أخبار السودان لحظة بلحظة

معليش يا الفريق أول صلاح عبدالخالق، ما عندنا جيش!

عثمان محمد حسن

36

* تحدث الفريق أول صلاح عبد الخالق، عضو المجلس العسكري سيئ السمعة، بمضاضة لصحيفة المجهر السياسي اليوم ١٤/٣/٢٠٢٠ زاعماً أن الأوضاع في السودان تتطلب تنحي الحكومة الحالية وتكوين حكومة كفاءات (حقيقية) ترتب لانتخابات مبكرة.. كما أكد أن المؤسسة العسكرية لن ترضى بتسليم البشير للمحكمة الجنائية.. و أن تسليم البشير خط أحمر.. ثم انبرى طلباً لمبارزة الطواحين الهوائية: ” و لو ناس الحرية والتغيير دايرين يحاربوبنا يجونا عشان نوريهم الحرب كيف!”

* هذا قول يأتي ممن يفترض فيه أن يكون قائداً عسكرياً مسئولاً.. و لكن يا للخسارة، فقد تجلى في ثوب (زول ساكت) يقف في معسكر الثورة المضادة كفرد من أفراد فلول النظام (المنحل).. و تكشفه جملة “نوريهم الحرب كيف!” كمن يستأسد كلما وقف أمام المدنيين لكن واقعه واقع ” في الحروبِ نعامةٌ ربداءُ تجفلُ من صفير الصافرِ!”

* و هديتي للفريق أول صلاح عبدالخالق فقرة من خطبة العميد/ حميدتي أمام قواته في عام ٢٠١٤ يقول فيها:- ” زي ما قلت ليكم البلد دي بَلْفها عندنا نحن أسياد الربط و الحل.. مافي ود مرة بفك لسانو فوقنا.. مش قاعدين في الضل و نحن فازعين الحرابة..!! نقول اقبضوا الصادق يقبضوا الصادق فكوا الصادق يفكوا الصادق..! زول ما بكاتل ما عندو رأي..! أي واحد يعمل مجمجة أهي دي النقعة و دي الذخيرة توري وشها..! و يوم الحكومة تسوي ليها جيش، بعدين تكلمنا!”

* معليش يا صلاح.. معليش ما عندنا جيش!

* أيها الناس، هذا الصلاح عبدالخالق هو الذي صرح و الثورة في عنفوانها قائلا.:- ” أنا أكعب من حمدتي.. بس ما عارفني ساي!”

* لا يا صلاح عبددالخالق، عارفينك و عارفين المجلس العسكري المكون من لجنة أمن البشير.. و سوف تكون لنا كلمة موَسَّعة قادمة عنكم و عن الفلول و قوى الهبوط الناعم الداعمة لكم في ثورتكم المضادة و قيام الانتخابات المبكرة.. و جميعكم تقفون خوازيق في مسار الثورة.. بدأتم الفعل المعطِّل منذ انقلبتم على البشير.. و (كنكشتم) فوق الكراسي بزعم أنكم شركاء في الثورة، بينما كنتم تسعون للبقاء في السلطة ك( إنقاذ الإنقاذ)، لولا أن قيَّض الله للمسيرات المليونية التي اجتاحت البلاد في الثلاثين من يونيو ٢٠١٩ أن تجبركم على أن تنقلبوا على أعقابكم خاسئين.. و الحمدلله..

* قال شنو؟ قال:” و لو ناس الحرية والتغيير دايرين يحاربونا يجونا عشان نوريهم الحرب كيف!”، قال!

عثمان محمد حسن
[email protected]

36 تعليقات
  1. بكري الصائغ يقول

    بلد مافيها تمساح…يقدل الورل….

