إنتِي آ دي.. سمِعتي بي ناصر ود فردُوس الطلَّقُوهُو البارح؟؟؟
– وَحَّيْتِي وَحَّيْتِي.. متين الكلام دا حصل… وهُو من متين الحريم قاعْ يطلِّقِن الرجال؟؟ بس الله يخيِّبُو السجمان المُو جايي زي اخوانُو… سمعت قالُو مرتُو السمحي ديك شَارَطَتُو من اللَّوَّل عصمة الطلاق تكون في إيدها.. أيْ تُبْ!!!
– ايه لا لا لع يا نفيسة… الشي دا قالُو قانوناً دارْ يسوُّوهُو جديد… هسَّع دا انتي ان بقيتي دارْ تطلِّقِي (حُمَّد إحمد) اللِّيلِكْ المسنُوح دا تطلِّقِيهُو!!
– يا سيدي الحسن راجل كسلا… ودا يي شنو دا كمان وجنسُو شنو دا؟؟؟
– سمعت في الرادي قالُو الرئيس الجابُوهُو جديد من لَا برَّة دا (حلاة الدنيي فُوقُو) بعد اب دَقْشُوم داك ما طار.. أها قالُو جايب معاهُو القانُون دا!!! واحسن شي قالُوا تاني من هِنِي ولي قدَّام الراجل بي خشمُو “الكريه” الياكْل الويكِي دا ما يفتحُوا معانا… نسوِّي الدايرُنُّو.. نمرُق علي كيفنا وندخُل علي كيفنا!!! (المرأة = الرجل) كيتاً فيهُنْ!!!
– ياااااااحلِيلْنَا منها الزايْلِي… هُو البشير متين فات؟؟ كيف مُوجعَاني رقصتُوا السمحي ديك تاني نشوفها وين؟؟ إنشاء الله يبقى الجايي دا قاعْ يعرِف (يعرِض) زيُّو!! يلَّة كدي وقِّعِيلِي الكلام دا… باقي أنا مُخِّي دا مااااافيهُو الزكاوَة زيَّكِن آ بنات تِلْبَة… الشي دا سمِح ولة كَعَب؟؟؟
– تَعَرْضِي آ يُمَّة في الطُنْبُرَة… إنتِي اصلك قاعدِي وين والدنيي دي من شهر أربعة الفاتت فايرِي… دَبِيتِكْ بالله.. أصلُو لا عندكم رادي ولا تلفزيون ولا الخرابَة الصغيرِّ القاعْ يشيلُوهُو في اللِّيد دا؟؟؟!!
كدي اللَّجَاوِبْلِك علي سُعَالِك.. هُو غايتُو مع دينَ الله يبقى لي مُو زين شي… لكن والله شِدَّة مُو عاجبني.. كيْتَاً في الرجال المنْضُوكْرِين فوقنا ديل مِن قُمْنا… واكتَر شي دايرِي انسدَّ في الدقُور اخُوي دا.. تنْذكري عليك الله آ نفيسة يُومنا اللِبِسْنَا وماشين لي لِعِب ناس (عشمانِي) وجاء جاري وراي زي النَصِيبِي رجَّعني من نُصَّ الدرِب؟؟؟ أها قاسْمِي وجازمي عِلِّي أقُوم من هِنِي مخسووس واحضِر حفلة البت الاسمها نانسي عجاج ديك في الخرتُوم واجي.. كيِّي ليهُو!!!
– والله لكن آ علويِّي الليلي جبتيلِك كلام… يعني تاني من هِنِي ولي قِدَّام راسي بي راس النعِيم اخوي دا؟؟؟
– وفُوق كدِي.. شُفْتِي راجلك الفَقْرَان المَرَنِّق اليومين دي للعرس دا… تاني يشمُّو قدحة… تاني برااااااكي تزازِي في حبلُو!! وان بِقِيتِي كمان دارْ تاخْدِيلِكْ تانِي واحِد فُوقُو تاخْديهُو!!!
– ههههههه الكَتَرَابَة… لالالا مُو صِح؟؟
– وحات الله الخلقني صِحْ!!!
– أيوووووووووووي… آ يُمَّا حمدُوك دا لا يفُوتْ ولا يمُوتْ!!!
مدنيااااااااااو!!!
*سؤال خارج النص:*
يا ربي آ حمدُوك خلااااااص مشاكل شعبك إتحَلَّت والخُبز رقَد والمواصلات اتيسَّرَت وبقينا في بحبُوحة من العيش الرغيد، عشان (نجَهْجِهْ زي الحاجَّات ديل) ونراجع قوانين مُثيرة للجدل من نوعية سيداو دي؟؟؟!!!
جمال أحمد الحسن
حمدوك مسكين دخل القش و ما قال كش,زول ضل ساااكت و مكاتب يعني افندي بس,يااعي الكماسرة و طراحين المواصلات هزموا حكومتو ثلاثة صفر براهم بقو يسعروا المواصلات على كيفهم و يخترعوا في خطوط ما انزل الله بها من سلطان لاجبار المواطنين على دفع تعريفتهم الجائرة.يعني في موقف ابوسعد يصر السواقين و الكماسرة و الطراحين انهم ما ماشين ابوسعد لكن ماشين جادين او القيعةاو حتى الجموعية و العايز ينزل الشقلة اي ابوسعد يدفع 25 جنيه و يستمر الصراخ ,جادين ,القيعة و الجموعية على خمسة و عشرينو يضطر المواطن المغلوب على امره ,الذاهب الى الشقلة ابوسعد ان يركب بالتعريفة الجائرة,مافي زول من الحكومة استطاع انيمنع هذه المهزلة التي يعاني منها المواطن في كل المواقف تقريبا. زمان زمن الحكومة ام دقو البوليس ابو عيون حمر كانوا يلزمون كل حافلة بوضع استكر في مكان واضح مكتوب عليه الحط و التعريفة مطابقة للتصريح الذي يحمله كل سائق…ما عايزين نقول يا حليل زمن الحكومة ام دق ,لكن الحسم حلو و هيبة الحكومةتستدعي احترام الكل لها