أتذكَّر ونحن زمااااان في المدرسة الإبتدائية.. مدرستنا كانت مُختلطة.. كان الزمن داك في نُوعين من (الشَكَلْ).. شَكْلَة الوِلادْ وشَكْلَة البنات.. الأُولى كانت دائماً تكون بموعد من نُوعية: نتلاقى بعدين في خُور الحسن، في كرُو ود منصُوري، في خُور البير، في كرُو أرباب، وتنتهي بي بُنية وشلاليت ومُصارعة وفي النهاية مُحاجزة وكدي.. أما التانية فكانت بدايتها ونهايتها الفصل ولو بالغت المزيرة ولو كمان تطوَّرت خالص تصل تحت صهريج الموية قدَّام باب المدرسة.. والنُوعية دي تنتهي بي: (يا شينِي).. (يا قبيحي).. (يا عُولاقة).. وأخطر حاجة ممكن تصل ليها: (أُو أُو أُووووهْ مع مدَّة الخشيم لا قِدَّام كدي ومعاها تكالُب للخمس أصابع في وجه البنت التانية)!!!
أها الوقَع على القيادي في (قحت المؤتمر الشعبي)، التوم هجُو حفيد السادة اليعقُوباب ونائب رئيس الجبهة الثورية، من بعض كُتَّاب (قحت المؤتمر الوطني) ياهُو زي شكلة البنات دي!!!
بدَل يناقشُوا الراجل في أفكاره وآرائه المبذولة عبر دواوينهم المصطنعة (مجلس شركاء الدم مثلاً) وليه عاوز يوسِّع ماعُون المشاركة وليه عاوز (حمدوك يطلِّع بيان بحل الحكومة).. قامُوا طلقُوا نشطائهم و(بُطَانُنْ) عبر الأسافير شبكُوهُو ليك: الشين، العُولاق، اللصقة، الفعلتك والتركتك، وفي واحدين مشُوا أكتر من البنات حقاتنا ديلك، واحد قال ليهُو في زول يسمِّي نفسُو (هجُو) تخيَّلُوا بالله؟؟!! وحكمة الله الحملة دي تكَاكِي في الميديا وهُو شغاااااااال وحسَّابتُو بتحسِب.. وفي غمرة نشوتهم بالإساءات و(المُهايَطة) دي زحَّاهُم (الأربعة) برَّاااااااحة، وللأسف صاحبت هذه الإزاحة دخُول بعضهم السجُون!!!
الشاهِد في ذلك.. مثلما نُريد أن نوجِّه ونؤهِّل ساستنا ديل كيف يحكمُون، نريدهم أيضاً أن يتعلمُون فنون المعارضة.. وذلك بالإبتعاد قدر الإمكان عن شخصنة الإمور العامة.. فالوطن ملك للجميع على الشيوع.. والشعب دا واعي جداً ويعرف جيداً الغث من السمين.. يعني بالدارجي كدي.. مواطِن عادي يهمُّوا شنو بالسياسي يكُون سمح سماحة جمل الطين ولَّة شين شناة مُرَّة مادام هُو عاطل وفاشل وما قادر يوفِّر ليهُو أبسط مُعينات الحياة، أُكْلُو واشرَبُو، تعليم، صحة، أمن وأمان؟؟!!!
*خارج النص*
كتبنا كثيراً عن القروش والمبالغ الكبيرة التي تُصرَف في شراء الذِمَم وفي الإستقطاب السياسي من لدُن أيام البشير/عوض الجاز وإلى يوم الناس هذا، فلو وُجِّهَت هذه المبالغ المُهدرة للتنمية الحقيقية في مصلحة المواطن لكانت فائدتها أعظم.. ولجَنَى السياسي المُبعزِق للقروش دي محبة ملايين من الناس ممَّن تصلهم هذه المصلحة في شكل مُستشفى أو شفخانة أو مدرسة أو بئر ماء بدلاً من أن تستقِر في جيب (سياسي أو قط سمين) واحد يبيعك في أقرب مُنعطف يقابلُو في الحياة، اللَّهُم هل بلَّغت.. اللَّهُم فاشهَد؟؟!!!
…
..
.
*ويظل سؤالنا الدائم.. البلد دي السايقها منووووووو؟؟؟*
*+ خبر الجماعة القبضوهم في مطار الخرطوم مهرِّبين (الذهب) برَّة شنو؟؟؟*
*++ لجنة التحقيق المُشتركة مع (الآي بي إف) في حادثة إغتيال حمدوك الفاشلة وصلت لي وين؟؟؟*
*وأخيراً.. القروش الضايْعَة بين المالية ولجنة التمكين، إتعرفت كم وعند منو ولَّة لسَّع؟؟!!!*
المشكلة ان هناك درجة عالية جدا من البذاءة وقلة الادب والردحي ولغة الكراهية كانت مكبوتة في القواميس اليسارية فأخرجوها لعد الثورة واصبحوا يبتزون الناس بمثل هذه الالفاظ والشتائم وجدادهم الالكتروني مستحيل يناقش فكرة ولكن اذا اختلفت مع خط اليسار على طول يصنفوك انك فلول وكوز وتلحس بوت العسكر وابن حرام وابن زنى وابن ايه مما تطفح به قواميس الياسر من بذاءة.ِ
الغايظهم في القائد التوم هجو انو فعلا شخص قيادي يصرح بالفي دماغو واليؤمن بيه وما يهمو مهما ضربوا من السكليب واهالوا من الشتائم، يدخل من هنا ويطلع من هنا!
