خليكم شاهدين يا جماعة: حمدوك قفل الخط في وجهي ..

علي العبيد
حاولت عديد المرات الإتصال على دولة رئيس الوزراء د. عبد الله حمدوك عقب عودته من باريس و لكن لم أفلح.
كان غالباً ما يكون الخط مشغولاً، و أحياناً يأتيني الرد الآلي بأن الرقم المطلوب خارج الخدمة، و أحياناً أسمع تيت تيت تيت ثم ينقطع الصوت، و في كل الأحوال لا أظن أن السيد حمدوك لم يعلم بأني كلمته و لو كان يريد العودة لي لأمكنه ذلك، لأنه لابد أن يكون قد رأى رقمي في قائمة (المسكولات) بلونها الأحمر المميز…
أخيراً تمكنت من الوصول إليه و أتاني صوته مجهداً:
: ألوووو
: السلام عليكم سيدي رئيس الوزراء.
: و عليكم …. مين معاي؟
: المواطن الصالح علي العبيد.
: نعم؟
: علي العبيد
: علي مين؟
: العبيد..
: لا حول و لا قوة إلا بالله، يعني أنا أحارب في العنصرية بي هنا و انتو تنشروا فيها بي هنا؟ يعني جدك دا ما لقى إسم أحسن من كدا عشان يسمي بيه أبوك؟
: معليش يا سيدي، أمسحها لي في وشي رغم إنها ما غلطتي..
: أمسح شنو و أخلي شنو يا مواطن، و هو إنتو فضل ليكم وش نمسح فيه حاجة؟
: ليه فخامتك ؟ عملنا شنو؟
: خليني من عمايلكم، داير شنو هسّ؟
: يا سيدي نفسك حار مالو؟ أنا مواطن صالح، و من حقي أتكلم معاك و أناقشك و أشكي ليك، و لا خلاص…. عشان كنت في باريس بقيت تشوفنا دون المستوى؟
: باريس؟!! هههههه، و الله الكلام دا يا خوي قولو لي ناس فلان و فلان، أنا طول عمري عايش برة، و باريس بعرفا أكتر من الخرطوم الكريهة بتاعتكم دي.
: قصدك شنو يعني بي ناس فلان و فلان؟
: إنت عارفن يا مواطن.
: و إذا قلت ليك ما عارفن.
: تكون جبان، و حأقول ليك علي الطلاق عارفن زي ما إنت عارف البهرِّب الدهب منو، و الكتل الناس في القيادة العامة منو ، و المنع لجنة أديب ترفع تقريرا منو، و الماسك 82 في المية من شركات الحكومة منو، و البلعب في سعر الدولار منو، وال…
: يا ريس مافي داعي لي قومة النفس دي، أنا مواطن صالح و عايش في دولة مدنية و من حقي أناقشك و أع…
: بس دا الإنت فالح فيه، تتشطر علي أنا عشان مدني، سلم على المدنية يا علي.
: نعم؟!
: هاك المدنية دي….
: يعني يا ريس حكومتنا ما مدنية؟
: علي، لا إله إلا الله….
: محمداً رسول الله.
: أنا ما ناقصك… إحترم نفسك و أقفل الخط قبل ما أقفلوا في وشك..
: بس يا ريس أنا لسه ما ناقشتك في الموضوع الضربت ليك عشانو، عايز أعرف في باريس عملتوا شنو، وهل سنتوقع نتا…..
: كعععععععععععععععععععع.
خروج:
رغم شعوري بالمهانة من قفل الخط قي وجهي و لكني سأعاود الإتصال.. أنا مواطن صالح في دولة مدنية و حمدوك موظف عندي و بدفع ليه مرتبو ولازم أعرفوا بيعمل في شنو…و نشوف يا عبد الله.