مقالات سياسية

الموضوع رقم ١ .. الخرطوم كوشه كبيره

رجعت من السودان بعد زياره قصيره .. مواضيع كتيره داير اكتب عنها وكلها مواضيع ذات اهميه .. لكن اول موضوع داير اكتب عنو هو موضوع الوسخ والكوش والقاذورات الماليه الخرطوم بمدنها الثلاثه … وساخه في كل مكان .. يكاد لا يخلو شارع كبير او جوه الحله من الكوش وعلي امتداد البصر .. كوشه تحت عمود النور وكوشه تانيه تحت عمود النور الجنبو … كوشه في الخيران …في الصور المرفقه مع المقال ده صورت كوشه قدام الجامع اخدتها بعد ما طلعت من صلاة الجمعه .. كوشه تانيه قدام مدرسه … كوشه تالته قدام ست الشاي .. كوشه رابعه قدام مطعم .. الضبان متواجد باعداد خرافيه وبقي متواجد دورية ليل ودورية نهار …منظر الناس البترمي النفايات في نص الطريق منظر بقي مألوف .. منظر الناس البترمي قارورات المويه والحاجه البارده واكياس الاكل وعلب السجائر من العربات والمواصلات منظر عادي لا يثير اي استغراب او استنكار من اي زول ..
الموضوع ده لازم نلقي ليهو حل وحل جذري ما مؤقت .. الوساخه ممكن تكون متلازمه مع حكومة الكيزان لكن من غير المقبول انو تكون متلازمه مع حكومة الثوره المدنيه … الطياره الجيت بيها كان فيها اعداد كبيره من الاجانب امريكان وعرب واروبيين واسيويين وعيب في حقنا انو بلدنا تكون بالقذاره دي …الحل لمشكلة النفايات دي لازم يكون شراكه بين الحكومه والولايه والشعب .. عارف انو مشاكلنا كتيره لكن موضوع النظافه ده لازم يكون من الاولويات لانو حقيقي مهم ..
وين الشركات بتاعة الولايه والمحليات المسؤوله عن جمع النفايات ؟؟ اذا كانت في صعوبات ماليه يغطوا البيقدروا عليه ويفتحوا الباب للشركات الخاصه تشتغل في الموضوع ده .. كل حي يكون عندو يومين في الاسبوع يقوم بنظافه عامه داخل حدود الحي ويلتزموا بالنضافه في الايام المحدده..يحددوا عدد من الامكنه تكون مخصصه للتخلص من النفايات واذا عربية النفايات ما جات يلموا الوسخ ويحرقو ويردمو اي مكان فيهو مويه كتيره .. .. واي زول يكون مسؤول عن النضافه قدام بيتو.. واي محل او مطعم او شركه او مدرسه او جامع او مصنع او وزاره او جامعه يكون مسؤول عن النضافه قدام مكانو وبالقانون … اي زول بيرمي حاجه من العربيه في الشارع يتكتب ليهو غرامه وياخدو بياناتو … الخيران تتنصف ويمنع رمي اي نوع من النفايات فيها …نعمل صناديق وبراميل للفضلات في كل شارع وكل حي تتفرغ بصوره دوريه .. الانسان السوداني نضيف في روحو لكن النضافه دي لازم تمتد للمكان العايشين فيهو .. النضافه من الايمان وعنوان للانسان المتحضر .. النضافه رمز اساسي للتغيير من القديم المتسخ للجديد الراقي الواعي .. الموضوع مفتوح للنقاش والاقتراحات والمبادرات . اي زول لازم يكون مثال وقدوه لغيرو ..في شاب قاعد جنبي مع ست الشاي رمي باقي السندوتش في الارض ما اتكلمت معاهو شلت الكيس ورميتو في صندوق الزباله حس بالخجل واعتذر لي ووعد انو ما يعمل كده تاني..علموا الناس والاطفال ووعوهم بالحسني ..وسودانا فوق.

 

عمار الخليفة – فيسبوك

‫2 تعليقات

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..