الخرطوم: مهجه اشرف ابو القاسم
اعلنت قيادات في الجبهة الثورية عن رفضهم مشاركة الفنانة ندي القلعة في الاحتفال بتوقيع السلام في جوبا .وبرروا رفضهم بانها ليست من فنانات الثورة ولم تشارك في اي محفل ثوري .
وقال ممثل اصحاب المصلحة الصادق محمد مختار لـ(الراكوبة) ان الفنانة لا علاقة لها بالثورة السودانية ووصفها بالبعيدة عن الثورة في السودان ولم تشارك في اي محفل ثوري وقال ان للثورة شعراء وفنانين تعرفونها جيدا .
وفي ذات الاتجاه قال عضو وفد التفاوض يحي محمد نور ان هنالك لجنة لتدارك الامر وان مشاركة ندي غير مرضية ولا تعبر عن حجم الحدث والروح الثورية .
من جهته اكد القائد وكبير المفاوضين الجنرال نمر عبدالرحمن عن عدم ارتياحه لمشاركة الفنانة والذي يعطي الحفل طابع اخر ،وقال انه يرفض المشاركة بشدة من جانبه الشخصي والمح الي امكانية عدم مشاركته في الحفل حال مشاركة ندي القلعة.
ومن جانبه اكد عضو وفد التفاوض عن حركة تحرير السودان بقيادة مناوي احمد حسن (دبة) ان للفنانة ندي القلعة مساهمات واضحة في عهد النظام البائد ولم تقدم للثورة اي عمل يذكر يجعلها تتقدم ثوار القطاع الفني للمشاركة في جوبا.
منتهي المهزلة ندي القلعة في حفل توقيع سلام؟؟؟ لكن انتو رضيتوا بحميدتي المجرم القتل اهلكم بنفسه ما ترضوا بندي اي هي تبع النطام لكن في النهاية قونة َ بس ما قتلت زول بس زغردت للقتلة ولا كباشي وبرهان القتلة كلكم رضيتوا بيهم حرية وتغيير وجبهة ثورية وكلوا
للاسف السودانيين أصبحوا يتعاملون كالأطفال
أطفال شنو يا حجة!!! ندى القلعة لم يسجل لها موقفا واحدا موءيدا للثورة وغابت تماما عن اعتصام القيادة وهى تعتبر من المطربين المعروفين و تاريخها مع النظام البائد تحوم حوله الشكوك, فحسنا فعل من طالبوا برفضها.
ولا أطفال ولا حاجة ..لايمكن واحدة مثل ندى القلعة ومستوى الشريف مبسوط منى أن تحييى حفل ثورى ومناسبة قومية لها دلالاتها القومية !
نعم صحيح ندى القلعة فنانة ليس لها اي علاقة بالثورة السودانية نتمنى ان لا نراها في اي محفل وطني .اتمنى ان يشارك في الحفل فنانين ذو طابع ثوري لهم مساهماتهم الواضحة اثناء الثورة وبعدها ولكم التحية
التحيه لكل من قال لا لهذه القلعه… فهي ليست بحجم الحدث و لا بأهمية الملتقي.. كانت ربيبة النظام الفاسد و لعقت من دماء البؤساء… لم تكن حاضرة للثورة وتعمدت الاختفاء فيجب تجاهلها و العايز يجيبها في مناسبة خاصة فهو حر… السلام اكبر من القلعة
ولماذا فنانين وفنانات للاحتفال ؟الا يكفى القاء الكلمات التى تشيد وتوضح عن كيفية المحافظه على هذا الاتفاق ؟لماذا علينا ان نرقص ونغنى بعد كل مناسبه ؟الم نرتاح مما كان يحدث بعد كل لقاء للبشير او اى قيادى بالعهد السابق من عرضه ونقيز ورفع سبابة اليد اليمنى؟هل رأى ايا منا اى لقاء اوربى او امريكى اوفى اى مكان بالدنيا ان كان هناك فنانين وفنانات للاحتفال بعد اى منتدى! وكم سيكون قيمة الشيك لكل فنان وتكاليف ذهابه لمكان الاحتفال ؟الم يكفى ان تم صرف 10 مليون دولار كاش اخذت من الخزينه لتسديد تكلفة الاجتماعات ….فى وقت لم نجد الاموال لاستجلاب الادويه الهامه لهذا الشعب المغلوب على امره ! الم تقم ثوره باركها الجميع …الم يكن من الافضل لنا واوفر واجدى اقامة كل تلكم المفاوضات بالخرطوم ؟
