مهادن الزعيم
✵ يحكي طالب بجامعة الخرطوم عن احداث فجر الانقلاب قائلا :- كنا نايمين في الداخلية صحينا علي صوت هتافات قوية بتقول (تقفل شارع تقفل كبري يابرهان جايينك دغري)…
✵ قمنا من النوم مخلوعين بنسأل في شنو قالو لينا حصل إنقلاب عسكري والناس ماشة علي القيادة .. عاينا للشارع لقينا حشود ليها اول ما ليها آخر .. طوالي نظمنا موكب من الداخلية وطلعتا نهتف ضد الانقلاب …
✵ وصلنا القيادة لقينا عساكر الجيش قالو لينا ابعدو من مناطق معينة واهتفو زي م عايزين والحشد بتاعنا ماشي زايد وخلاص اقتنعنا انو دا إعتصام …
✵ قعدنا في القيادة مع بعض الهجوم هنا وهناك وصديناهم ونحن بنهتف رغم كمية المصابين وسط الثوار لحدي م جات الساعة اربعة جاتنا قوة من اتجاه كبري الحديد …
✵ الجيش كالعادة قفل العساكر جوة القيادة وخلانا في الشارع بنواجه في قوة مشتركة من الدعم السريع ومعاهم ناس لابسين ملكي ضربو فينا زخيرة خيالية وسقط مننا عدد كبير …
✵ لمن الضرب كتر علينا جزء مننا رجع الداخلية وجزء دخل جامعة الخرطوم لكنهم لحقونا جوة الجامعة وختو لينا الكلاشات في رأسنا وفي ناس ختو ليهم البوت في رأسهم ولو م هتفتا عسكرية مابتمرق منهم …
✵ ناس الداخلية هاجموهم جوة الداخلية واجبروهم علي الزحف في الانترلوك تحت الضرب واجبروهم على الهتاف عسكرية …
✵ نهبوا كل تلفوناتنا ولابتوباتنا وقروشنا وحددو لينا مسار محدد بشارع البلدية نمشي فيهو تحت الضرب وحلقو شعر كتير من الشباب وقطعوا ليهم البناطلين ….
✵ الحصل كأنو إعادة لسيناريو فض الاعتصام وللاسف سرقو كل تلفوناتنا الوثقنا بيها الحصل وكانو عايزين يكسرونا بأي طريقة وحتى عساكر الجيش كانو بصفرو بالصفافير (سقطت م سقطت صابنها) وهم بضحكوا علينا ونحن بنتعرض للضرب والذلة والإهانة …
✵ (دا الحصل مع طلاب جامعة الخرطوم نقلتو ليكم بالحرف الواحد بعد اجبروهم على اخلاء الداخليات والتشرد في الشوارع وبعضهم لايملك مكانا يذهب اليه) … دي بداية الحكم العسكري كانت كدا وبراكم اتخيلوا المنتظرنا اذا م سقطناهم هسه …
الله غالب
العسكري للاسف علموهو كيف يحقد علي المدنيين خصوصا طلاب الجامعات هل هو احساس بالدونية حتى الضباط بحقدو دائما بميلو للسلطة لنقص فيهم واحساسهم اقل من الاطباء والمهندسين والاداريين والمحامين هم لايدرون انهم في هذا المرض للاسف ده حقيقة احساس الواحد فيهم انه دخل الكلية اجباري وليس رغبه في معظمهم النسبه هي من اجبرتهم لابد من مهالجة هذه المشكلة في المستقبل
للأسف يوجد عدد كبير من الضباط والعساكر مصابون بامراض نفسية وعصبية يحتاجون الي علاج واعادة تاهيل