ما يغيظهم في التوم هجو ثقته القوية في نفسه وقوة حجته وما يكرره لهم من كلام يغيظهم حين يذكرهم بالانتخابات أو يطالبهم بمنازلته عبر الصناديق..
والله الكلام دا يحرق جوفهم ويخليهم يزيدوا من الشتائم.. والجمل مااااش!!
والله يا حاج جمال أنت بتنفخ ليك في قربة مقدودة ساي.
اسع تمسكا من البرهان و تنزل لمن أصغر قحاتي بنطلونو ناصل تقدر تطلع منهم وأحد ممكن يكون زي طلبة زمااااان يعني دفعتك.
ديل خليهم للفيس و التك توك بس
الزول بلدياتك ولا شنو بضارى فيهو!! على كل حال كل الاوصاف الذكروها عنو مية فى المية و بدون تحفظ, قال ما بنرجع الا البيان يطلع
يا جمال لغه دي ما بيفهمها الا الشوايقه
اما التوم هجو شعب كل حكومه لا مبدأ له
كيف تصنف شخص مثل هذا الا ان تقول شخص مدحفس
لن تكتب أفضل من هذا لانك مقيم في السعودية
هل تريد من من اختلفوا مع هجو أن يقتلوه؟اي شكلة اولاد بحسب المقال الفطير
ثانيا العسكر صنعوا لهذا المعتوه مساقا من دون اي تفويض من اهل اقليمه والقصد الأول
هو الإنقلاب وليس أضعاف المدنيين،واخيرا وبعد أن شبع معتوهك من الموز التالف صرخ بأعلي
صوته ما بنرجع حتي يخرج العسكر بيان الانقلاب وقد حقق مراده،وبكل بجاحة وفجاجة يتهم
المعتوه حزبا بقتل المتظاهرين السلميين وعينه تتجاهل القتلة الحقيقيين،،لكن من الاسفاف وقلة
الشغلة ان ينفق الناس وقتهم في مهاجمة مخبول عرته القنوات الفضائيه
التور هجم دا مفروض يودوه المتحف لانو بجد شخص تحفة من الجهل والخطل والهبل قال حفيد مين كده ماعارف يا اخي دا لو حفيدى بتبرا منه.
جيمي أخوي …
التوم هجو فاقد للكاريزما ..
التوم هجو زول بسيط وفاقد تربوي
لم يستفد من غربته وتأهل ليقود شعب ..
وحات الله التوم هجو يظهر في الفضائية انا بكون مصيت
خمسة ليمونات ..
غايتو الحمد لله .. الرويبضة يتكلم عن شئون العامة
والله ماعندنا معاهو حاجة بس رأفة بيهو عليك كلمو
قال مناقشة هجو في افكاره. هل التوم هجو لديه أفكار يا رجل ان اي هجو تتحدث وشنو سمح وشين ومشكلة الاولاد والبنات. سطحية وكلام اجوف
أكلمُو وين يا الحبيب مدثر..
صدقني ماب أعرفو خالص.. أنا تكلمت عن حالتُو بس كظاهرة…
تحياتي…
يا راجل افكار شنو العند التوم هجو.بعدين الزح جماعة الاربعه برااااحه منو التوم هجو؟ يا رااااااجل منو الما عارف
هههههههههه….التوم هجو مثقف …ناس الانقاذ ديل لو عارفنو ليه وزن سياسي ولا عقل كان اشتراه صلاح قوش زمان …دا بسيط + دلاهه! عليك الله ما لقيت الا تكتب عن التوم هجو……….استغفر الله العظيم
حملة اليساريين المنظمة ضد التوم هجو حملة واضحة واهدافها واضحة.
انا امس شفت التوم هجو في الجزيرة والله ألقم بتاع تجمع المهنيين وبتاع الحرية والتغيير حجارة.
أما عبارة ما بنرجع الا البيان يطلع فهي عبارة سيحفظها التاريخ لأنها غيرت مجرى الاحداث،ودي كمان من شدة ما مزعلاهم في نومهم يحلموا بيها.
التوم هجو لو مشى سليل اليعقوباب لو نزل في ولايته قصاد كل هؤلاء الفشوش ، اقصد كلهم الاعمى فيهم شايل المكسر لو نزلوا في كفة والتوم هجو لوزنهم ورجح الميزان كما يقول اهلنا الختمية.
ليت التوم هجو يدعوا لمسيرة في الخرطوم لمساندة الاجراءات التصحيحية عشان القراد اللاصق في ظهر الجمل دا يعرف مكانته الحقيقية!!
قال أحد الفلاسفه.. لا تستخف بعدوك فتضيع على نفسك فرصة تحقيق اهدافك.