    1. صادق الوعد يقول

      فعلا الورل هى قحط وهناك الدليل
      ادخل على اليوتيوب على العنوان التالى
      فضيحة فيديو مسرب الناطق الرسمى لقحت

  2. حريكة يقول

    الحرية والتغيير وعدت الناس في ميدان الاعتصام بحكومة كفاءات غير حزبية، والان هل تستطبع أن تقولي من في هذه الحكومة غير حزبي ومن هم الكفاءات وهل هم فعلا الاكفأ في السودان كما وعدت قحت السودانيين في ميدان الاعتصام ثم نكصت عن عهدها بعد فض الاعتصام؟
    هسي خلينا من قول الفريق أول صلاح ومن النفخة الزايفة الفي المقال دي، وورينا انت قولك شنو والأمور متجهة على وين؟!!!

    1. ابوالعز يقول

      وهل هم فعلا الاكفأ في السودان ؟؟؟
      ************************************************
      كيف يتم معرفة الاكفأ في السودان ؟ باي ميزان يتم القياس غير التجربة العملية ؟ وقحت جربت ما تعتقد بانهم كفاءات ومن فشل منهم يتم تغيره اليس كذلك يا حريكة ؟… اما قول المدعو صلاح عبدالخالق فريق الضرورة والغفلة بان تسليم للمحكمة خط احمر ودعوته للمدنيين العزل للمنازلة العسكرية هذا ما رفضه كاتب المقال

    2. ود البلد يقول

      و انت يا هذا شايف شنو؟ والله زيك لا يرى حرية الشعوب إللا تحت حكم عسكر دكتاتري جماعي من رتبة صول أصح يا لهاط يا جاهل

    3. قاسم خالد يقول

      يوريك شنو ؟ العسكر يحمون القتلة السراق .. هي دي دايره يوروها زول ؟ العميان شايف الحاصل .. لا يحمي القتلة السراق الا قاتل سارق مثلهم ..

  3. SD2000 يقول

    التحية لشبابنا الواجهو عسكر المخلوع بصدور عارية و جباه مرفوعة و عيون مقتوحة…. ديل الحنشوفهم فى الشارع اليوم التقول ليهم تعالو نازلونى.

  4. كرونا19 يقول

    الأخ صلاح عبد الخالق
    نوريهم الحرب كيف!”، قال!………. ورين رجالتك دي في تحرير حلايب …… يا حليلك يا عبد الله خليل

  5. سمعريت يقول

    ان لم تستحى افعل ماشئت
    وياعديم الحيا الاختشو ماتو
    صحيفتك السوداء قيد النشر
    وغدا تدور الدائرات عليك بالساحق والماحق

  6. امير يقول

    ده الشاطرين فيهو بس محاربة الشعب
    زخيرتكم موجهه الى صدور ابناء الشعب الذي يصرف عليكم بينما حدود البلاد مستباحة وبدون خجلة ضباط الكلية الحربية يمجدوا في الفريق خلا قاطع الطريق حرامي الحمير . وحميدتي جاب القروش من وين عشان يحل الازمات ابوه كان بل قيتس وحنا ما عرفين ولا شنو .
    أي فشل للحكومة السبب فيه المكون العسكري الذي يعمل طابور خامس لإجهاض الثورة وسوف ياتي اليوم الذي نسلم فيه البشير للجنائية وكل مطلوب ومحاكمة كل من اجرم في حق الشعب السودني وان غدا لناظره قريب يا سعادة الرقيب أول

  7. Wad AlRayes يقول

    لا فرق بين ذوي اللايفات ذوالنون، أولاد الضي، وبين الكوز عسكري صلاح الذي يحتاج إلي تصليح الخلقة والأخلاق، عندما تفارقهم أحلام السلطة والثروة، الفرق أن العسكري ربما يجهل كيفية عمل اللايفات أو يفتقد لمهارة الكلام علي الهواء أما الكاميرا فلجأ إلي كوز نتن آخر هو الهندي زفت الطين والذي يفتقد أيضاً هبات ولي نعمته المجرم البشير
    كرور في كرور

