البعث يدعو لإعادة النظر بسعر الوقود التجاري

يا جماعة البعث الله يهداكم او يهدكم زى ما هد دول المقر العراق وسوريا!! حكايتكم شنو بالضبط ؟ يا اخوانا الشعوب خلاااص وعت وبقت مدركه لكل ما يدور حولها بفضل النهضه التكنولوجيه وانتو لسه عايشين زمن صدام والاسد وانظمتهم الما قدرت تدافع عن نفسها !! لو سمحتم (خلوكم مع الزمن) زى ما قال الفنان رمضان حسن لواحد من العازفين لما خرمج ليهو اللحن اثناء غناهو !! ما ممكن تعكلتوا ليكم فى نظريات ما اغنت اسيادها فى شىء وتشتغلو لينا شغل الحلاقين البتطجتو المقص خمسه مرات فى الهواء وواحده فى الشعر وخاصة نحن طالعين من كُبة الكيزان الملاعين الله لا خَل ليهم عَقاب ولا طرح البركه فى النهبوهو بالله عليكم سيبكم من الايدلوجيات الغطست حجرنا وخلوكم سودانيين اولاد سودانيين وما ظنيت الشعب السودانى بعد تجربتو المريره مع الكيزان تانى حيدعم اى حزب ايدلوجى ومافى شاب او كبير سن بعد متابعتهم ما يجرى فى العالم مستعد يخت صباعو تحت ضرس انظمه ثبتت انها شموليه موغله فى شموليتها وما بعتقد انكم ما عارفين ان حزب البعث الكان فى العراق او المازال ينازع الان فى سوريه حكمهم ما شمولى إلا إذا كنتو شايفننا بقنابير ونصيحتى ليكم إذا كنتو شايفين ان العمل السياسى سبيل كسب عيشكم الوحيد وما حنتهمكم بانكم بتتلقو اموال من الخارج لاننا عارفين ان الدول الكانت بتمولكم بقت فى روحا وفى تولاتا وبقت محتاجه للبتدعما وعشان ما تجيبو الكلام الماسخ لروحكم ارجوكم تعيدو النظر واطلعوا لينا ببرنامج سودانى لحما ودما وحرام تضيعو جهودكم فى ما لا طائل منه واعتقد دى فرصتكم وخاصة ان الاحزاب الطائفيه الى زوال بفضل وعى الشعب السودانى الاكتشف خداعهم للشعب ممثلا فى اجدادهم وابائهم وانتم الان فى مواجهة شباب واعى ومثقف وغير مستعد للاستجابه لنظريات لم تفد شعوبها لتطبق هنا والكلام ده بمناسبة اعتراضكم على تسعيرة الوقود فمثل هذه الاعتراضات لم تعد جاذبه كى تكسبكم الجماهيريه الانتو مستهدفنها !!.