مازن سخاروف
(1)
كتلوه كيف, ود الفريق؟ والدم جداول
دافي يروي بكان طلع
شجر الشهيد بشربلو دم
راجع الأرض يرتاح خلاص
..
همو الجفل راح مودع, وباقي هم
ومهرو كم يا ناس بكم؟
وقلب أمو الإتقسم صبرُ وجزع
قـَهَرو “الأصم”
(2)
نسأل نقول اتجرحوا كم, وفقدنا كم؟
سبب الوفاة؟ ده ألم جديد محتاج خِتِم
والليل طويل رقد هجع ما قال بِغم
و”المفاقيد” في البحر يا ربي كم
..
الموت وقف زي البياض وقت الفجُر
يومو تمّ, المات هنا ومدفون هناك
الموت لـَزَم, حارس القبر لافي ويدوّر
مستني أرواح المسافات منتظر
..
(3)
موتنا يا ناسنا القراب لمة تمام (تداعي منتظم)
للحُنان في كردفان, وللبعاد شرق وغرب
والحواكير والمطامير والسواقي
وضل الجبال الشافها “دِقنة” مع الفطام
..
لمّــتنا جبرة بعد كسر, “دية أذية”
في البشارك بابتسامة, أو بعيشة
في “المسهي” وفي البجالد
وكل بت من حيّنا بفدوها مية
(4)
كل آهة موت مودع خانة تفضى
والصلاةُ على الجنازة سنة فينا وللبرايا
ألبَس بياضك يا شهيد وارجا الدفن
لحد ما أرض الكنانة تقول كفاية
..
الموت وَجَم .. رافع التمام وما فتر
فلمِ صامت يا “سعادتك”, ده الخبر
الضمير في الكاكي مات, ونام قفا
الباع عرضنا ودمنا, بيع الجفا
(5)
(تداعي حر: فتش عن “النيران الصديقة”)
مافي رجعة من الرصاص
مافي غير العز خلاص
والإجابة يا الطرح السؤال (كتلوه منو؟)
جوة السؤال
في نار عدوة و”نار صديقة”
وفي حرقة تشة, وفي الحريقة
لما الفراق انداح والدمعة جفت وقلنا ليه؟
الكلمة حبست وبرضو ليه
وين ناس حسين, جابر, سعد, عبد الحميد؟
يا زينة شبابنا الكان معانا وهسه لا
يا حرقة الجرح الفي بيتنا ومية جنبو
وألف بره
الجاي بكرة وراح بعيد
يا ريت لو الوردة بترجـِّـع شهيد
وقلوبات الرسايل تـحِن على دمعة خديد
يا ريت لو الغناوي تصبّر المكلومة في الفقد الشديد
(6)
(تداعي حر: أعرف وطنك
العبارة الشائعة “قال ليك” = حكمة في البُرديات الموزعة اليوم على المتاحف الأوربية)
إن توابيت, أو فلك
لو تصوّف ولا طب
لو حساب أو هرم أو فلسفة
كلو من واطتنا ديّ
والأصالة العندنا
ما عندّ زول
يا عين الشمس, الهسه وين, اتقرصنت
طيبة برضو اتحولت (إسمها اليوم أسوان شمال الدرجة الثانية والعشرين بمقتضى اتفاقية 1899)
باعوها كيف, وحلفا طيف واتدمرت
لو تلاحظ للسماسرة هم برضو البكتلو
..
يا وطننا القلنا نبقى بدونو حاجة , ومابقينا
ويا غنانا المشتهنو, وغنا لينا .. الـ
الهدّ فينا وكت ألوان السعادة أبتنا تب
وقت المساكين بسئلوا واتململوا
“بقّ” لينا وضوّ لينا
وقت الحقيقة بقت بعيدة, بقى الحقيقة
“إعرف نفسك”
Know Thyself
2 ديسمبر 2021
حفيد كِمِت, السودان أرض الناس السود, مازن سخاروف
يا وطننا القلنا نبقى بدونو حاجة , ومابقينا
وقت الحقيقة بقت بعيدة, بقى الحقيقة
عقب آزول …. عقب يا معاذ!!
شكرا
متين يا نيل تكون ياكا ونكون يانا