سفارة السودان في بيلاروسيا .. وكيف يهدر الكيزان أموال الشعب السوداني؟!

حياكم الله جميعا.
رجاء خاص تعميم الرساله.
دخلنا اليوم السفارة السودانية في مدينة مينسك بدولة بيلاروسيا.
اولا نعرفكم بأنفسنا،، نحن مواطنين سودانيين عددنا لا يزيد عن ثمانية أشخاص بكل دولة بيلاروسيا.
دولة بيلاروسيا دولة هادئة وصغيرة،، والقانون فيها صارم جداً (بيعرفوا يحسبوا ال ١٠٠ دولار بتمشي وين،، ال ١٠٠ دولار مقصود بيها مرتباتهم البيأخدوها من الدولة وبيدفعوا منها الضرائب).
نحن كسودانيين (الثمانية افراد) كنا نتمنى تجينا بعثة دبلوماسية من السودان ولو مرة كل سنتين،، البعثة لا يزيد عدد افرادها عن ثلاثة أشخاص وتخدمنا بخصوص الجوازات والتجديدات،، وهذه بالغالب كل احتياجاتنا من البعثة الدبلوماسية.
الحصل شئ عجيب الكيزان جابوا لينا سفارة،، بس توضيح بسيط للفرق بين بعثة دبلوماسية مكونة من ثلاثة أشخاص وبتجينا مرة كل سنتين وبين سفارة،، نقصد في حجم الصرف من الميزانية العامة ( مرتبات الغلابة في السودان)
السفارة البنتكلم عنه وموجودة حاليا في مينسك عاصمة دولة بيلاروسيا حجم منصرفاتها السنوية مايقارب المليون دولار (نتمني تجينا لجنة من وزارة الخارجية وتقيِّم حجم المنصرفات السنوية بالنسبة للسفارة دي بالذات. وربنا يكضب الشينة وماتطلع عشرة مليون دولار).
تقييمنا كمواطنين سودانيبن مقيمين في بيلاروسيا لحجم صرف السفارة من الميزانية بالنظرة:
فيلا ثلاثة طوابق مساحتها لا تقل عن الالفين متر مربع ايجاره السنوي لايقل عن ١٢٠ الف دولار.
١. الفيلا مفروشة تماما (حتى السلالم مفروشة موكيت)
الاثاث والمعدات الكهربائية: (كمبيوترات،، ثلاجات،، طابعات،، مكيفات،، كاميرات مراقبة والخ… وكلها ماركات عالمية مثل Apple, Samsung, Hp).
٢. اسطول سيارات يتكون من:
اودي Q7 (ستين الف يورو).
ميني باص فلوكسواجن (٤٥ الف يورو).
مرسيدس لكبار الشخصيات (٥٠ الف يورو).
اودي A3 (٢٠ الف يورو).
دي العربات الواقفه قدام السفاره وتحمل ارقام دبلوماسية بإسم سفارة السودان.
٣. الموظفين ومرتباتهم:
اها قبيل تتذكروا لم قلنا يرسلوا لينا لجنة مكونة من ثلاثة أشخاص مره كل سنتين اها اللجنة دي تكلفتها في السنتين تكلفة مرتب الموظفين *العراقيين* (ايوه عراقيين الجنسية في السفارة السودانية) البفتحوا الباب لسعادة السفير لم يكون طالع لتقضية مشاويره (بالغالب للجامع،، لان الأخ واضح من علامة الصلاة على جبهته انو متديّن وكثير التردد على المسجد).
نرجع لموضوع المرتبات: حسب كلام مترجم السفارة مرتبات *العراقيين* في السفارة السودانية،، وهم تقريبا ثلاثة (٢١.٦٠٠ دولار بالسنة مايعادل تقريبا ١.٢٩٦.٠٠٠ بالجنيه السوداني).
نبعد عن الموظفين التحت ونجي *للمترجم* (سوداني) لاحظنا شئ في مقابلاتنا مع موظفي السفارة هو دايما متواجد (في حين نحن وموظفي السفارة سودانيين ونتكلم سوداني،، يعني مترجم مانحتاج،، بس هو اساسي في المواضيع والقنصل يلجأ لاستشارته).