  8. سوداني وبس يقول

    بالله عليكم زي الاهطل بقي فريق اول كيف ؟ وكمان طيار؟ والامر من كدة كان عضو في اللجنة الامنية؟ لا حول ولا قوة الا بالله!!! دة لوحده مش سبب كافي للمطالبة بهيكلة الجيش؟

  9. خالد السنابي يقول

    للاسف الشديد هناك مجموعات في قوي الحريه والتغيير خاصة ما يسمي بمجموعة نداء السودان مجموعة الهبوط الناعم التي لم تعترف بثورة ديسمبر المجيده نعتها الامام ببوخة المرقه وجع ولاده كاذب. ولم تساند الثورة في قوة عنفوانها وكان انتصار الثوره بمثابة الخذلان الاكبر لهم ..وبعد انتصار الثورة لم يألوا جهدا في افشال الثوره بكل السبل منها التصريحات المتضاربه بفشل الحكومه واختلاق الازمات و الدعوه للانتخابات المبكره بالتنسيق مع لجنة البشير الامنيه في المجلس السيادي وبقايا النظام البائد من مؤتمر شعبي وما يسمي بالاصلاح الان بقيادة الغازي المجرم العتباني.

    ولا ننسي مجموعة المصالحه التاريخيه المجموعه التي تم فصلها من الحزب الشيوعي والتي تسعي للتنسيق مع الكيزان وعودتهم للمشهد السياسي والعفو عما سلف.
    اما حمدوك فلم يكن بحجم الثوره وشبابها الغر الميامين وجد حمدوك تأيدا لا سابق له لكنه لم يستغل ذلك بل استند علي مجموعة الهبوط الناعم والمصالحه التاريخيه والعفو عما سلف.
    وكل ذلك واضح للعيان .. لم يحاكم اي من افراد النظام المباد ولم تسترد الاموال المسروقه بل اغلب المجرمين الكيزان ما زالوا يمارسون عملهم في كل مرافق الدوله ومسيطرين علي القوة الامنيه والاعلام. والمصارف والشركات والتعدين.
    لابد من الثوره التصحيحه التي ستنفذ سياسة القصاص في كل من اجرم في حق شعبنا وكل من دعي و نفذ سياسة الهبوط الناعم والمصالحه التاريخيه.

  10. حسن احمد علي سعد يقول

    المادة الأول في الدستور الأمريكي حرية الكلام والمادة الثانية حمل السلاح لكل مواطن أمريكي منذ ٣٥٠ سنةً حتي لا ينقلب إنصاف الرجال علي السلطة يدعون الرجولة والقوة بعد استلام السلطة بقوة السلاح.
    الجيش السوداني يعتبر من اسواء الجيوش في العالم حيث فقد الجنوب وفقد حلايب وفقد الفشقة وفقد النيل الأزرق وفقد جزء كبير من دارفور وجنوب كردفان لذلك هذا الجيش هموا الأول والأخير السيطرة علي السلطة ان كان باسم عبود او نميري او البشير الزين يتحدثون ان الأحزاب هي التي تخترق الجيش وتقوم بالانقلاب فكل الجيوش الفاشلة المهزومة مثل الجيش الباكستاني والمصري والعراقي وغيرها ناجح في الانقلاب رغم عدم وجود الأحزاب السوداني في مصر وباكستان وغيرها هذه الجيوش بطبيعة تركيبتها هي جيوش انقلابية من اجل السلطة لذلك بعض الدول تم حل تلك الجيوش هذه دول بعد حل هذه الجيوش تطورت سياسيًا واقتصاديًا واجتماعيًا .
    لذلك أدعو ان يكون مسموح لكل مواطن سوداني بحق الترشح والانتخاب وحمل السلاح حتي يحمي نفسه وخياره من الفاسدين الذين يستعرضون قواتهم ورجولتهم لانهم يملكون السلاح والآخرين لايملكون.

