وهذا عين العيب !!

قزاز ورذاذ

* كلمة (مُسايسة) مشتقة من كلمة (سياسة).

* والسياسة والمُسايسة هي أن تكون على قدر من (الحكمة والتعقل).

* ورأس الحكمة بالنسبة للسياسي (الموالي والمعارض) هو (ضبط الكلام).

* أضبط كلامك حتى لا يجرك لسانك لاستفزاز الناس.

* اللسان مُغرٍ وإطلاق العنان له يقود للمهالك ..

* ولذلك تحدث بالعقل وليس اللسان ..

* المهم ..

*في السودان عندنا ثقافة (البدائل) منتشرة بشكل كبير ..

* أي حاجة عندنا ليها بديل ..

* لو مشيت سوق الخضار وما لقيت (بطاطس) بتجيب (قرع) ..

* ما لقيت (زيت سمسم) بتجيب (زيت فول).

* ما لقيت (فول) بتشيل (زبادي).

* الغريب في الأمر لما نمشي (الجزارة) بنلقى (اللحم) موجود، ومع ذلك بنجيب (سلطة).

* حاجة تكسف.

* شاب مُتعقد من (شكله) قرر له الطبيب (عملية تجميل) فقام بشراء (توسان2020) وأصبح جميلًا في نظر الذين كانوا يسخرون منه.

* مبدأ هذا الشاب يتعامل به كثير من الناس الذين تهمهم المظاهر أكثر من أيشئ آخر.

* وبالمناسبة:

* في بعض بيوت البكا (يتحمس) الناس على (الفاتحة) حسب قيمة الزول المُعزي.

* البعض من الناس يفعل ذلك؛ وليس الكل.

*(الفاتحة) بتختلف من زول لزول.

* في ناس بيجوا بيت البكا وما بلقوا زول يشيلوا معاهو الفاتحة ..

* تلقى أهل المرحوم (لابدين) .

* شايفين الزول جاي يشيل الفاتحة ومع ذلك ما بقوموا عليهو .

* لكن تجي راكب ليك (برادو) ولابس مركوب (نمر) ولون (الشال) طقم مع لون (الجزمة) وتقول : الفاتحة ، تلقى صيوان العزاء كلو شال معاك الفاتحة .

* يشيلوها معاك ويبكوا لو لقوا طريقة كمان .

*  أما لو جيت لابس ليك (شحاطة) و(عُروق وشك مشحطة) لو قلت الفاتحة ما في زول بيقول ليك عينك في رأس .

* والحاجة دي بقت ظاهرة عندنا في السودان .

* بقت كتيرة ومسيخة .

* وهي (تؤكد) أننا نتعاطى مع (المظهر) أكثر من (الجوهر).

* وهذا عين العيب .

* تهاني (الردمية) وناهد (جبرة) ومنال (الأزهري) وحنان (مايو)، هذه أسماء فنانات وليس خطوط مواصلات .

* رئيس إتحاد المهن الموسيقى يجب أن يكون هو رئيس (نقابة المركبات العامة).

* وغايتو جنس غايتو .

* التبرع بـ(الدم) يمثل أعلى درجات الشهامة والكرم .

* قمة الإنسانية أن تشيل من دمك وتديهو لزول محتاج ..

* في ناس بيفصلهم من الموت (قزازة دم) ، وفي ناس لو لقوا (نص قزازة) ممكن يعيشوا .

* وفي ناس بتموت لانو (دمها بسيط)، وفي ناس (كترت الدم) عاملة ليهم مرض .

* وما بين هذا وذاك يبقى التبرع بالدم عمل نبيل تميز به الشعب السوداني بشكل يدعو للفخر والفرح .

* في مستشفي (الدايات) لو قالوا في مرا عايزة دم بتلقى (50) شاب جاهزين للتبرع وهذه (قمة الرجالة) والله .

* و..و.

* والرجال مواقف .