مقالات وآراء

نموذج عالمي في رفاعة يحتذى به انتصار محقق على الاحباط والظروف

علاء الدين الدفينة.
لقد انتصرنا.
بهذا اختصرت رفاعة معركتها للقضاء على كورونا.
الناس ديل عملو شنو؟؟ تابعوا معاي :
1/ ناس رفاعة انتهو من توزيع كرتونة رمضان وطوااالي في نفس اليوم الانتهو فيهو اعلنو الحرب على كورونا… نفس المجموعات بتاعت الكرتونة… كل الاحياء… اتيام من الشابات والشباب طلعو الابرول الازرق ولبسو الابرول الابيض ونزلو الميدان.
2/ عملو غرفة صحية مركزية.. واتوزعو لي مجموعة غرف… كل حي فيهو غرفة صحية مصغرة مرتبطة بي غرفة المدينة المركزية..والغرفة دي نفسها مرتبطة بي غرفة المحلية… وكل غرفة فيها كادر طبي من الحي.
3/ عملو لجنة امنية تشرف على تطبيق الحظر منسقة مع اللجنة الامتية… وقفلوا كبري رفاعة الحصاحيصا … وعملو لجنة خدمات لي المواد الاستهلاكية ودعم المتضررين من الحظر ودي مشت في خط توفير اسواق في الاحياء لتفريغ سوق المدينة… واللجنة الاخيرة دي لجنة الصحة وشغالة في تجهيز عنابر العزل والحجر وتوفير الدعم الطبي وحاجات الكورونا (كمامات ومعقمات الخ).
4/ اليوم الاثنين 4/52020 ناس رفاعة قطعو شوط في التقصي المجتمعي في الاحياء ولسة مواصلين… بس ما وقفو هنا… الشباب ديل بدو في نقل الاسواق للاحياء… زي ما حصل في الحي 1 ديم لطفي واحياء تانية … بجيبو المواد الاستهلاكية في الحي عشان يقضو على السوق المركزي ويحاربو الزحام.
وناس ديم لطفي ديل عجيبين… ديل وصلو مرحلة يجيبو ليك المعمل والدكتور والعلاج لحدي بيتك… بس انت ما تطلع من البيت.
5/ رفاعة اليوم اتجهت لتطبيق الشغل دا في كل الاحياء.
6/ عندهم ترتيبات تانية شغالين فيها للقضاء على زحمة الطلمبات والمشاهد الفيها… منتظر شغل لجان الوقود عشان انشرو ليكم.
7/ ما انسى اقول ليكم انو رفاعة بتوزع الخبز المدعوم في الاحياء من فترة… يعني عيشك بجيك في دكان الحي … ما تمشي الفرن… وديل ما بمشو الافران الا الدقيق المدعوم ما يجيهم من الولاية… ويا ريت الولاية ما تقطعو منهم زي ما عملت قبل ايام.
8/ عاوز اقول حاجة مهمة… المتطوعين ديل بالمئات… وكللللهم شغالين مجان… مافي زول منهم بشيل قروش.
9/ وناس رفاعة دفقو للمعينات مئات الملايين… دي لي المعينات ولي اي زول ممكن تجيهو كورونا… عشان ما يطلع من البيت…ح يشترو للمحتاج حاجاتو ويجيبوها ليهو في البيت… وبرضو منظمة الابايتور دعمت منصة رفاعة لمحاربة الكورونا بي 129000 ج.
10/ الناس ديل وقفو هنا؟؟؟ لا… نقلو شغلهم دا لي الارياف… وهسه معاهم مجموعة قرى انضمت ليهم.
دا الشغل المفروض يحصل في كل السودان.
…….

‫2 تعليقات

  1. نحيي شباب رفاعة و نرفع لهم القبعات.. الله يخليكم و يحفظكم يا رب.. #ثورتنا_ثورة_وعي..

  2. انت عايز تقارن رفاعة بابكر بدري ومحمود محمد طه ببقية المدن ، للاسف من الصعب نطبقها في بقية المدن ، لانها بكل صراحة لحم راس مافي لا ثقافة ولا تقاليد ولا عادات تجمعهم ومافي كبار ليهم كلمة في اغلب الاحياء زي زمان 30 سنة كبارهم كانوا الكيزان بفلوسهم وسلطتهم وبعد الثورة يا دوب بدأت تشكل قيادات جديدة في الاحياء بمقايس جديدة هناك اناس سخرهم الله لقضاء حوايج الناس ويستمتعون ويحبون ذلك هذه العينة بدأت تتقدم الصفوف وتحتاج لوقت حتى تتبلور سلطتهم الناعمة،،

    اما في الخرطوم اقول لك مستحيل بالرغم من انها العاصمة بس كل التخلف فيها كبارهم ليل نهار جارين على شنو الله اعلم وما فاهمين حاجة عن الاحياء الساكنين فيه زي الغرباء وشبابها غير لجان المقاومة وهم قلة ، والباقين ما فاهمين ومدعين وديل احسن منهم الما فاهم قايتو الله يعينهم على نفسهم ويعين الحكومة عليهم ناس الخرطوم.

زر الذهاب إلى الأعلى