  11. بكرى حسبو عثمان يقول

    شرزمة العطولجية ما زالت تهاجم الجيش
    ي جماعة فكونا وبلاش من التبرير الفطير
    لفشلكم الكيزان الدولة العميقة العسكر
    والله قلة الادب ع الجيش دى كان علمتوها انتو
    للشباب والتحريش والتحريض والاساءت للعساكر من ايام الاعتصام وده كلو عشان شهوة السلطة
    وسرقتو ثورة الشباب وتاجرتو بدماءهم وقلتو حكومة كفاءات غير حزبية وجيبتو لينا مدنى عباس وزير وهو احد مفاوضى الحرية والتغيير
    ومن غير الكفوات الحزبية الردووم الفاشلين فى ملف الاقتصاد ومعاش الناس والمواطن السودانى يذبح بميزان التجار يوميا….الخ
    قال كفاءات قال ولمن تتعصرو تمسكو الفريق حميدتى الالية الاقتصادية
    ياخ ما قلتو راعى وأمى وكسيتو بيهو العرايا
    بالرغم ان هذه ليست بعيوب
    وهو اكتر واحد قلبو ع البلد وبحل ويربط وشغال فى خدمة المواطنين
    ياخ وقت ضائقة الموصلات عربات الدعم السريع كانت بتنقل فينامجانا قامو العطولجية
    وزمرة الفاشلين بمهاجمة حميدتى ونعتوه باقبح الالفاظ خوفا ع كراسيهم
    وبعدين انتو خايفين من الانتخابات مالكم
    ما قلتو عندنا الشارع والمليونيات
    مادايرين انتخابات وشغالين نبذ واساءت للجيش
    وبعدين نحن كشعب ما عندنا مشكلة مع الجيش
    ومن اساء لجيشه لعق بوت المحتل نحن كشعب ما دايرين اى قوات اممية مستعمرة الطالبتو بيها انتو عشان تحكمو من غير انتخابات وتقسمو البلد
    وتقعدو
    طلعو لينا من وين العواليق ديل
    الله يكفينا شرهم
    كان عشمنا حكومة تمثلنا وتعبر عننا وتمثل قيمنا بعد الثورة ما حكومة تطالب باستعمارنا
    اخير
    الشعب يريد الانتخابات

  12. مدثر يقول

    اجبن مخلوق هو البشوف العزل وهو مسلح ويعمل فيها ضكر بط الغوريلا الاسمو صلاح عبد الخالق اجبن مخلوق وشوفوهو بتدهنس لفريق الخلاء كيف ؟

  13. الصادق مصطفى الشيخ يقول

    صلاح دا للذين لا يعرفوه هو للاسف ابن عم الفنان السودانى العظييم الفاضل سعيد
    وابنه كان من رواد الاعتصام مع شباب منعمره يمثلو روابط الناشءيين راى والده يرفض ايواء المعتصمين فى الجوية ويعاملهم معاملة رسمية فخجل
    صلاح اول من اطلق لفظة لن نعيد جنود السودان من اليمن لان السودان حارب فى فلسطين ولبنان كانه لا بدرى الفارق بين القتال فى فلسطيت ولينان ومرتزقة اليمن
    صلاح عدو الثورة الاول وهو لا يمثل الجيش ولا اى مؤسسة وطنية ابعاده من مجلس السيادة كان دليلا على كوزنته القميءة
    رغم انه يتعالج فى الخارج على حساب الشعب الذى لفظ المجرم الذى يدافع عنه لا لسبب لانو اى المجرم المخلوع ذكر انه لن يكون فى الجناءية وحده فى اشارةة للطيران الذى هلك اهل دارفور

    1. سوداني مُستغرب يقول

      البطُن بطرانه ،
      الفاضل سعيد ولد عمُ لكنه لم يغُمنا ،
      ولده اشُك في انه من صُلبِه ،

