اللهم لطفا بالوطن
ياخ كورونا مين
نحن بعيدين من الكلام ده
دي ونسة ورفاهية ساكت ودايرين نبقى ذي باقي العالم بس
نحن شعب عاطفي وبنركب الموجة ساي
ونلبس كمامتنا ونقول ماشين الحجر الصحي كأننا في اليابان
ياخ تعالوا شوفوا الحاصل في الولايات وبتقنعوا ان الموضوع أكبر من كورونا
انا شغال في كسلا في ساعتين شفت ٢٠ حالة فيهم ١٢ حالة سل رئوي و ٦ حالات ملاريا حادة
وتقول لي كورونا
خلونا من كورنا كدي تعالوا شرفوا الكبد الوبائي والايدز هنا قدر كيف
َوالكلام ده بنطبق على أغلب ولايات السودان
السودان ده ياجماعة ما الخرطوم بس
ياخ هنا المريض أقول ليهو عندك درن وحصل ليك مضاعفات كده وكده يقول ليك الله الحمد لله والله يادكتور كنت خائف من المرض الكعب
أكعب من كده؟
انتوا قائلين الكورونا اخطر من الدرن والملاريا؟
نسبة الوفيات بالدرن والملاريا أعلى بكتير من الكورونا لكن ما سمعنا بدكتور سوداني لبس كمامته ودخل حجر صحي لانه شاف مريض سل رئوي
مش قلت ليك نحن بنحب نركب الموجة
ياجماعة الدول القائمة وقاعدة بكورنا دي لافيها ملاريا ولا درن اتجاوزا المرحلة دي زمان
ياخ الشرق ده لسة حتى الجرب وشلل الأطفال فيهو
ده غير الحميات النزفية
خلي الكورنا دي تجي كسلا دي والله هي زاتا تلبس كمامتها من الحتشوفوا هنا
ده مامعناها ما نعمل احتياطتنا من الكورونا
نعمل احتيطاتنا ونقفل معابرنا ومنافذنا
لكن برضو نهتم بأمراضنا العندنا دي ونوعي الناس ونحاول نعالجها ما نمسك في الكورونا لحدي مانلقى ناسنا كلهم ماتوا بسل رئوي
الصحة محتاجة لنفرة
والشرق بالذات
نطلب من منظمة الصحة العالمية واليونسف والمنظمات الأخرى الدعم والمساعدة في علاج الأمراض المستوطنة وتوعية المواطن ومساعدته بتوفير التطعيم والعلاج
ربنا يحفظ البلاد والعباد
ويبعد مننا البلاء والوباء
ويحفظ زملاء المنهة ويغطي عليهم
#اللهم_لطفا_بالوطن
#بقلم_د_حسن_الزين
