✍️ *عمّك رجل كبير في العمر.. راكب مواصلات من اللفة للسوق العربي.. ومن الحافلة اتحركت.. هو يكورك للكمساري.. “أبو حمامة يا ولد”*
*والكمساري يرد ليهو.. لسه يا حاج لمّا نصل.. بنزلك..” وعمّك تاني ياخد دقيقتين.. “أبوحمامة يا ولد”..*
*الركاب ما مقصرين.. “لسه يا حاج”.. “قول بسم الله متين اتحركنا..”.. “لما تصل بنكلمك..”.. “شنو الازعاج ده ياخي.. ابو حمامة ابو حمامة..”*
*الحافلة وصلت.. والركاب كلهم بصوت واحد..”ياها دي ابو حمامة قوم انزل.. نزّل عمّك يا ولد”..*
*عمّك اتضايق منهم.. وهو نازل من باب الحافلة.. قال ليهم..”شكراّ ليكم.. اتاري البلد بقت ملانه “مُعرصين”..*
✍️ *اشتهر المصطلح ده في هشتاق.. “انتخبوا العرص”.. الهاشتاق الاكتسح تويتر لما السيسي استقال من وزير دفاع واترشح لرئاسة الجمهورية..*
*خلى الخواجات يفتشو ترجمتو.. مفتكرينو مصطلح ارهابي..!*
*وحار بيهم الدليل قاموا ترجموه (pimp) بمعني قواد، وتانيين ترجموه ( jerk).. شخص أحمق.. وكلمة “عرص” لها معاني كثيرة وهي كلمة عربية فصحى.. ظهرت مشتقاتا عند المصريين بصورة كبيرة.. “التعريص السياسي” و “التعريص الاداري”..*
*السودانيين يعتبروها الفاظ مُسيئة.. ما بقولوها الا لحظة الزعل..*
✍️ *وما أكثر “التعريص الاداري” بمؤسسات الدولة.. يشيلو ويجيبو في الكلام..*
*والغلط ما منهم.. من المدراء.. السميعيين..*
*المدير الفاشل.. هو المدير البسمح لشلة.. وشرذمة من النوعية دي..*
*تكون محيطة بيهو..*
*والطامة الكبرى.. يشاورا في قرارات اداريّة..!!*
*ويبعد الصادقين.. والنزهاء.. ويعين مدراء الادارات الصغرى عبر علاقات الشلليات..*
*ويحتكر الادارة عبر الشلة.. ويمارسوا التعسف الاداري.. ويشتغلوا بأمزجتهم الشخصية.. ويضربوا بالقوانين واللوائح عرض الحائط..*
✍️ *ويسود بعدها قانون الغابة.. مافي زول يتكلم في المدير..*
*تتكلم طوالي الشُلّة تهاجمك.. وتنزّلك أبوحمامة..*
*نوعية من وزراء.. ومدراء.. الواحد من يتعين في كرسي السلطة.. يفتكر الوزارة حقتو.. والموقع ده وقع ليهو ورثة من أحد والديه..*
*أي زول يتكلم في الادارة.. او ينتقد الأداء.. ويتناول السلبيات..*
*طوالي يفتكر الموضوع ده هجوم على شخصو.. ويغضب ويبدأ سياسة المُعاداة.. للبنتقدوه..*
✍️ *الادارات فقيرة جداً من كوارد ادارية مؤهلة.. كراسي الادارة قاعدة فيها رؤوس فارغة المضمون والمحتوى..*
*الدليل.. انعدام أي بصمات نجاح على أرض الواقع.. وتدهور مريع في الخدمات.. وفشل كبير في التنمية.. والسبب.. عقول تفتقد الابداع الاداري..*
✍️ *أسوأ أنواع المدراء.. العايز يحتكر كل الصلاحيات..*
*ماعايز أي ادارة تحتو تشتغل الا بتوجيهاتو وتنظيرو..*
*يقيد ويسجن الابداع في مدراء الادارات الصغرى التحت ادارتو..*
*وعايز أي توجيه يصدرو.. ما يرجع ليهو بالرفض.. نهائي..*
*انت مدير ادارة توافق على توجيه مديرك العام.. مهما كان.. ماتكسّر توجيهو..*
*احتكار غريب لكل صلاحيات الادارات الصغرى من قبل المدير او الوزير أكبر خطر يهدد المؤسسية الاداريّة.. ويضيع حقوق المؤسسة وحقوق الموظفين..*
✍️ *الزمن ده لو عايز تقدم نصيحة.. جهز عصايتك معاك.. وتعال بيها..*
*لأنّ بعض المدراء والوزراء.. ممكن يضاربوك في انتقادك للادارة..*
✍️ *”اليقول بت المك عزبا.. قطع رقبه”..*