  14. كبرنا الشبكة يقول

    صلاح عبد الخالق وغيره من أعضاء المجلس العسكري هم الكيزان أبناء الترابي والبشير لا خير فيهم هم لا يمثلون الوطن ولا الجيش السوداني الحر هؤلاء ناس مؤدلجين وحبهم وولائهم للكيزان فقط لذلك شئ طبيعي هو من الد أعداء الثورة ولكن غلبت عليهم كثرة الجماهير واجبرتهم على خلع ابوهم وزعيمهم وولي نعمتهم من السلطة خوفا ونفاقا وليستا إيمانا ولا قناعة بالثورة .

  15. الدر يقول

    شنو يا جماعه الحرب والنزال والكلام الفارغ ده ؟؟؟ إنتو ما حكومة شراكه وفترتكم قربت وماعملتو أى شىء للشباب الذين ضحوا وقعدوكم فى الكراسى دى .لا العسكر ولا قحت ماقدمتو حاجه. أعملو خير عشان الناس تتطراكم بيهو وخليكم من النزال والعراك والهمجيه دى

  16. الدنقلاوى يقول

    سبحان الله اسلوب يفتقر لكل مقومات الادب والرقى وأفتراء والله انا بسال كيف وصل الى هذه الرتبه هذا فاقد تربوى ويشعر بالدونيه والعقد النفسيه الماصله فيه

  17. أب شنب يقول

    ومن انت يا الأخو لكي تقيم ان لدينا جيش ام لا؟ وما الذي يمكن ان يمنحه لكم الجيش ولم يفعل يا ناس قحط؟ وما الذي فعلتوه بالسلطة التي توليتموها؟ ماهذه السماجة والإنحطاط؟؟ ونعم الجيش لن يسمح بتسليم البشير انتو باطلين ماقادرين تحاكموهو هنا بعد ختوهو ليكم في سجن كوبر؟….

    لم يكن من الممكن ان يكتب للثورة النجاح لولا إنحياز الجيش بقيادته العليا للثورة… ولو كانت على البشير كان ضرب المعتصمين بالطيران وكمان هو مهد لذلك بفتوى دينيه لو انت ناسي.. ومامنعتوهو انتو يا منحطين الذي منعه هو جيش البلاد وقيادته.. وبعد ان انتصر الجيش للشعب بكل بلاهه وانحطاط وسوء فهم ونية ووضاعة وصفتو الفعل بالانقلاب!!!….
    وشنو يعني اللجنة الامنية بتاعت البشير انتو ناسين انو سوار الدهب كان وزير دفاع نميري؟؟ شنو التفاهه والإنحطاط ده؟؟ وبعد جابو ليكم معظم القيادات للنظام المخلوع للسجن وعينو ليكم النائب العام العايزنو ورئيس القضاء العايزنو وأي شئ جايين تاني تقولو ماعندنا جيش؟؟!! وعزة الله لولا الجيش كانو الكيزان قطعو لحومكم ونشفوها وجدعوها للكلاب…

    انتو عاجزين تافهين منحطين وبارعين في تصورات المؤامرات والاوهام واتحداكم اتحداكم لو فيكم خير ادعو لأي مناسبة شعبيه باسم قحط عشان تعرفو قيمتكم عند الشعب يا سفلة…الشعب كرهكم وكره يومكم يا فشلة…

