مقالات سياسية

تحليل نفسي لشخصية الفيلد مارشال مني أركو مناوي!

وليد المنسي
١- تابعت زي و زي إى زول تاني حوارات و خطابات منى أركو مناوي الأخيرة، و لاحظت برضو زي و زي إى زول تاني نمط الأخطاء اللي برتكبها و البقت مثار سخرية و تندر، ما بنكر تللذي بالسخرية الفاخرة ، ضحكت حد الشهقة لما جابو صورتو مع سيلفا كير و الكابشن كان (أنا و رئيس جنوب السودان رويال كير).
٢- لما إتكررت الأخطاء بكثافة و في فترة و جيزة، لاحظت الريد فلاقس red flags و قفت مع نفسي شوية، في حاجة غلط هنا بتكرار نمطي، ف..آها… بعيد من السخرية..دا إسمو شنو دا؟
الديسلكسيا (Delexia) …ب س ياها!
٣- تعال نشوف يعني شنو الديسلكسيا و كيف بتأثر على الشخصية و كيف بكون عندها إنعكاساتها السياسية.
مهم نأكد إنو المرض النفسي ما عيب… عيب لما ما يتعالج!
يلا الحجل بالرجل!
٤- أولن تبادي الزول المصاب بالديسلكسيا بتميز بتركيبة دماغية مختلفة عن الزول العادي، ودا بقود لعدم الفعالية في الربط بين القسم الأيمن و الأيسر للدماغ. هم بعانوا من خلل وظيفي عصبي في دوائر الحديث و القراية بالنصف الأيسر الخلفي من المخ والشئ دا غالبا بسبب عامل وراثي، ٥٠ % من حالات الديسلكسيا عندهم أقارب بعانو من نفس الإضطراب.
٥- القراية و النطق بتغير لأسباب فسيولوجة، يعني مثلاَ ال ب في قرايتهم بتبقأ عندهم ن، ال ج بتبقأ خ و بالإنجليزي ال M بتبقأ W و العكس صحيح.

٦- تاني متاني ، الديسلكسيا خشوم بيوت، البهمنا هنا بتاعت الفيلد مارشال ديسلكسيا الحديث و دي بتعني إنو إيقاع الكلمة وسطوتها و موسيقتها بتتغير فسيولوجياَ.. عبد الوهاب البرهان يمكن يبقأ عبد الفتاح السيسي.. أو عبدالفتاح يمكن يكون عبد الوهاب!.. ممكن برضو البرهان يكون من أسماء الله الحسنى.. زي الرحمن ! عادي كالزبادي ما دام في إيقاع موسيقي واحد!

٧- قلب مقطع الكلمة بانت بدل عن نبات، وكوافه بدل عن فواكه .
ممكن برضو يحذف بعض الحروف، وإضافة تانين زي : والد بدل من ولد، وندى بدل من نادى .
٨- مرات بكون عندو ضعف في التمييز بين أحرف العلة ممكن يقرأ كلمة ( فول ) فيقول ( فيل).
٩- عادي ممكن يقلب مواضع الحروف من الكلمة يا بالتقديم أو التأخير زي يقول او يقرأ قلب بدل من قبل، وعبد بدل عن بعد … و هكذا!
١٠- بعيد من دا كلو .. هل الديسلكسيا بتأثر في شخصية الزول؟
أى
طيب كيف؟
شوف… القلق والتوتر والعدوان كمضاراة لعثراتهم هو جوهر الديسلكستك الما متعالج، بحاول يدس إخفاقتو بصناعة الفوضى، سياسياً قلقو دا ظهر وبظهر في مجافاتو لعبدالواحد محمد نور بعد تكوينهم لحركة تحرير السودان و لفظو ليهم و موالاتو للبشير بعد إتفاقية البشير و لفظو ليها.. و لفظو للجبهة الثورية و قوى الحرية و التغيير و لكل فصائل جبهة تحرير المتعددة التى إنشقت منه !
المهم…..
#٢١ إكتوبر ٢٠٢١

‫11 تعليقات

  1. مافي حاجة أسمها Delexia لا في الديكشنري ولا في الأمراض النفسية … الراجل ده هنا بتلكم عن ال Dyslexia

  2. Dyslexia شنو يااستاذ وليد زولنا دا اصنج وعوقة وتبيعة بى خشم الباب يااخى
    بالواضح كدا بليد وطبلة !!
    فاقد تربوى خلا اركو مناوى ..

  3. الموضوع بكل بساطة أن مناوي شخص زغاوي لا يتحدث اللغة العربية بطلاقة لأنها ليست لغته الأم .. ثم نرجو أن تكون مقالاتك القادمة باللغة العربية الفصحى حتى تتم قرائتها وفهما بيسر وبالشكل الصحيح

  4. يبدو ان كاتب المقال لديه بداية اعراض ل ال Dyslexia
    لانه قلب مواضيع الحروف لكلمة Dyslexia ل Delexia

زر الذهاب إلى الأعلى