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..