  18. زول ساى يقول

    انت لو راجل الطعاك الخلاء عندما يتعارك طفلان يقول احدهما للآخر تلك العبارة وسبحان الله ومن المؤسف جدا ان يكون من وصل لرتبة فريق بقوات الشعب المسلحلة عقليته مثل عقلية اولئك الاطفال نعم هكذا اراد المجرم المخلوع البشير ان يكون عناصر وقيادات الجيش بعقلية هذا الفريق وضحالة فكره واقسم بالله ثلاث ان لم يتم تطهير القوات المسلحة من مثل هذا الرجل فلن تقوم لها قائمة الى يوم يبعثون واننى اتعجب ان يسمح لمثل هذا الكوز ان يتبجح بهذا السخف انه فاق عبدالهادى وخال المخلوع وحنفى فاقهم سفاهة فى حق الثورة ويبدو انه قد فاق من صدمته الان فالى متى يظل شعبنا يحتمل اذى جهلاء بنى كوز الذين اوردوا البلاد موارد الهلاك وما زالوا يتطاولون بفج وقبيح قولهم وهم يعلمون انهم قد دمروا الوطن ويتمنون له مزيدا من الدمار فضلا حاسبوا هذا الجاهل الحقير على تطاوله على شعب عظيم لقنه درسا افاق من صدمته بعد عام ونيف ليسب الشعب دون وازع او رقيب او محاسب

  19. الثورى يقول

    البلد بجيشها وعزها واخير ليك تبعد عن تشويه جيشنا الحامى عرضنا ودمنا ، والله ما بنقول فى جيشنا شئ ولولا الجيش السودانى هذا ما كانت الثورة حتى ويكفى شرفا أن الجيش السودانى حافظ على السودان حتى عام 2011 كامل ما فيه شق ولا طق بالدواس وبس لحدى ما جاء المخلوع ووضع يده فى يد الحركة الشعبية وقال جاب السلام ومع سلامه جاب فصل الجنوب ، الجنوب لحدى 2011 بقوة الجيش ما قدر ينفصل وما قدر يسوى شئ لكن من دخلت فيها مفاوضات وابعد الجيش إنفصل السودان ، وهسى طريقة مافى ان ينكسر جيشنا ولن يسمح الجيش بما تقولون ، السودان دا بصراحة ما بحكموا غير عسكرى ولن يقدر على حكمه غير العسكر رضي من رضى وأبى من أبى وكلام صلاح فى أن البلد دى ما حا تستمر بالوضع القائم دا وبهذه الحكومة وحا ينط فيها عسكر هو الشئ المتوقع والواقعى ، هو كلمة مر بس لازم الناس تقبلوا وما تأبوا كلام الراجل دا ، اليسار الان فى يده السلطة وهو يحكم بلا قواعد عريضة وبرامج احزابه غير مقبولة وغير مرحب بها فى البلد ولن يستطيع تمريرها لان تمريرها يحتاج إلى قوة جماهيرية واتمنى أن لا يظنوا أن القوى الثورية فى الشارع ستمكنهم من تمرير افكارهم وبرامجهم للتغيير إلى ايدلوجياتهم كلا ، الشارع يمكن أن يخرج من اجل خبز من اجل حريات من اجل عدالة ولكن يخرج من اجل برامج حزبية فالحزب القوى هو من يمرر برامجه ، طبعا اليسار لن يفوز بالإنتخابات فالنتيجة محسومة هى للأنصار بلا منازع ويجيكم الصادق المهدى وحزبه قادة جدد وحينها سترون الضعف الشديد والتنظير الصحى صحى ، لهذا قحت ليس امامه خيار غير ان تضع يدها فى الجيش وتحترمه وتتعامل معه بحجمه الطبيعى ويكون هو الحامى لها وهو الذى يستطيع ان يمرر لها برامجها وتمديد فترة حكمها بالقوة العسكرية القابضة.

