سيطرة جهاز الأمن على الاقتصاد

الناس اللمن نحن نتكلم عن ضرورة فرتقة التمكين اولا وهيكلة جهاز الامن بالسيطره عليهو وطرد كل الموالين للانقاذ منو كاول خطوه في حلحلة دولة التمكين .. بقولو لينا حل ازمة الوضع الاقتصادي ومعاش الناس اولي .

ديل انا عايز اقول ليهم انو عشان يتحل الوضع الاقتصادي لازم تتشال بعض العقبات اولا جهاز الامن الاخطبوط المسيطر علي السوق وعلي كل مفاصل الاقتصاد في البلد ..

ابتداءا بالبترول كان انتاج وله استيراد .. ومرورا بكل السلع الاستهلاكيه الاستراتيجيه كان دقيق او سكر حبوب وكان سوق وكل اصناف التجاره الداخليه والخاريه بمافيها السيطره علي سوق الاستيراد عن طريق (التكويش) عبر شركاتم علي كل السلع ذات القيمه العاليه والقوه الشرائيه المرتفعه وخالين للباقين المساكين خمسه وله سته سلع وهميه كده بس هي البيسمح لما دون جهاز الامن استيرادها .. وليس انتهائا بسوق تجارة العمله والسوق الموازي وما ادراك ما السوق الموازي وتجارة وتهريب الذهب ..

(وموضوع تهريب الذهب والقصص الشفناها في معتقلات الامن والبحصل للمهربين الما تبعم دي كمان قصص تانيه بجيها بي رواااقه وبالاسم وبالكميات وبي اسامي الضباط الكانو ماسكنها .. بس الصبر وارخو لي جسمكم يا مجرمي الامن. دي ثوره عظيمه ماتو فيها ابطال ما بنخليكم تضيعوها والله مهما عملتو معانا ) ..

يالا انتو قادريت تتخيلو انو الانا بذكرو ده ولا واحد في الميه من الحقيقه والخبايا اكتر بكتير في ما يخص السيطره المطلقه لجهاز الامن الموالي بالكامل للكيزان علي اقتصاد البلد فكيف انتو عايزين وضع اقتصادي يتصلح ومعاش الناس يتسهل دون ان نتحدث في هذا الملف الخطير ودون ان تحل وتفكفك هذه الدوله العميقه سيئة السمعه والافعال؟؟

..

وفي هذا الاتجاه انا قدمتا خطه متكامله في ما يخص جهاز الامن باعتبارو قلب دولة التمكين وقلتا انو بدون فرتقتو واعادة صياغتو علي اسس جديده متماشيه مع الثوره .. وحددتا خطوة الهيكله دي في اربعه خطوات اساسيه هي

.. اولا تعين مدير موالي للثوره ..

..تانيا تعين مدراء ادارات موالين للثوره ..

.. ثالثا يجتمع المدير مع ادارتو الجديده ويتم حصر كل الضباط والافراد الموالين للنظام السابق ويستبعدو فورا .. وكذلك يحصر كل الضباط والافراد الارتكبو انتهاكات ويسلمو فورا للنيابه ..

.. رابعا حصر كل شركات وامبراطوريات جهاز الامن الاقتصاديه والماليه وتسليمها لوزارة الماليه فورا مع الالتزام بالابتعاد نهائيا عن السوق والاقتصاد نهائيا..

(والرابعه دي ياها مربط الفرس في هذا المقال)

..

اخيرا صدقوني ما بكون في اي فايده من اي شي تاني بقومو بيهو ناس الحكومه من حلحة التمكين في قطاعات اخري مدنيه لانو الكان حاكم السودان فعليا والكان مسيطر علي كل كبيره وصغيره في البلد هو جهاز الامن وليس سواه

ورفاقنا في قيادة قوي الحريه والتغير عاااااارفيييين كلامي ده اكتر مني بالف مره كمان ..

..

الا قد بلغت اللهم فاشهد

..

#هيكلة_جهاز_الامن

..

محمدحسن بوشي
[email protected]