مقالات وآراء

حبا وكرامة

علي الكوباني

حقيقة يا أحباب ..انا واحد من الناس الذين احبطوا قليلا وامتعضوا من الاستاذة أسماء محمد عبد الله وزيرة الخارجية في تلك المقابلة التلفزيونية..وامكن تكون من قصة الاجوبة البتتقري من الورقة والتي لم نتعود عليها..ولكن كما قال بعض احبابنا..انو بعد الخرمجة الكثيرة التي خلفها الكيزان في العلاقات الخارجية ..مفروض وزير الخارجية في العهد الجديد في اي لقاء مش يكون مذاكر وبس..بل لازم يشيل معاهو بخرات تقيلة..لأنو زمن الجليط لازم ينتهي…
اها كمان يا احباب جماعتنا زادوا الانتقاد شديد جدا ..وبقوا الناس يتكلموا عن العمر الكبير ..وكلام ما حلو عن الشكل والغلاف..(وبتشبه الفاضل سعيد وما ادراك ما ابو اللمين..😢😡).. أجيي يااا الغلط ..كمان جابت كلامات زي دي..والسيدة الوزيرة شكلها مقبول زيها وزي اي سودانية طبيعية(بدون اي فسخ وجلخ ومحسنات بديعيةوحاجات تانية منكورة🙊)..
وطبعا ما فات عليكم ان بني كوز استلموا الحكاية وزادوا النيران..والاعجب فيهم كمان العملوا منشورات بدون اختشاء وبقوا يقارنوا بين بعض وزيراتهم الفيهم شوية سماحة مع وزيرتنا الهمامة..🙊
ده كلو عشان السيدة الوزيرة اسماء جهزت كشوفاتها وشرعت في تنظيف الخارجية من الكيزان واذنابهم..بالاضافة لبداية ضرب مواقع الفساد في كل السفارات الخارجية وخطط لتقليل الصرف على السفارات والأسر..وحاجات كتيرة قوية متوقعة في الايام القادمة..وأي كوز لبع ان شاء الله يورو واااحد يبل شعرو وينتظر الحلاقة..😎
يا اخوانا كلنا عارفين انو الحضور والقبول من الله ..لكن طالما الزولة دي بتأدي المهمة الموكولة لها وبتجودها..تاني شنو..؟ يبقى نحن يا زول.. لا عايزين غلافك يكون سمح ولا ابتسامتك خلابة..الحاجات دي ممكن تكون مطلوبة في مهن تانية بس في الخارجية دايرين زول واضح وقوي ودبلوماسي وشرس في نفس الوقت..وكمان في الفترة الانتقالية بالذات محتاجين لزول يكون عارف وخبرة في العمل الدبلوماسي الاصيل وذاق مرارة الفصل التعسفي للصالح العام من اجل التمكين اياهو..وأهم شي يكون بعرف يبطح الكيزان الفاسدين ويزنقهم زنقة الناقة الأبت المعدية..😅
زمان الحبيب الراحل د.عوض دكام رحمه الله.. قال لي ..تعرف يا ود الكوبانية..الله بسخر بعض الناس لبعض المهن والمهام من دون باقي الناس..وامكن الغالبية يستغربوا في مدى اهلية هذا الشخص لهذا المكان لكن يكون هو المعلم ذااتو..قال لي مثلا..استاذنا مستر عامر مرسال-نطاس واستشاري جراحة العظام رحمه الله..كان غلافو كعب لكن يجيبوك ليهو مكسر كسير الضلع (ونكير فاكيك بضمانة 😅)..يظبطك عمليات وسلوك ومسامير بعدها بستة شهور تقوم تنطط زي حمل الخريف..😅
وانت مثلا يا عفنني غير مشرحتك دي اصلي ما بتخيلك تبدع في اي تخصص تاني في الطب..😳
وكمان في الطب النفسي صاحبنا الرائع ..د.عبدالعزيز استشاري النفسية (المعروف بعبد العزيز حَلّه)..ما اعتقد بناسبوا مكان غير مع ناس السلوك الراخيه ديل😅
قال لي عبد العزيز حله ده غير الطب النفسي والحلل المسبكة تاني ما بعرف اي شي في الدنيا..😂 وتجيهو بتتكلم بره من راسك (زي الكيزان بعد الثورة😜) يوزن بوبينتك بكهربا معقولة ويصنفر ليك بلوفة مخك لمن ترجع تقسِّم تاني زي الفل..🤣
بعدين انتوا د.حمدوك ده قايلنو اهبل ولا عوير..؟ يعني هو شخصيا اختار الزولة بعمرها الما عاجبكم ده وغلافها البسخروا منو بعض الناس..😏يعني اختارها مجاملة ساااكت من دون كل المرشحين ..؟ بالعكس ده اختيارو الأصر عليهو ومعناها هو مراهن عليها..👍
وان شاء الله اتوقع ان تكون الاستاذة اسماء من احسن الوزراء في التيم بتاع حمدوك..وتبدع في تفيذ الرؤى والتطلعات لعلاقات خارجية ممتازة ومتكافئة.. بس وصيتنا يا سعادتك ان ترجعي للسودان عزه ومكانته بأن يعود مبدأ المعاملة بالمثل الذي كان يميزنا..وأي بلد بتعامل السوداني بالتأشيرة المسبقة يجب أن يعامل مواطنوها بالمثل ..وخلونا من قصة الانبطاح بأسم الاستثمار الكاذب😡
*ضربة جانبية:
لاحظت ان غالبية الناس المكجنة وزيرة الخارجية وسلقوها بألسنة حداد..هن من العنصر النسائي..ويبدو انو زمن الجندرة انتهى مع زمن الدسيديس والغتغتة..وعلى النعمة بناتنا في السودان بقوا شرسات خلاص..بالله الواحدة تكتب البوست تقول فرن بس لمن الموبايل ذااتو يسخن قبل راسك..بِسس😲😂

علي الكوباني

تعليق واحد

  1. كلامك صاح ..ادوها فرصة تشتغل بعدين نحكم عليها من إنجازاتها لا من شكلها. .و دي زولة جديدة في الوزارة لازم يكون كلامها و تصريحاتها محسوبة بدقة

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..