مقالات وآراء سياسية

السودان: صراع الجهلاء.. والعرجاء لمُراحا..

علي جعفر

✍️ وارغو.. كان بلعب في انيمبا النيجيري..
لاعب فنان ومحترف.. نادراً أن تجود الملاعب الافريقية بمثله..
لسوء حظو.. وتعاسة عمرو.. جابو جمال الوالي للمريخ..
وهاك.. يا اعلام رياضي.. وتحليل وتنظير.. وتمجيد.. وكلام ما اتقال في زين الدين زيدان..
الكورة اللعبا وارغو في الصحف ما لعب خمسة دقائق منّها في المريخ..
ده غير اعلام المعارضة.. شغال شغل من نوع تاني.. وارغوا اتقبض سكران.. وفي شارع النيل مع بت.. ووارغوا مزور شهادة ميلادو.. وووو..
ماخلو ليهو جنبة يرقد عليها..
ده غير أئمة المساجد والفتاوي في المبالغ الفلكية الادفعت في تسجيلو..!!

✍️ وفشل وارغو مع المريخ.. ولا حتى تسديدة ناجحة ساي سددا نحو مرمى.. ولا هدف ما أحرزوا.. وخسر النادي الصفقة المليارية وقتها.. وبدد أمواله..

✍️ والخلاصة يا سادة تحول اللاعب الأسطورة استيفن وارغو من نجم كروي محترف لعبارة شهيرة تتداولها الأوساط السودانية.. “وارغو الماسورة”..
وصار تشبيه ومثل.. يقولوه لأي حاجة تطلع فالصو وفشنك.. “طلع وارغو ساي”.. يعني ماسورة..
ومافي داع نشرح مفهوم “ماسورة” و “فلس فلس” وغيرا من مصطلحات جيل دسيس مان.. الظهرت مع حلاقاتم العجيبة دي.. وبقت ثقافة مجتمع..!!

✍️ نفس تراجيديا الصراع.. دي حصلت مع السيد د. حمدوك.. شبكونا ليك تكنوقراط.. والموهبة الفكرية.. والخامة العقليّة.. وخم الاعلامي حرقوا بيهو الراجل قبل ما يصل مطار الخرطوم..
تطبيل واشادات وكلام ما اتقال في أعظم قادة التنمية بمختلف بلدان العالم..

✍️ شكراً حمدوك.. ده بس شعار الترحيب بقبولوا للمهمة الوطنية..
اعلام واهتمام متعاظم وتطبيل ما لقاهو لي كوان يو قائد التنمية والنهضة الحديثة في سنغافورة.. ولا لقى ربعوا مهاتير محمد قائد الحداثة والتغيير بماليزيا..

✍️ والخلاصة.. ضاع حمدوك وضاعت شكراً حمدوك كما ضاع وارغو.. بالمريخ..
وقحت كلّها طلعت استيفن وارغو..
والثورة خسرت أكتر مما خسر جمال الوالي..
جمال الوالي خسر قروش.. والثورة خسرت وطن يفتقد لأبسط قرار قوي شجاع يبني به حمدوك أُمة قويّة..

✍️ نحن شعب نعرف نصنع الوهم..ونعرف نحرق الوهم.. ونعرف نلوي عنق الحقيقة.. ونعرف نضلل الاعلام.. ونعرف نتاجر بقضايا الوطن..
نحن شعب نعرف نصنع “الفرعون”.. ونعرف نعبد الفرعون بعد صناعته.. ونعرف كيف نكفر به ونرميه خارج الملعب عندما تنتهي صلاحيته..

✍️ باختصار نحن شعب موهوم.. لأننا ننتظر التنمية بأيدي أشخاص.. لا بارادتنا والتفافنا حول برامج تنموية..

✍️ نحن شعب نحرق وطننا بأيادينا لا بأيدي استيفن وارغو..

✍️ الخوف القحاته يصرو على نغمة (حمدوك.. تقعدبس..)!!

✍️ علي جعفر
<[email protected]

تعليق واحد

  1. تحية طيبة الشخصية السودانية مزيج من الصوفية الذاهدة و المحبة للبهجة في نفس الوقت و ماركسي لو جيبو مقدود يعني مفلس و راسمالي لو ضربتو رطوبة القروش حتي لو كانت موجة عارضة تصيب الناس مرة في مسيرة حياتهم حاجة كده فريدة ذي خلطة الاقاشي لحدي الان ما في زول عندو الخلطة الحقيقية فيا قربي ما تشغل بالك بهم تقبلهم كفرض الصلاة ديل دايرين نبي للاسف مافي واحد جاي احتمال المسيح الدجال مرسل لهم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..