مقالات سياسية

يا كباشي الجيش للدفاع عن الوطن وليس لحكم الوطن

سعد مدني

كباشي فاهم الموضوع غلط انو الجيش مهتمه يحكم السودان… وقال اذا رجعنا الثكنات زول يحكم ساعة واحدة مافي.. يا كباشي الديش قطاع من قطاعات الدولة السوادنية، زيو وزي قطاع الاطباء، والمهندسين، والمعلمين، والفراشين، وعمال النضافة…كلهم مهمتهم خدمة المواطن السوداني وكسب رضاهو…والمواطن-عبر مؤسسات الدولة- بدفع للديش ولكل الموظفين والعمال مرتباتهم عشان يقوموا بالواجب دا…

الديش ما من مهامو حكم السودان… والقعاد في كراسي القصر الجمهوري..الديش مفروض يرجع ثكناتو..ومهتمو الأساسية يقعد في الحدود ويحرسا… في الفشقة وحلايب وغيرا..ويدافع عنها ضد الغزو الخارجي…ويحموا البلاد من غزوات الدول الخارجية واطماعهم في الأراضي السودانية… واذا عملوا الحاجة دي… نحن حنكون فخورين بيهم…وحنردمهم بالأوسمة والزهور…ونغني ليهم الحارس مالنا ودمنا.. جيشنا يا جيش الهنا..

اي ضابط واي عسكري خش الديش..عارف انو دي المهام بتاعتو..ودخل الديش بكل رضاهو عشان ينفذ المهام دي…ومافي زول اجبرو على ذلك….اي موظف في الدولة يمارس مهامو وفق عقد العمل بتاعو..وبرضاهو…

الديش السوداني حكم السودان لمدة تزيد عن الخمسين سنة …ودمر السودان دمار شامل…كل فترات الحكم العسكري كانت فترات بتاعة قهر وظلم وحروب داخلية في كل الأطراف…ورجعوا السودان مليون سنة ضوئية للوراء في كافة المجالات… من تعليم وصحة وبنية تحتية وغيرها…لانو الحكم ما وظيفتو…الديش وظيفتو يدافعوا عننا…

نحن المواطنين البندفع الضرائب والرسوم والجبايات للحكومة عشان تخدمنا في الصحة والتعليم وتخدم رفاهيتنا وتوفر لينا الأمن…ما عشان الديش عندو سلاح يقوم يعمل انقلاب عشان يحكمنا…السلاح دا نحن المواطنين الاشتريناهو ليهو عشان يحمينا بيهو…ما عشان الضباط اترقوا وبقوا عمداء ولواءات وفرقا ….دايرين يحكمونا….الضباط ديل اترقوا على حسابنا.. ونحن البندفع ليهم مرتباتهم وموفرين ليهم العربية والمسكن والكهربا والموية المجانية…عشان يحمونا ويدافعوا عننا ضد الأعداء الخارجيين…

الدايرينهم يحكمونا..هم كفاءات مدنية (ملكية ساي) ..نحن نختارهم بارادتنا الحرة..عبر انتخابات نزيهة…ونراقبهم عبر ناسنا في المجالس التشريعية…وممكن نغيرهم في أي لحظة بالإجماع.. وفي النهاية يحصل تبادل سلمى للسلطة بعد كل اربع سنوات…ونختار حكومة مدنية جديدة..

تاني مافي انقلاب عسكري حينجح…خلاص الشعب بقى واعي…والأحياء مستفة لجان مقاومة…مليانة شفاتة وكنداكات….اي بيان اول..او رنة موسيقى ديش في التلفزيون…الشوارع دي كلها حتترس…والدخاخين حتكتم كتمة جد …ويحصل عصيان مدني شامل…وح تظهر مليونات زي مليونية ٣٠ يونيو، وعينك ما تشوف إلا النور…تاني حكم عسكري إلا على أجسادنا …وتاني مافي عسكري يخت بوتو في القصر الجمهوري…الديش مكانو الثكنات والحدود…تحكمنا حكومة مدنية وديمقراطية…ولأبد الابدين..ولَ نحرق السودان دا كلو…لعب تاني مافي….درش بس..

سعد مدني
[email protected]

‫5 تعليقات

    1. لأن السيستم كان غلط ولم يتسنى لأي حزب سياسي قيادة الحكومة لوحده او وجود رئيس جمهورية له سلطة الادارة المدنية للدولة. لذا في حالة أي اختلاف بسيط بين المدنيين ان شاء الله زعلة ساكت يتحرك واحد عسكري مخبول وجاهل يحتل الاذاعة ويقول انا ربكم الاعلى وبعد شويه نلقى السودان والسودانيين في نار جهنم.

  1. لذلك يجب على الثورة سن قوانين عسكرية لا تسمح بكل فاقد تعليمي يخش العسكرية ويصعد ويصب مرضه النفسي على الناس- يجب من يدخل العسكرية ان يكون مكملا للجامعة وقد دخل الجامعة بنسبة اعلى من سبعين في المائة حتى لا يكون العسكري مريض نفسيا.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق