مهادن الزعيم
✵ الساعة 4:30 صباح الاثنين جاني رفيق صحاني قال لي (قوم يازعيم العسكر عملو انقلاب عسكري) قمتا مخلوع مسكتا تلفوني هبشتا الفيس لقيت ناس زين قفلو النت لكن صاحبي شبكتو اريبا وكانت شغالة المهم كشفنا دقايق كدا وشبكة اريبا ذاتا قطعت …
✵ طلعتا الشارع الساعة 4:40 دقيقة لقيت ولدين مواقفين في الزلط محتارين واول م بديت اترس جو وترسنا سوا وكل القالو لي (قلبوها ااي) رديت (ااي قلبوها) وعملنا اول ترس في شارع العرضة وولعنا لساتك …
✵ شوية كدا وجوني اتنين من الرفاق واتحركنا ناحية شارع الاربعين ولمن وصلنا صينية التجاني الماحي عملنا خمسة متاريس واي زول بسألنا في شنو بنقول انقلاب ببدا يترس معانا وهو بردد (لا حول ولا قوة الا بالله) …
✵ وصلنا شارع الاربعين لقينا الترس صاحي واللساتك مولعة (يشهد الله في شباب بترسو وعيونهم بتنقط دموع بدون م يقولو ولا كلمة) ….
✵ بعدها دورنا هتافات (هتفنا بكل م نملك من قوة ومن غضب … وهتفنا ونحن بنبكي … عالجنا الغبينة بالهتاف)
✵ بعده شارع الاربعين ولع نار وشرار وجونا ناس من امبدة وكرري والفتيحاب والمربعات وترسنا شارع الموردة وباقي الشوارع وهم قالو ترسو شوارعهم كلها ختو معاها حراسة حتى جونا …
✵ ناس امبدة بتاعين ركوب راس اصرو الا يمشو الخرطوم وفعلا قدرو يطلعو بكبري الحديد ومشو القيادة ولقو شباب هناك من الخرطوم ودورت اروع الملاحم استمرت من 9 صباحا لحدي قريب المغرب ….
✵ في شارع الاربعين جمب استوب بانت كان في 10 تاتشرات من الجيش والدعامة والاحتياطي وقدرنا نضبط الثوار انهم م يشتبكوا معاهم حفاظا علي السلمية ومنعناهم يخشو شارع الاربعين …
✵ كان يوم عظيم جدا الماس بتبكي وتهتف وتكورك واجمل هتاف لاقاني (تقفل شارع تقفل كبري يابرهان جاينك دغري) كان تلاحم شعبي عظيم يشبه الشعب السوداني …
✵ اتخيلو انو اعتصام الفلول امس كانو شايلين عصي وخراطيش وبضربو في الثوار مع الشرطة والدعامة سوااااا ….
✵ لحدي المغرب امس كنا بنتونس في الشوارع وبنسمع صوت الرصاص والبمبان ولا همانا شي (نحن شعب كامل ياخ) …..
✵ لحدي تلاتة صباحا كنا قاعدين في الشوارع وخاتين سراير في نص الزلط وبعد اطمأنينا شوية قسمنا الناس واحدين يمشو يرتاحو شوية ويجو بدري وواحدين يقعدو في المتاريس …
✵ لحدي الان 8 شهدا۽ (لهم الرحمة) و140 جريح ومكملين بإذن واحد احد ياجبنا تار كل البلد يامتنا جت موتة رجال …
الشعب اقوى و #الردة_مستحيلة
لا حول ولاقوة الا بالله. شباب ذي ديل ما بستحقوا رصاص او عصي.. ديل يتختوا تيجان في الرؤس
حميدتى وجبريل ومناوى عاوزين يعملوا دولة المهدية الثانية
دولة القتل والارهاب والاشلاء
لابديل الا بفك الارتباط مع دولة دارفور الاسلامية التى ضماها المستعمر الانجليزى لنا في عام ١٩١٦م
ديل من تشاد يا عمي ما عندهم علاقة بدارفور شوفت ليك دافوري اصلي بعمل في حاجة او بقتل
كل القتلة و السفلة مستوردين
اولا ما قروا في السودان
لسع يلبسوا في الزي التشادي و الدليل زيارة مناوي الشمالية
كل الحركات المسلحة مستوردة بواسطة الكيزان من غرب افريقيا
لذلك
شعب رائع ..جرت ادمعي لوصفك …يا شعبا لهبك ثوريتك..انت تلقى مرادك والفي نيتك.منصورين بإذن الله ..نلتزم بالسلمية ..ونقتص من هؤلاء القتلة ..ولن نتسامح مع الابالسة اللصوص ادعياء الدين صنيعة الصهيونية..مهما كانت جهويتهم ..حتى لا تتباكوا بالعنصرية . اي كوز ندوسووو دوس.
سوف ينتهى الانقلاب ولكن يجب حسم الدعم السريع حسما نهائيا ، قصة انو يتبرعوا للناس وللمستشفيات وللمعلمين عشان يكتلوا قلب الناس المرة دى ما حاتنجح ابدا ابدا ، الدعم السريع لازم اول حاجة ينتهى تمام ، باخوى واخوك بدم ، بدواس ، بموت لازم ينتهوا هم والبلطجية بتاعنهم البجلدوا في البنات والاسر والشباب ديل ،