يبقى نجهز الشموع شان ما يداهمنا الظلام

عاطف عابدون

⬛ البفتكر انو عدوه هو حمدوك اهو داك حمدوك في مجلسه يمشي ليه وقشه ما تعتر طريقه، أما نحن فعارفين منو هم أعداء الثورة تماما وشايفنهم بكل وضوح، لا توقيع سياسي ولا اتفاق اطاري حيطششو عيونا من القتلة خصماء الثورة وأعداء التحول الديمقراطي.

⬛ انا عاطف عبدون دا بفتكر انو إتفاق حمدوك وشلة المبادرين كان خطأ وجا في وكت خطأ وشايف اننا حنرتكب الخطأ الاكبر منو لو حولنا طاقة الثورة من مواجهة أعداء التحول الديمقراطي لمواجهة حمدوك والهندسو معاه الإنفاق وحنضيع زمن اضافي لو ما قدرنا نستغل الفترة دي على انها (هدنه غير معلنه) من الإنقلابيين ونجهز نفسنا لمواجهة انقلاب جديد بشكل اكثر جاهزية من الفات، ونحن الان قدامنا شغل كتير فشلنا في اننا ننجزه طوال السنتين الفاتت ودا الوكت المفترض نشتغل فيه َونجهز للإنقلاب الجاي.

🔴 قدامنا لجان مقاومة محتاجة تتسمى وتتكرب عشان لمن يحصل انقلاب تاني نكون عندنا قيادتنا الحنمشي وراهم مطمنيبن ومتأكدين من انهم عارفين الدروب.

🔴 قدمنا نقابات محتاجة تتأسس عشان لمن يحصل انقلاب تاني وندعو العصيان الشامل ما يجي مدير يهدد الموظفين ويقول ليهم انا ما معترف بلجنتكم التسيرية.

🔴 قدامنا تفاهمات مفترض تتم مع الرتب الصغيرة في الاجهزة الامنية ونوقع ليهم فكرة اننا ما ضد المؤسسات دي جملة وتفصيلا بل ضد السلوك البتنتهجو وضد قادتهم المبيوعين للمخابرات الأجنبية من أجل مصالحهم الخاصة جدا ونوربهم كيف نخن ممكن نخت يدنا مع بعض عشان نخلص البلد من القادة اولاد المخابرات.

🔴 قدامنا لسع مشوار من ازالة التمكين ظهر بشكل واضح مع الانقلاب وشفنا عورة السنتين الفاتو وكيف انو مفاصل الدولة لسع بتعج بالفلول بالذات في الأجهزة الأمنية والاعلامية.

🔴 قدامنا بناء خطط اعلامية وميدانية بديلة لمواجهة الانقلاب الجاي عشان ما نلقى نفسنا مشلولين قدام خطوة زي قطع الإنترنت.

🔴 قدامنا شغل قانوني كتير محتاجين نشبك فيه القانونيين في الداخل والخارج لمحاصرة أعداء الثورة والقتلة الإنقلابيين ونحاصرهم بالقانون وين ما قبلو.

🔴 قدمنا بناء اجسام قوية ومنظمة للسودانيين بالخارج تطلعهم من دائرة انو حراكهم يكون ردة فعل للبحصل في الداخل وتحوله لحراك خلاق واكثر تنظيماً وتأثيراً وأكثر قدرة علي محاصرة أعداء التحول الديمقراطي.

⬛ الحاجات دي كلها وغيرها كتير مفترض نشتغل فيها من الآن عشان لمن يجي عسكري مراهق ويرتكب حماقة جديدة نكون عارفين تماما كيف نطفي النور ونوريه الطفى النور منو.