مهادن الزعيم
✵ ايام ثورة ديسمبر المجيدة شارع العرضة ماكنا بنقدر نترسو الا بعض المرات المعدودة ولا بنقدر نطلع فيهو موكب لاكتر من دقايق معدودة بسبب طبيعة الشارع المليان محلات تجارية واهميته في انه شارع رئيسي رابط بين غرب امدرمان وشرقها لحدي بحري …
✵ زمان ناس امبدة كانو بتحركوا بصورة فردية لحدي ن يوصلوا شارع الشهيد عبدالعظيم بعد الثورة ولمن بقوا يجو بمواكب كبيرة اصبح شارع العرضة مهم جدا لانو نقطة الوصل بين امبدة وامدرمان القديمة واكتسب الشارع حيوية ثورية …
✵ للامانة شهد شارع العرضة اقوى المتاريس في ايام الانقلاب الاولى (من لايعرف ترس فيصل وترس الاستاد وترس لفة الشعبي وترس ودالبشير) مع انو كانت القوات الامنية مصرة علي ازالة المتاريس من شارع العرضة ونقل اي حاجة ممكن الشباب يترسو بيها لمكان خر لكن برضو الثوار مابغلبوا حيلة وبتصرفوا … شوف عين اول ترس اتخت في شارع العرضة يوم الانقلاب كان الساعة 4:30 فجر الاتنين 25/اكتوبر وقامو بيهو تلاتة ثوار فقط ….
✵ بعد الانقلاب واصل شارع العرضة في اداء دوره الثوري واستقبال المواكب القادمة من امبدة وماجاورها من احياء لحدي موكب 30 اكتوبر الماضي …
✵ المواكب كانت بتجي بشارع العرضة وتقابل ثوار شارع الاربعين في التجاني الماحي وكلهم يمشو سوا بشارع الموردة مرورا بالقسم الاوسط (كنا بنشبك ايدينا قدام القسم والبوليس بكونو قاعدين يتونسوا في امانة الله لحدي م موكبنا يمر عادي لمن ناس الشرطة حفظونا بالاسم والشكل) …
✵ يوم 13 نوفمبر الماضي اتعكست الاية بصورة غريبة لما الموكب ماشي بشارع العرضة بصورة طبيعية ماشين شارع الشعيد عبدالعظيم حسب ماهو معلن (يعني ماواصلين القسم الاوسط ذاتو ولا بنجي بي جمبو) اتفاجأنا بالشرطة قطعت علينا الطريق قبل صينية التجاني الماحي ودورت فينا بمبان …
✵ في ذات الوقت الشرطة قطعت الطريق علي موكب ودنوباوي جمب صينية الخليفة وبرضو ردمت الموكب بمبان بدون سبب مع انهم بجو بالشارع دا كل مرة عشان يوصلو شارع الشهيد عبدالعظيم …
✵ الثوار في البداية اتفاجأو من دخول بوليس القسم الاوسط في الصراع ضد الثوار واصبح منطقة انطلاق للقوات الامنية لقمع الثوار في شارعي العرضة والاربعين …
✵ في اليوم داك الثوار صنددو في شارع العرضة لاكبر وقت ممكن وحالفين الا يدخلوا شارع الاربعين وفعلا نجحوا بعد ساعتين ونص من الزمن وقرابة الـ180 جريح ومصاب بين الثوار …
✵ اها من الموكب داك والمواكب البعدو (17 /21 /25) نوفمبر الثوار البجو بشارع العرضة بقوا عارفين انو الشرطة ح تقطع عليهم الطريق وحايقاومو حتى يوصلو شارع الشهيد عبد العظيم واصبح التتريس ثااااابت في شارع العرضة من بداية الموكب. وناس ودنوباوي بجونا بداخل سوق امدرمان والكتمة تدور…
✵ موكب امس الشرطة بدت في ضرب البمبان كنا في شارع الاربعين وسمعتا بعض الثوار بقولو لي بعض (يلا شارع العرضة لانو اسهل في الاشتباك والهوا معانا) وفعلا دي حقيقة لانو الهوا متجه جنوب جغرافي والشارع شرق غرب ودا بساعد الثوار في تفادي البمبان …
✵ مع انو شارع العرضة مافيهو منازل سكنية كتيرة فاتحة فيهو عشان يدخلوها الثوار لكن بعد دا اصبح رقم صعب جدا في الثورة بعد الانقلاب بالنسبة للكجر لدرجة بستخدموا فيهو الذخيرة الحية بصورة راتبة وجل شهداء امدرمان السقطوا في مواكب 13 و17 نوفمبر كانو في شارع العرضة ….
✵ كانوا فاكرين الهجوم بقمعنا لكنه اضاف شارع جديد للثورة (م لقيت صور لمتاريس شارع العرضة لانهم 24 ساعة بتعرضو لي قمع ومشتبكين ومامركزين مع التصوير والتوثيق الا لايفات الاشتباك) …..
سلام ومحبة
فيسبوك