    1. ابو الكلام يقول

      انت ي صلاح عبدالخالق فعلا جاهل والجاهل أفضل من امثالك
      انت لو ما جاهل انت أقدمية أقدم من البرهان في التدرج العسكري تقريبا انت الدفعه ٢٩ والبرهان الدفعة ٣١ انت لو ما جاهل كان تكون القاىد العام
      انت رضيت ان تكون تخت البرهان وكمان جاي تتطاول علي المواطنين
      كان رجالتك دي سويتها مع البرهان ي جاهل

      1. عمار مكي يقول

        ده خرتيت . باطل

  20. صادق الوعد يقول

    ناس قحط أسوأ من البشير ما دمروه فى سنة يفوق مادمرته الإنقاذ فى 30 سنة
    ارجوا الجاييكم والله غير مصير عبدالخالق محجوب والشفيع احمد الشيخ لا مخرج لكم
    حميدتى ما قلتى جنجوبد ورباطة الان أصبح يحل ويفك احى احى انا

  21. ابراهيم الطيب يقول

    الاخوة قادة القوات المسلحة
    انتم حمات العرين
    ابي عليه رحمة الله كان منكم وتعلمنا منه ان الجندي لا انتماْء سياسي له ولم نسمع من الاستقلال ان ضابط او جندي صرح او تكلم للاعلام ناهيك ان يهدد بالقوة
    احموا قانونكم وانتصروا للقوات المسلحة وحاسبوا هذا الفريق[ والله كنت قايلوا في المعاش]
    صورة للسيد القايْد العام

  22. MAKNEMER يقول

    نقولها بحق الجيش اللذي يرهب شعبه ويقتله لن يدافع ولن يقف بقوة ورجولة امام اي معتدي يغزو البلاد الا يفهم ااعساكر ان عدونا الازلي يتربص ببلادنا منذ الأزل و عشنا ان تتولي الانقلابات الحكم بقوة الرساش لتخرب البلد تماما وتجيب خبرها اي جيش لدينا فقط علامات الرتب ازبلايط كاذن الحمار علي كل جنب من الكتفين تقليدا للعرب وتضخيم الذات نعم نحن مع الفريق البرهان يجب ان يخلق جيش وطني حرفي مهني يحرس الحدود هذه شغلته غير هذا فعند قيام اي حرب مع العدو الحاقد الحاسد ستجد ناس الدفع السريع اول من يهرب وتتبعه القوة لانهم لم يكونوا ولن يكونوا ابدا اصحاب مهنة احترافية متخصصة في حماية الوطن وثانيا علي حميدتي ان يفهم هو ومن مثله ان هذا الوطن صبر كثيرا عليكم لا تسترجلوا علي شعبنا فوالله ان دعي داعي الحما ستجد هذا الشعب اللذي جلدتوه بالسوط وقتلتوه بالرصاص هو من يحمل سلاحه وطنية ورجالة يحارب عدوه الحقيقي وليس مثلكم من جعل الشعب عدوه . دايرين الرجالة؟ اطلعوا برتبكم وانفاركم الي الحدود وسوروا السودان من كل جانب وحد واحرسوا البلد فمن ستجلدون غدا وتقتلون عندما ياتي العدو وانتم شردتم او ادسيتوا تحت عاقريبكم الرجالة لو فيكم فهي علي الحدود وبلاش قلة ادب منذ استقلال السودان اهلكتونا الله يذلكم كما فعلتم بالوطن نعم يابرهان لو صدقت جيش وطني غيور مهني محترف وليس مثل هرلاء الجهال وقد قالوا معليش معليش ماعندنا جيش لكن عندنا خيش لو رجال اسمعوا كلامي وبعد ده الرهيفة تنقد حلوا الدعم السريع بحميدتي اول شييءوخلونا نلحق البلد اللهم انصر السودان آمين

  23. ممدوح عبد الوهاب عبد الرزاق يقول

    للأسف هذه هى العقليه التى تدار بها السودان منذ امد طويل والله انت ذاتك تتسلم للجنائية ولو انت عندك جيش امشى حرر الفشقة خلى حلايب وشلاتين .كنت وين عندما ضرب عقيد فى الجيش بواسطة عساكر الجنجويد يا اخى السوأى ما حداث ولو بتعتقد انو تأنى تكونوا فى السطلة انت مخطئ هذا الجيل لا يخافون من امثلك والذين فتحوا صدورهم للنيران لا مبالين بحياتهم لن ياتى الذى تفرض قرارك عليهم .انت تصرف راتبك من الشعب السودانى ووظيفتك تحمى السودان وليس التهديد والوعيد خسئتك انت وامثالك