اها دا مرتبه السنوي + تذاكر طيران له ولافراد اسرته + علاوات + بدلات (لبس،، علاج،، سكن،، سيارة) دي تورينا ليه اللجنة المفوضة من وزارة الخارجية وتحديدا من السيدة *وزيرة الخارجية*.
نطلع اعلي شوية ونجي *للسفير والقنصل والملحقين* (تجاري،، عسكري،، ثقافي والخ…)
اها ديل كدا احسبوا انتوا قاصين كم من مرتبات الغلابة في السودان (او مايسمي بالميزانية العامة).
عدد الموظفين الشغالين في السفارة مانقدر نديكم عنه معلومة أكيدة،، *سودانيين،، عراقيين،، بيلاروسيين* رجال ونساء وبنات (بنات حسناوات يقدموا الشاي والقهوة لضيوف السفارة).
مرتباتهم السنوية،، تنقلاتهم هم واسرهم داخل بيلاروسيا وسفرياتهم الخارجية،، سكنهم داخل بيلاروسيا،، اكلهم وشرابهم والخ…
السؤال البيطرح نفسه: *ماعمل السفارة في بيلاروسيا؟*
اذا نحن لجأنا ليهم اكتر من مرة في مواضيع بسيطة *كتجديد* *جواز* او *استخراج* *جواز* جديد وهو عمل السفارة المباشرة دا البنعرفو عن عمل سفارات في الدول التانية بما اننا مقيمين في دولة اجنبية.
جواب القنصل علي *سؤالنا عمل السفارة شنو*،، اذا مابيقدرو يحلو موضوع بسيط كتجديد او استخراج جواز،، اذا السوداني المقيم في بيلاروسيا بينزل السودان بمبلغ لايقل عن الفين دولار ويحل مشاكلو بنفسو.
كان رد القنصل قصة كئيبة تدمع له الاعين (انو حلو موضوع طالب جوازو مخلص وادوهو ورقة لمدة شهرين لحدي مايخلص امتحانتو ويرجع السودان).
دا الشئ الوحيد الاتكلم عنو بكل فخر(مع العلم ان السفارة اتفتحت ليه تقريبا سنتين)..
مانظلمو ونقول بتواجدنا في السفارة جو سودانيين واضح عليهم علامات الصلاة في *جباهم* واستقبلهم السفير بنفسو وغادرو السفارة بعربات السفارة.
كل املنا كسودانيين مقيمين في بيلاروسيا تجينا لجنة عادلة بتمثل ثورة السودان واملنا كبير في *رئيس الوزراء ووزيرة الخارجية* واي جهة مهتمة بمحاربة الفساد وضميره مؤنبه علي هدر المال العام (مجهود اهلنا الغلابة).
اها ياجماعة نحن كسودانين في بيلاروسيا علي استعداد بخدمة السودانين البيقصدو بيلاروسيا *مجاني* بدون عربات دبلوماسية وفيلل والمنصرفات الموضحة اعلاه.
ياريت لو القروش دي تنصرف علي مستشفي،، مدرسة،، طرق،، يستفيدوا منها اهلنا في ولايات السودان الفقيرة الفيها *سودانيين بيموتو بالكوليرا ناهيك عن الملاريا* وبأشدة حوجة للقروش دي😔.
يلا يااخوانا همتكم معانا واعرفو انو دي مارواية من الف ليله وليله لمبالغ خرافية بتتقصي من ميزانية السودان المنهكه لسفارة وجوده ماعندو اي *معني* ساعدونا نرجع قروش الغلابه اهلنا في السودان المحتاجين فعلا للقروش دي.
#توقيعنا_السودانيين_المقيمين_بدولة_بيلاروسيا
#وزارة_الخارجية #رئيس_الوزراء #زيرو_فساد #حريه_سلام_عدالة #مدنيه

https://www.facebook.com/abureem.sitalhareem/posts/1722968171181171

فيسبوك