مقالات سياسية

الوقود التجاري والمشي الكداري الى الدكتور البدوي وزير المالية

قلنا الوقود التجاري دا ح يشعلها ورغم انخفاض البترول عالميا لدرجة مخيفة عندنا يزيد بدرجة خطيرة

طَيب عشان تشيل الدعم محتاج تزيد الانتاج كيف ذلك ؟

عشان تبدا الخطوة المهمة دي اول حاجة شيل كل الإدارات الفاشلة في وزارة المالية و بنك السودان اذا هم فشلوا طوال ٣٠ سنة في الاقتصاد ما ح ينجحوا الان ديل ٣٠ سنةً ربيد واعادة معقولة دي ؟!!
جيب بقانون ثوري استثنائي وبعقود خاصة استثنائية عباقرة في الاقتصاد و غالبا ح يكونوا اكثر وطنية وما يكلفوا الشعب كتير
تبع الجمارك للمالية المشكلة شنو ؟!

الانترنت على قفا من يشيل الزم الضرائب والجمارك والتجار بنظام إلكتروني صعبة دي ؟
ادعم الانتاج بتقليل الصرف الحكومي انت الان تقدر تقول لي كم مصروفات الدولة علي العربات الحكومية من الوقود فقط ؟ اديك امثلة أقربها ليك لانو حتى وزارة المالية ما عندها فكرة عن حجم الصرف دا
على المستوى الولائي
عندك ١٨ ولاية فيها ١٨٤ محلية
كل ولاية فيها حكومة ما اقل من عشرة وزارات
كل حكومة والي ونائب وعشرة وزراء
اضرب ١٢ برادو اخر موديل في ١٨
فيها ١٨٤ محلية يعني ١٨٤ معتمد كل معتمد عربية برادو
ما نحسب مجالس الولايات لانها حاليا غير موجودة
احسب كم مدير وزارة كم مدير مصلحة حكومية وهيئة
احسب قادة وضباط الشرطة والجيش والأمن والمصيبة الجديدة الجنجويد احسب وكلاء النيابة والقضاة
احسب المستشارين
دا فقط علي المستوي الولائي
ديل كلهم عرباتهم بكم وبتصرف كم من الوقود ؟
علي المستوى الاتحادي كان عندك ٣٠ وزارة تم دمجها لعشرين لكن ذات الكادر شغال حتى الان بكامل مخصصاته جمعوهم جمع فقط
شوف عندك كم شركة حكومية شغالة تصرف من الحكومة وتبيض خارج الحكومة !
دا كلو علي حساب الشعب

الان زادت اسعار البنزين والديزل وزادت مباشرة الاسعار ولسه بعد تفتح المدارس كمثال بسيط اَي أسرة فيها طلاب عاوزين ترحيل اقل بتاع ترحيل كان ١٥٠٠ ج الان ح يزيد اقل شي ٣٠٠٠ لكل طالب تخيل أسرة عندها طفلين فقط ح تكون محتاجة ٦٠٠٠ ج ترحيل طلاب شهري
اَي بتاع حافلة ح يزيد علي كيفو لانو مشتري جازولين بسعر تجاري
اَي بتاع مخبز شغال بجازولين او غاز ح يشتغل علي كيفو لانو يشتري تجاري
اَي بتاع نقل بضائع ح يشتغل علي كيفو لانو بشتري تجاري
اَي بتاع ترحال يشتغل علي كيفو

كل دول ح يشتغل علي كيفو كيف عاوز يكون عندك انتاج في بلد *البترول ينخفض عالميا* عندك حكومتك تزيد السعر داخليا

قلل *الصرف الحكومي وميزانية الامن والدفاع والجنحويد* وحول الميزانية للإنتاج بعد ما تصل انتاج ١٩٨٩ وظبط نظامك المصرفي. عندك ٣٨ مصرف و ٨٠١ فرع فقط قلل عدد المصارف وزيد الفروع واجبر كل بنك يفتح فروع في مناطق الانتاج وزيد من التعامل الرقمي عشان تقلل استخدام الكاش وتقلل الطباعة دخل كل إيراداتك الحكومية النظام المصرفي وامنع السداد الحكومي النقدي منعًا للتجنيب اعمل تغيير واستبدال العملة عشان تضمن دخول كل العملة خارج الجهاز المصرفي وتحارب غسيل الأموال وقبل ما تستبدل العملة اعمل إجراءات تمنع التصرف في العملة خارج الجهاز المصرفي
*رجع كل شركات و ممتلكات الشعب النهبوها الكيزان* دخل كل ما تسمى بالمنظومة الدفاعية الامنية لوزارة المالية موش دي حقت الشعب ؟
ارفع الدعم بعد داك زي ما عاوز
الكلام دا كويس معاك ؟ طوالي اعمل شير خمو زي ما هو وانشرو
محمد حسن العمدة
#مجزرة_القيادة_العامة
٣١مارس ٢٠٢٠

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..