الفرق بين المنشور القديم لسياسات الذهب والمنشور الجديد

طيب إجابات متفرقة عشان الناس تعرف الفرق بين المنشور القديم لسياسات الذهب والمنشور الجديد المجاز اليوم في اجتماع لجنة الطواريء الاقتصادية – لحكومة الثورة….

اولا في زمن الكيزان هم كانوا بحددوا سعر جرام الذهب عبر بنك السودان المركزي وطبعا بختوا ليك سعر قليل مقارنة بسعر الذهب في البورصة العالمية وبجبروك تبيع ليهم هم في بنك السودان المركزي عشان هم يربحوا، ودا كان بخلي اغلب دهب البلد مهربة لان فارق السعر كبير، تخيل الجرام كان بكون في البورصة لحدي 6000 جنيه وسعر البنك بكون 4000 جنيه، يعني زول ما انتج ولا دق حجر دقش بكسب من عرق المنتجين اكثر من الثلث بسبب منشور وسياسات.
مثلا اليوم سعر بنك السودان كان 4560 وسعر العمارة ياهو السعر الاخر كان 6700 يعني فرق في الجرام الواحد اكتر من 2000 جنيه، فبعد منشور اليوم تاني مافي سعرين، سعر واحد وبس ولا يحدد بواسطة جهة ولا إلزام وبالتالي لا سبب للتهريب، تجي تبيع بعين قوية.

ثانيا : بالنسبة لشركات معالجة الكرتة كان مسموح ليها تصدر حوالي 15٪ من إنتاجها والباقي تبيعوا لبنك السودان بسعر البنك المعلن مثل الفوق، ولشركات الامتياز كان بتصدر حوالي 70٪ والباقي تبيعه للبنك أيضا بالسعر المعلن، المهم هنا زاتو كان بكون في تهريب من إظهار الإنتاج الفعلي وبالتالي النسب ما صحيحة، حاليا تصدر اي كمية اكثر من 10 كجم فقط وفق لوائح الصادر من وزارة التجارة والجمارك والمواصفات والمقاييس وبنك السودان المركزي وحتى صغار المنتجين والمصدرين المعدنيين التقليديين اللي يملكوا اكثر من 10كجم ممكن يصدروا بالباب عديييل، ويجيبوا حصيلة الصادر وفق اللوائح برضوا.

المنشور دا اهم من كدة خلى سعر الذهب مثل سعر البورصة العالمية ومافي جهة ستفرض سعرها وتجبر المنتجين ببيع انتاجهم إليها استغلالا لسلطة الدولة.
وبنك السودان المركزي ووزارة المالية تشتري الذهب وفق سعره الجاري في السوق ليكون عندها ذهب عيني.
الشركة السودانية ستتحصل نصيب الحكومة لصالح وزارة المالية والتخطيط الاقتصادى عينا من الإنتاج وده بالتراكم بخلينا عندنا احتياطي من الذهب.
طيب دا ح يعمل لينا شنو، اولا كل انتاجنا من الذهب بكون مضبوط وبطلع بالقنوات الرسمية وثانيا الدولة بتعرف انتجت كم ولو عايزة تشتري بتخطط وفق ماعندها.
ثالثا ح نتحصل كل عوائدنا الجليلة تقريبا وما حيكون في تهريب ولو في زول هرب مع ذلك ستكون العقوبات رادعة للغاية.
أيضا سعر البورصة العالمي دا ح يخلينا نجذب كل الذهب المنتج من الدول المجاورة ومع مرور الوقت يمكننا أن يكون عندنا اكبر سوق للذهب، وبالنسبة للمواطن سيقل الضغط على الدولار لانه سيودع ذهب عينا بدلا عن الدولار لان الذهب مضمون اكثر من العملة الحرة، وحساب الودائع ده في بنك السودان لو أصبح كبير سيرفع من القيمة الشرائية للجنيه لانه سيكون مضمون في السوق لانه مسنود باحتياطات الذهب في حسابات الودائع.

بالإضافة إلى ذلك المنشور الجديد بدعم الإنتاج وبخلي المستثمرين يجوا القطاع دا جارين حفايا وبخلق فرص عمل جديدة وغيرها من الفوائد، دا اللي قدرت اتذكره من المناقشات لصياغة المنشورة

الناس كدا افتكر بيكونوا عرفوا فرحتنا بالمنشور وبالقرار التأريخي لحكومة الثورة ….

وفي الختام لأول مرة في تاريخ بلادنا انو المنتجين كلهم ادلوا برايهم وشاركوا في صياغة المنشور حتى المعدنيين التقليديين.

وشكرا

مبارك أردول
17 يونيو 2020م