  24. الأعيسر يقول

    لا نقدح الزناد علي لتباعد الشقة بين من نتوخي فيهم الحل والعقد، لكن ما يسؤنا هذه اللغة العجفاء والتي لا نتوقعها من اعمدة البنيات وركائذ الدولة التي يسند عليها عامة الشعب آماله في بناء دولة تسع الجميع سودان الحرية والعدالة والمساواة .
    معليش يا سعادة الفريق أول صلاح عبدالخالق، قد يكون ما عندنا جيش عندما يري القادة ان افضل ما يعملونه هو محاربة الشعب لحماية عروشهم!

  25. Ismail Hussein يقول

    ما هي الصفة التي يتحدث بها هذا الجاهل قليل الادب، المدعو صلاح عبدالخالق، حتى تفرد له المقالات وإعطائه قيمة لا يستحقها؛ ألم يرى هذا المنحط كيف واجه شبابنا عسكر المخلوع بصدور عارية و جباه مرفوعة و عيون مفتوحة…. ديل الحنشوفهم فى الشارع اليوم التقول ليهم تعالو نازلونى؛ ياجبان.

  26. قاسم خالد يقول

    طبعا ستجدون هنا الكيزان الذين نهبوا و قتلوا و سرقوا و اغتصبوا ، ستجدونهم هنا يكلمونكم عن الجيش حامي الحمى ، الجيش الكيزاني الذي يعرف كيف يقتل شعبه في الجنوب و دار فور و جنوب كردفان و النيل الأزرق ، لكنهم يرجف و يرجف عندما يأتي ذكر حلايب و الفشقة … الكيزان لأنهم قتلة و سراق يريدون أن يكون الجميع مثلهم منحطين تافهين فيتخفون خلف قناع الحياد ليقولوا إن الحكومة الحالية مثلها مثل الكيزان … أما هذا الذي يدعي انه فريق فهو أقل علما من جدي خريج الخلوة … هانت الزلابية .

  27. مجنون يقول

    انا انسان عادي انا صلاح العمل فية رجال يجي بدون مسدس وسلاح بدون كاكي يجي زي اي زوال دير أشكال معها شكلة في نصف ميدان عام والناس كل يجي يتفرج و مرة بتعو او وزوجتها وبعد ين نعرف شغل رجال دي كيف في ميدان عام من فيكم رجال يتفضلو معي

  28. إبن الخرطوم يقول

    كلامو دا ما موجه للشعب, دا كلام موجه لأشخاص هو بعرفهم براهو وعايز من وراهم حاجة, دي إسمة سياسة التدليس. الراجل شعر بالخطورة من الأقصاء.

  29. سليمان النضام يقول

    يا جماعة الراجل يتكلم عن جماعة قحت الذي نسرقو الثورة، قالوا حكومة كفاءات ولكنهم تواطأوا ضد الثوار وجابوا حكومة حزبية ضعيفة … ولو حسبنا الاشياء بالطريقة التي كانت قحت تحسب بها الاشياء أيام كانت في المعارضة لوجدنا العجب مثلا لوجدنا ان النظام البائد رفع خلال 30 سنة سعر صرف الدولار إلى 60 جنيه، وقحت في أقل من سنة رفعته لأكثر من الضعف 126 جنيه؟!! يعني لو قعدت 30 سنة الدولار حايتحسب بالترليونات!
    وبدل الاساءات والكلام الذي يتجنى على الاخر نسأل قحت سؤال بريئ: ما دمتم تمثلون الشعب وتمثلون الثوار والثورة لماذا تخشون من الانتخابات المبكرة؟ سؤال برئ جدا؟!

اترك رد

لن يتم نشر عنوان بريدك الإلكتروني.