رسالة إلى مدير الشرطة، وإلى تجار العملة

السيد مدير الشـرطة أكيد وصلك تقدير الشباب لجهودكم ، لكن الحل لازم يكون متكامل عشان نضمن الأسـتمرارية

لازم متابعة MBOK وغيرها من الحسابات المصرفية الشغالة ساكت

لازم عمل أمني استخباراتي يصل للرؤوس الكبيرة

مصانع الحديد أكبر مغسلة كاش في السودان لازم يتم متابعتها العايز يشتري خام من أكرانيا لازم يثبت التحويل من داخل السودان بكامل القيمة .. حسابات التستر البنكية في السعودية والأمارت لازم يتم متابعتها

الموضوع ده أكبر مهدد للأمن الوطني ده يحرق مدخرات الناس ويزيد عذابها بإرتفاع الأسعار ده أكبر من المخدرات و الأرهاب وتهريب البشر ، لازم خطة قومية ومكتاملة مش هوشة وتنتهي . لأنهم حا يرجعو أقوى وحا يصيب الناس الفرحانة بجهودكم بالإحباط

اليوم بدت الحركة في قروبات السعودية والأمارات وكأنه ما في حاجة حصلت صحيح السعر أقل 20% من أعلى قمة ، لكن هسه الناس تتطمن وتبدأ تتصاعد و المضاربات تشتد ويتجاوز أعلى قمة وصل ليها الدولار .

…

الأهم القرارات تكون متكاملة خلال الأسبوع ده لازم تنطرح خطة لأستقبال تحويلات المغتربين .. وتوررونا كيف حا تفتح التحويلات البنكية .. وتعالجو المهددات الأمنية للمجموعات خارج السودان

….

أخوانا تجار العملة فيكم الراقد في 4مليون دولار وفيكم القاعد في 100ألف دولار بالله عليكم شيلوها وأمشو أشترو الأراضي الشاسعة ومحجوزة بلا معنى في غرب أمدرمان أو شرق النيل

أزرع محاصيل فول سوداني ، فول صويا ، سمسم ، قمح ، سيلاج والله تستفيد أكتر على المدى الطويل وتفيد شعبك الـ90% منهم ما لاقي يشبع في بطنه .. وأخير ليك من مخاطر عالية و ربح سريع ما عندو قيمة غير يزيد عذابات أهلك وفي النهاية حا تهد المنظومة الإقتصادية كلها وتتطلع الجنيه من التداول وتقعد أنت ذاتك تتفرج.
الهادي بورتسودان – فيسبوك