الله يديك العافي يا اخي .. ده ياهو الكلام الفيه الفايدة …. بلا قلعة بلا وادي
كلام صحيح 100% و هو اصلا اتفاق ناقص بدون الحلو و محمد نور و بدون مشاركة و تأييد واضح من المكتويين بالنار من ساكتي مخيمات النزوح
هل انتي مدركة حجم هذه الثورة والأرواح التي استشهدت في سبيل هذا الوطن المنبر يجب أن يعتليه المناضلين والشعراء والكنداكات انتهي عهد المجاملات لذا يجب رفضها وهؤلاء هم العقلاء اما الأطفال اتركهيم في براءتهم
الشى المؤسف انه ندى اصبح لها وزن لدرجة تاخذ لها صفحة كاملة من صفحات الراكوبة
النص الأصلي لقصيدة البرجوكي..
للراحل / يوسف البدوي حمد..
شايفنك يا البرجوكي
متحزمة بالقمرات..
مشلولة بنص دستوري
كاتباهو الدبابات..
الناس الجد راجينك
الناس الجنها ثورة..
السدرو بنور الهامش
الصبرو سنين ودنين..
الناس المحرومين …
السكنو بيوت الطين..
الشالو الشمعة سنين
الهتفو بنبض الشارع
▪حرية ، سلام ، عداله
والوحدة خيار الشعب▪
والشعب الطيب صابر
مضبوح الروح والقلب..
ودران بيفتش ذاتو
في أجندة حكم شمولي..
مابيدي الفقراء مصانع
لا مدرسة ، لا من قوت..
ما بيعرف الا الدوشكا
الدوشكا وربط البوت..
والشعب الطيب يمه
مسكون بي شوق
الناس …..
▪يا فقرا دواس لي دواس
ما أخير نتواثق أيوا
ونخلي الموت في السرحة▪
ويطير الدم في نحاس..
ونحاس الجيل الجاي
في التنمية والقرطاس..
ونحاس الجيل الواعي
في يقظة شعب الهامش..
البسأل ربو كتير
هل ممكن يحكموا فقراء
عفوا ياخليفة المهدي
الجبت رحيق الشمس..
شكرا محمود ود احمد.
الليلة نحاسك برة
في الدولة وحكم الشعب..
سوداني هويتك هامش
والهامش نبض النبض …
الناس البزرعوا نحنا
الناس البصنعوا نحنا..
الناس الركبوا الخيل
بسيف العشر الجآن..
في كرري وفي شيكان..
الزمن الاكبر نحنا
الصوت العالى أنحنا..
الطرح الواعد نحنا
لو أمة ولو إسلامي..
لو شعبي أو كان وطني
الحزب القادم نحنا
لا مدرسة لا تيار..
لا مويه تبل الريق
لا لقمه ولا سيار..
لا عابره ولا من ساي
لا نشرة ولا أسمار..
لا سلطة تمرق الحق
لا طلقة بتعمل بق..
لا عود بشق الفأس
لا زول بتشقق طق..
يا شعب عدالة ، عدالة
مزروعة لكل الناس..
ميزانا عديل حساس
في كفة ضميرنا الشعب
وفي كفه دموع الناس..
وفي أحلى أخوة وألفة
نتعايش بي احساس..
▪حرية –سلام – وعدالة
والوحده خيار الشعب ▪
أبنوسة ثوري ، ثوري
منشية بتضرب بوري..
للشعب الماهو ضروري
في الوطن الماكل نيم..
يا وطني الدنيا دبنقا..
حيكومة حنة وفونقا
للشعب المآخد خنقا..
علشان يشبع برسيم..
▪حرية ، سلام وعدالة
للشعب الهامتو سقالة..
