يونس محمود فى ذمة الحبس
عام 1989 كنت منتظر فى استقبال جهاز الامن – (بنك أمدرمان الوطنى ) حاليا – للتحرى وبرفقتى حرس من معتقل جهاز الامن …دخل الرائد يونس محمود مرتديا زييه الرسمى ويضع مسدس فى جانبه …وقف فجأة ونظر فى وجهى وسال الحرس المرافق:-
الزول ده مالو؟
والله ما عارف سعادتك
ووجه يونس هذه المرة السؤال لشخصى :-
انت مالك ؟؟
قلت ليهو : جايي للتحرى
قال لى : انت عملت شنو؟
قلت ليهو : ولاشي
قال لى : فى زول بجى هنا ماعامل شى؟
اتلفت على الحرس وقاليهو :
بعد تتحرو معاهو وديهو الدروة طوالى نحن مافاضين للتحرى والنقة الكتيرة بتاعة الملكية دى … وواصل طريقو طوالى .
الحرس اتلفت على ولقانى فى حالة بائسة جدا ..قال لى : ماتخاف ده بهرش فيك ساكت .
لما دخلت للتحرى لقيت الضابط المتحرى زول مهذب جدا …قعدنى فى كرسي وطلب لى كركدى ساخن وبدأ فى التحرى …بعد شوية دخل الرائد يونس وسال الضابط ..ده مالو ما وديتوهو الدروة !؟
المهم….
بعد انتهيت من التحرى الضابط المتحرى قال لى :
ده زول ملكى ساكت ماتشتغل بى كلامو ده .
اها يايونس حقنا مابضيع وحا تتحاكم بالقانون زى الترتيب وبقترح بعد يحاكموك يودوك السعودية الشلت حسها دى و تحاكمك وتقطع رقبتك بالسيف كمان …عليك اللعنة .
محمد سوركتي
يونس محمود السعوديين عملوها فيهو بعد أن أن سافر للحج بجواز و اسم مستعار للحج و تم اعتقاله و عملوا فيهو عملية اسالوا ابراهيم نائل ايدام كان معاهو
يونس دا من حُبي ليه ما لقيت تعليق يناسبه. والله العظيم