في نص السوق العربي
ادروب بيفتش حاله..
علشان ما يبيع سكين.
سكين ادروب ما اتباعت
في سهم السوق الحر..
لا بتمشي جديد الثورة
بأعلي جياد ود دقنة
لا بتعرف طعن الضر..
حرية. . سلام.. وعدالة
والوحدة خيار الشعب▪
نعم هذا كلام صحيح ندي القعلة من عناصر النظام البائد ومن المغربين لهم. كان في احدي الحفلات وبوجود البشيرو بعد هجوم قوات د.خليل علي امدرمان اقيمت حفل ووكانت هي تغني لعمر البشير وعناصره- حسن ياحسن السرورانشاء الله عمرك يطول متل مجاري البحور- هذه الخاينة كوزة عفنة؟؟؟؟؟
(اما الزبد فيذهب جفاء ، واما ماينفع الناس فيمكث في الارض )
امسحوا الزبد واكنسوا خشاش الارض .. للثورة ثوارها وثائراتها وشعرائها واصوات الشباب .
لهم ألف حق في ذلك
هذه فنانة الكيزان الأولى
وأبو ريالة قبل كده ضرب ضابط شرطة كف عشان خاطرها
ندى القلعة ؟؟!! بالغتوا عديلو انا اعتبرها من افسد الفن و سا هم فى انحطاط الزوق العام.
الدعوه كان مفروض للقامة ود اللمين وابو عركي والفنانه الثورية نناسي عجاج
هو أصلا العزمة منو
بالله دى مش مهزلة
السودان بلد تراجيكوميديا! الجبهة الثورية هى إحدى مكونات قوى الحرية والتغيير… المفاوضات مع الجبهة الثوريه عاملة زي كأنه قحت تفاوض نقسها! التفاوض المفترض يكون مع الحركة الشعبية لأنها عندها الأرض والسلاح، أما الجبهة الثورية فما عندهم إلا الجعجعة.
المفاوضات… والجدال حول ندى القلعة كونها المفروض تغني في حفل التوقيع على السلام… كله كلام فارغ عشان يغشوا الناس بأنجاز وهمي.
ملف السلام الحقيقي هو في التفاوض مع الحركة الشعبية، والعدالة ما بتجي لضحايا الحرب فيدارفور وكردفان إذا ما جات للناس في الخرطوم وهم بيشوفوا قتلة أبنائهم في القيادة على قمة السلطة السياسية. لجنة نبيل أديب بعد شهادة 3000 شخص وعشرات الفيديوهات ما عايزة تقدم تقرير يدين حميدتي…. هل تتوقعوا عدالة لشخص أغتصبت زوجته وإنكتل في نص الخلا؟
خليكم في ندى القلعة
#لم_تسقط_بعد
خلاص يا اخوانا باركوها وجيبوا ليهم عاشة الجبل
المثل بقول لكل مقام مقال ولكل زمان رجال فهذا المقام ليس مقام ندى القلعة التى لم نعرف لها شئ قد مته للثورة اين ابو عركى اين نانسى عجاج ياجماعة لاتفسدوا جو الاحتفال بهذه المخلقوقة رجاءا .
ديل بشابش تانين ما صدقنا اتخلصنا من عرض بشة واعوانه يطلعوا لينا ديل للعرضات
الناس في شنو والحسانية في شنو ؟ تبا لكم
حفلة ندي القلعة تشارك ما تشارك ده شنو ده اسع
بعدين توقيع شنو وحفل شنو ؟ والجديد شنو وكم مرة مرة الناس وقعت
والتوقيع ذاته عطاء من لا يملك لمن لا يستحق
حكومة مبغوضة فاشلة 200% وحركات مرفوضة ومبغوضة 200%
ابو عركى….عبد اللطيف عبد الغنى… نانسي عجاج… وشاعر البلد ازهرى محمد على …
هم خير من يمثلون الثورة فى يوم الاحتفال بالسلام وفى كل مناسبات افراح الثوره….
فلتذهب ندى القلعه لتغنى للشريف ومناسبات (النقطة) فهى لاتمثل حتى الفن السودانى…